କଣ୍ଟାମାଳ: ଆଜି ସକାଳୁ ନିଜ ବିଲକୁ କାମ କରି ଯାଇଥିବା ବେଳେ ବିଦ୍ୟୁତ ଆଘାତରେ ସାମାଜିକ କର୍ମୀ ଅମେଲ ରଣାଙ୍କ ଅକାଳ ମୃତ୍ୟୁ ହୋଇଥିବା ଜଣାଯାଇଛି। ବୌଦ୍ଧ ଜିଲ୍ଲା କଣ୍ଟାମାଳବ୍ଳକ ତେତେଲଖୁଣ୍ଟି ଗ୍ରାମର ଅମେଲ (୪୦ବର୍ଷ) ଆଜି ସକାଳୁ ପ୍ରାୟ ୬.୩୦ ମିନିଟ ସମୟରେ ନିଜ ବିଲ କାମ ଦେଖିଯିବା ସହ ଖେତରେ ଧାନତଳି କିଛି ଲଗାଉଥିବା ବେଳେ ଭୂତଳ ନଳକୂପ ପାଇଁ ପୋତା ଯାଇଥିବା ବିଦ୍ୟୁତ ଖୁଣ୍ଟର ସପର୍ଟ ତାର ସଂସ୍ପର୍ଶରେ ଆସି ଘଟଣାସ୍ଥଳରେ ହିଁ ପଡି ଯାଇଥିଲେ।
ନିକଟ ବିଲରେ କାମ କରୁଥିବା ଅନ୍ୟ ଗ୍ରାମବାସୀ ଦେଖି ଘଟଣାସ୍ଥଳକୁ ଆସି ଅମେଲକୁ ମୁର୍ମୁଷ ଅବସ୍ଥାରେ ଉଦ୍ଧାର କରି କଣ୍ଟାମାଳ ସି.ଏଚ.ସିକୁ ଆଣି ଥିଲେ ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଆମେଲର ପତ୍ନୀ ଓ ଏକ ମାତ୍ର ୪ ବର୍ଷର ପୁଅ ଥିବା ଜଣାଯାଇଛି। ଆମେଲ ପ୍ରଥମ ଓଡିଶା ପାଇଁ ହରଭଙ୍ଗା ବ୍ଲକରେ କାର୍ଯ୍ୟ କରୁଥିବା ବେଳେ ଲକ ଡାଉନ ପାଇଁ ଘରକୁ ଆସିଥିଲେ। ସେ ଜଣେ ନିଷ୍ଠାପର ସମାଜସେବୀଭାବେ ଗତ ୨୦ ବର୍ଷ ହେଲା ବିଭିନ୍ନ ଅନୁଷ୍ଠାନରେ କାମ କରିବା ସହ ତାଙ୍କ ନିଜ ତେନ୍ତୁଳିଖୁଣ୍ଟି ଗ୍ରାମର ଯୁବକ ମାନଙ୍କୁ ନେଇ ଗ୍ରାମର ବିକାଶମୂଳକ କାର୍ଯ୍ୟରେ ସାମିଲ ଥିଲେ। ଅମେଲଙ୍କ ଅକାଳ ମୃତ୍ୟୁରେ ଅଞ୍ଚଳରେ ଶୋକର ଛାୟା ଖେଳି ଯାଇଯାଇଛି। ସ୍ଥାନୀୟ ବିଧାୟକ ମହୀଧର ରଣା, କୁମ୍ଭାର ଯୁବା ମଞ୍ଚର ରାଜ୍ୟ ଉପ ସଭାପତି ପ୍ରଶାନ୍ତ ରଣା ପ୍ରମୁଖ ଅମେଲଙ୍କ ମୃତ୍ୟୁରେ ଦୁଃଖ ପ୍ରକାଶ କରିବା ସହ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି। ବିଦ୍ୟୁତ ବିଭାଗର ଅବହେଳା ଯୋଗୁଁ ଅମେଲର ମୃତ୍ୟୁ ହୋଇଥିବାରୁ ତାଙ୍କ ବିଧବା ପତ୍ନୀ ଓ ପୁଅକୁ ଆର୍ଥୀକ ସହାୟତା ଯୋଗାଇ ଦେବାକୁ ବିଭିନ୍ନ ମହଲରୁ ଦାବୀ ହୋଇଛି।
Comments are closed.