ଆଇଏନ୍ଏକ୍ସ୍ ମଡିଆ ଦୁର୍ନୀତି ମାମଲାରେ ୫ ଦିନିଆ ସିବିଆଇ ରିମାଣ୍ଡରେ ଗଲେ କାର୍ତ୍ତି ଚିଦାମ୍ବରମ୍
ନୂଆଦିଲ୍ଲୀ: ଆଇଏନ୍ଏକ୍ସ ମିଡିଆ ଦୁର୍ନୀତି ମାମଲାରେ ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ପି ଚିଦାମ୍ବରମଙ୍କ ପୁଅ କାର୍ତ୍ତି ଚିଦାମ୍ବରମ୍କୁ ୫ ଦିନିଆ ରିମାଣ୍ଡରେ ନେବାପାଇଁ ସିବିଆଇକୁ ସ୍ୱତନ୍ତ୍ର ସିବିଆଇ ଅଦଲାତ ଅନୁମତି ଦେଇଛନ୍ତି । କାର୍ତ୍ତିଙ୍କ ବିରୋଧରେ ପ୍ରମାଣ ଥିବା କଥା ସିବିଆଇ କହିଛି । ଏହି ମାମଲାରେ ଥିବା ଅନ୍ୟ ଅଭିଯୁକ୍ତଙ୍କ ସହ ମୁହାଁ ମୁହିଁ ଜେରା ପାଇଁ କାର୍ତ୍ତିଙ୍କ ରିମାଣ୍ଡ ଦରକାର ବୋଲି ସିବିଆଇ ସୂଚନା ଦେଇଥିଲା ।
ପୂର୍ବରୁ କାର୍ତ୍ତିଙ୍କ ଚାଟାର୍ଡ ଆକାଉଣ୍ଟାଣ୍ଟ ଏସ୍ ଭାସ୍କରରମଣଙ୍କୁ ପ୍ରବର୍ତ୍ତନ ନିର୍ଦେଶାଳୟ (ଇଡି) ଗିରଫ କରିଥିଲା । ଆଇଏନଏକ୍ସ ମିଡିଆରେ ବେଆଇନ ଅର୍ଥ କାରବାର ଅଭିଯୋଗରେ କାର୍ତ୍ତିଙ୍କୁ ଗିରଫ କରାଯାଇଛି। କାର୍ତ୍ତିଙ୍କ ଚାଟାର୍ଡ ଆକାଉଣ୍ଟାଣ୍ଟ ଏସ୍ ଭାସ୍କରରମଣଙ୍କୁ ଦିଲ୍ଲୀର ଏକ ଅଦାଲତ ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି । କାର୍ତ୍ତିଙ୍କୁ ଇଡ଼ି ଓ ସିବିଆଇ ପକ୍ଷରୁ ବିଭିନ୍ନ ସମୟରେ ପଚରାଉଚୁରା କରାଯାଇଥିଲା।
ଅଭିଯୋଗ ଅନୁସାରେ ଆଇଏନଏକ୍ସ ମିଡିଆର ବିଦେଶ ନିବେଶକୁ ମଞ୍ଜୁରୀ ଦେବା ନିମନ୍ତେ କାର୍ତ୍ତି ଆଇଏନଏକ୍ସଠାରୁ ୧୦ ଲକ୍ଷ ଟଙ୍କା ଲାଞ୍ଚ ନେଇଥିଲେ । ଏହାଦ୍ୱାରା ଆଇଏନଏକ୍ସକୁ ୪ କୋଟି ଟଙ୍କାର ବିଦେଶ ପୁଞ୍ଜି ନିବେଶର ମଞ୍ଜୁରୀ ମିଳିଥିଲା । କିନ୍ତୁ ଏହାର ଦୁରୁପଯୋଗ କରି ଆଇଏନ୍ଏକ୍ସ ୩୦୫ କୋଟି ଟଙ୍କା ହାତେଇ ନେଇଥିଲା । ଅଭିଯୋଗ ମଧ୍ୟରେ ଆଇଏନ୍ଏକ୍ସ ମିଡିଆ ପ୍ରା.ଲି ମୁମ୍ବଇ ନିର୍ଦେଶକ ଇନ୍ଦ୍ରାଣୀ ମୁଖାର୍ଜୀ, ଆଇଏନ୍ଏକ୍ସ ମିଡିଆ ପ୍ରା.ଲି ନିର୍ଦେଶକ ପିଟର ମୁଖାର୍ଜୀଙ୍କ ନାମ ରହିଛି ।