ବିଶାଖାପାଟଣା : ଲୋକସଭା ନିର୍ବାଚନରେ ଆମ୍ ଆଦମୀ ପାର୍ଟି (ଆପ୍) ସହିତ ମେଣ୍ଟ କରିବାକୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ମନା କରିଥିବା ଆପ୍ ଆବାହକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କହିଛନ୍ତି। ସୋମବାର ସ୍ଥାନୀୟ ବିମାନବନ୍ଦରରେ ସାମ୍ବାଦିକଙ୍କ ସହ କଥାବାର୍ତ୍ତା ବେଳେ କେଜରିୱାଲ କହିଛନ୍ତି ଯେ ନିକଟରେ ସେ ରାହୁଲଙ୍କୁ ଭେଟିଥିଲେ। ସାକ୍ଷାତ କାଳରେ ରାହୁଲ ମେଣ୍ଟ ପାଇଁ ମନା କରିଥିଲେ। ଦିଲ୍ଲୀ କଂଗ୍ରେସ ମୁଖ୍ୟ ଶୀଲା ଦୀକ୍ଷିତଙ୍କ ଅଭିଯୋଗ ସମ୍ପର୍କରେ ପ୍ରଶ୍ନର ଉତ୍ତର ଦେଇ କେଜରିୱାଲ କହିଛନ୍ତି ଯେ ଆମେ ରାହୁଲଙ୍କୁ ଭେଟିଥିଲୁ। ଶୀଲା ମେଣ୍ଟ ନିଷ୍ପତ୍ତି ନେବା ଲାଗି କ୍ଷମତାଶାଳୀ ନେତା ନୁହନ୍ତି। ଶୀଲା ନିକଟରେ ଅଭିଯୋଗ କରିଥିଲେ ଯେ ନିର୍ବାଚନ ମେଣ୍ଟ ପାଇଁ କେଜରିୱାଲ କେବେହେଲେ ତାଙ୍କୁ କିଛି କହିନାହାନ୍ତି। ବିଜେପିକୁ କ୍ଷମତାରୁ ଦୂରେଇ ରଖିବା ଲାଗି ଦିଲ୍ଲୀରେ କଂଗ୍ରେସ ସହିତ ମେଣ୍ଟ କରିବା ଲାଗି କେଜରିୱାଲ ନିବେଦନ କରିଥିଲେ।
ଏହି ପ୍ରସଙ୍ଗରେ ଦିଲ୍ଲୀ କଂଗ୍ରେସର ନେତାଙ୍କ ମଧ୍ୟରେ ମତଭେଦ ଦେଖାଯାଇଥିଲା। ଆପ ସହ ମେଣ୍ଟ ସପକ୍ଷରେ ଦିଲ୍ଲୀ କଂଗ୍ରେସ ପୂର୍ବତନ ମୁଖ୍ୟ ଅଜୟ ମାକେନ, ସୁଭାଷ ଚୋପ୍ରା, ତାଜେଦାର ବାବର ଓ ଅରବିନ୍ଦ ସିଂହ ଲଭଲି ମତ ଦେଇଥିଲେ। ସେହିପରି ୧୨ଜିଲା କଂଗ୍ରେସ ସଭାପତି, ତିନି ମ୍ୟୁନିସିପାଲ କର୍ପୋରେସନ କାଉନସିଲର ମେଣ୍ଟ ସପକ୍ଷରେ ମତ ଦେଇଥିଲେ। ତେବେ ଶୀଲା ଦୀକ୍ଷିତ ଓ ତିନି କାର୍ଯ୍ୟକାରୀ ଅଧ୍ୟକ୍ଷ ଦେବେନ୍ଦ୍ର ଯାଦବ, ରାଜେଶ ଲିଲୋଥିଆ, ହାରୁନ ୟୁସୁଫ ମେଣ୍ଟ ବିରୋଧରେ ମତ ଦେଇଥିଲେ। ତେବେ ମେଣ୍ଟର ଚୂଡାନ୍ତ ନିଷ୍ପତ୍ତି ରାହୁଲଙ୍କ ଉପରେ ଛାଡି ଦିଆଯାଇଥିଲା। ମେ ୧୨ ତାରିଖରେ ଦିଲ୍ଲୀର ୭ଟି ଲୋକସଭା ଆସନ ପାଇଁ ମତଦାନ ହେବ।
Comments are closed.