କାନପୁର : ଘଣ୍ଟାଘର ଠାରୁ ଟାଟମିଲ ଯାଏଁ ବିଦ୍ୟୁତ ଚାଳିତ ବସ ରବିବାର ବିଳମ୍ବିତ ରାତିରେ ଲୋକଙ୍କ ମୃତ୍ୟୁର କାରଣ ସାଜିଛି। ଉକ୍ତ ବସଟି ପ୍ରାୟ ଛଅରୁ ଅଧିକ ଯାନକୁ ଧକ୍କା ଦେବା ପରେ ୧୫ ଜଣଙ୍କୁ ଧକ୍କା ଦେଇଛି। ଶେଷରେ ଏହା ରାସ୍ତାମଝିରେ ଥିବା ଟ୍ରାଫିକ ପୁଲିସ ଠିଆ ହେଉଥିବା ସ୍ଥାନକୁ ଧକ୍କା ଦେଇଥିଲା। ଦୁର୍ଘଟଣାରେ ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୯ ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରେ କିଛି ଗୁରୁତର ରହିଛନ୍ତି। ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ରାତି ପ୍ରାୟ ସାଢେ ୧୧ଟା ସମୟରେ ଏକ ବିଦ୍ୟୁତ ଚାଳିତ ବସ ଦ୍ରୁତ ଗତିରେ ଘଣ୍ଟାଘର ଠାରୁ ଟାଟମିଲ ଯାଉଥିବା ସମୟରେ ପୋଲ ପାର ହେବା ପରେ ଚାଳକ ବସଟିକୁ ବିପରୀତ ଦିଗରେ ଦ୍ରୁତ ଗତିରେ ଚଳାଇବା ଆରମ୍ଭ କରିଥିଲେ। ସେହି ସମୟରେ ଗୋଟେ ପରେ ଗୋଟେ ଯାନ ସହ ଲୋକଙ୍କ ଉପରେ ଚଢାଇ ଥିଲା। ଖବର ପାଇ ଉଦ୍ଧାରକାରୀ ଦଳ ଓ ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଓ ତଦନ୍ତ ଆରମ୍ଭ କରିଛନ୍ତି। ଉକ୍ତ ବସଟି ପ୍ରଥମେ ୨ଟି କାର, ୨ଟି ବାଇକ,୨ଟି ସ୍କୁଟି,ଏକ ଅଟୋ, ଡମ୍ଫରକୁ ଧକ୍କା ଦେଇଥିଲା। ଦୁର୍ଘଟଣାପରେ ବସ ଚାଳକ ଘଟଣାସ୍ଥଳରୁ ଫେରାର ହୋଇ ଯାଇଛି।
ଏହି ଦୁର୍ଘଟଣାରେ ରାଷ୍ଟ୍ରପତି ରାମନାଥ କୋବିନ୍ଦ ଗଭୀର ଦୁଃଖ ପ୍ରକାଶ କରିଛନ୍ତି। କାନପୁରରେ ହୋଇଥିବା ବସ ଦୁର୍ଘଟଣାରେ ଲୋକଙ୍କ ମୃତ୍ୟୁରେ ସେ ଅତ୍ୟନ୍ତ ଦୁଃଖିତ ଓ ମୃତକଙ୍କ ପ୍ରିୟଜନଙ୍କ ପ୍ରତି ସମବେଦନା ପ୍ରକାଶ କରିଛନ୍ତି। ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି।
