ଭୁବନେଶ୍ୱର /କଟକ . – ଲୋକ ପ୍ରିୟ ଟେଲିଭିଜନ କାର୍ଯ୍ୟକ୍ରମ କୌନ୍ ବନେଗା କରୋଡ ପତି ବା କେବିସିରେ ବିଗ୍ ବି ଅମିତାଭ ବଚନଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନଜର ଆସିବେ । ଓଡ଼ିଶାରେ ଅନୁଷ୍ଠିତ ହେବାକୁ ଥିବା ହକି ବିଶ୍ୱ କପ୍ର ପ୍ରଚାର ପ୍ରସାର ପାଇଁ ନବୀନ ପଟ୍ଟନାୟକ ଭାରତୀୟ ହକି ଦଳକୁ ଅଭିନନ୍ଦନ କରୁଥିବାର ଏକ ୫୦ ସେକେଣ୍ଡର ଭିଡିଓ ଏଥିରେ ପ୍ରସାରିତ ହେବ । ଏହାର ସୁଟିଂ ସମ୍ପୂର୍ଣ୍ଣ ହୋଇଛି । ସୋନି ଟିଭିରେ ଶୁକ୍ରବାର(୧୨.୧୦.୨୦୧୮) ତାରିଖରେ ଏହା ପ୍ରସାରିତ ହେବ ।
ଏହି ଭିଡିଓରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଓଡ଼ିଶାରେ ହକି ବେଶ୍ ଲୋକପ୍ରିୟ ଆଦିବାସୀ ବହୁଳ ଅଞ୍ଚଳରେ ଲୋକମାନେ ଆଗ୍ରହର ସହ ଏହି ଖେଳକୁ ଖେଳି ଥାଆନ୍ତି । ପିଲାମାନେ ଚାଲିବା ଶିଖିବା ପରେ ହକି ଖେଳକୁ ଆପଣାଇ ଥାଆନ୍ତି ବୋଲି ଏଥିରେ ପ୍ରକାଶ କରିଛନ୍ତି । ଆମେ ମାନେ ଭାରତୀୟ ହକି ଦଳକୁ ସ୍ୱାଗତ କରିବା ପାଇଁ ଉତ୍କଣ୍ଠାର ସହ ଅନାଇ ବସିଛୁ ବୋଲି ଏହି ଅବସରେ ନବୀନ ପଟ୍ଟନାୟକ କହିଛନ୍ତି ।
କେବିସିର ଏହି ସ୍ୱତନ୍ତ୍ର ଅଧ୍ୟାୟର ନାମ କର୍ମବୀର ଅଧ୍ୟାୟ । ଏଥିରେ ହକି ଖେଳାଳୀମାନେ ଅଂଶଗ୍ରହଣ କରିଛନ୍ତି ।
ହକି ବିଶ୍ୱକପ ଆୟୋଜନ ପାଇଁ ଏବେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଜୋରଦାର ପ୍ରସ୍ତୁତି ଚାଲିଛି । ନଭେମ୍ବର ୨୭ ତାରିଖରେ ଅନୁଷ୍ଠିତ ହେବାକୁ ଥିବା ଏହାର ଉଦ୍ଘାଟନୀ ମ୍ୟାଚରେ ବଲିଉଡ୍ର ସୁପରଷ୍ଟାର ଶାହାରୁଖ ଖାନ୍ ସାମିଲ ହେବେ ବୋଲି ସୂଚନା ମିଳିଛି । ଶାହାରୁଖ ନିଜର ଟ୍ୱିଟର ଆକାଉଣ୍ଟରେ ଏ ବିଷୟରେ ସୂଚନା ଦେଇଛନ୍ତି । କେବଳ ସେତିକି ନୁହେଁ ସେ ଭାରତୀୟ ହକି ଦଳ ବିଶ୍ୱକପ ବିଜେତା କିପରି ହେବେ ସେଥିପାଇଁ ଟିମ୍ର ମନୋବଳ ବୃଦ୍ଧି କରିବା ପାଇଁ ଚେଷ୍ଟା କରିବେ ବୋଲି ଟ୍ୱିଟ କରିଛନ୍ତି ।
ଶାହରୁଖ ଖାନ୍ ସାମିଲେ ହେଲେ ନିଶ୍ଚିତ ଭାବେ ଅଧିକ ହକି ପ୍ରେମୀ ଓ ଶାହରୁଖ ଖାନ୍ଙ୍କ ପ୍ରଶଂସକ ଖେଳ ଦେଖିବାକୁ ଆସିବେ ବୋଲି ଅନୁମାନ କରାଯାଉଛି । ଶାହାରୁଖ ନିଜର ସିନେମା ‘ଚକ ଦେ ଇଣ୍ଡିଆରେ’ ହକି ପ୍ରଶିକ୍ଷକ ଭୂମିକାରେ ଅଭିନୟ କରିଥିଲେ । ଶାହାରୁଖ ନିଜ ଟ୍ୱିଟ୍ରେ ସମସ୍ତଙ୍କୁ ଭାରତୀୟ ହକି ଦଳକୁ ଉତ୍ସାହିତ କରିବା ପାଇଁ ନିବେଦନ କରିଛନ୍ତି । ସେ ବିଶ୍ୱକପ୍ ହକି ମ୍ୟାଚରେ ସାମିଲ ହେଉଥିବାରୁ ବେଶ୍ ଆନନ୍ଦିତ ବୋଲି ଟ୍ୱିଟ କରିଛନ୍ତି ।
ହକିକୁ ଶାହାରୁଖ ଖୁବ୍ ଭଲ ପାଆନ୍ତି ବୋଲି କହିଛନ୍ତି । ସେ ହକି ଖେଳ ଦେଖନ୍ତି । ଯୁବାବସ୍ଥାରେ ଏହାର ବଡ ପ୍ରଶଂସକ ଥିଲେ ବୋଲି ସୂଚନା ଦେଇଛନ୍ତି । ଭାରତରେ ହକି ବିଶ୍ୱ କପ୍ ଆୟୋଜିତ ହେଉଛି । ଭୁବନେଶ୍ୱରରେ ଏହି ମ୍ୟାଚ ଖେଳାଯିବ । ଏଥିରେ ସେ ଅଂଶ ଗ୍ରହଣ କରିବେ . ଏହା ତାଙ୍କ ପାଇଁ ଏକ ସମ୍ମାନ ବୋଲି ସେ ଉଲ୍ଲେଖ କରିଛନ୍ତି ।
