କଲ୍ୟାଣସିଂହପୁର : ନିର୍ବାଚନ ପାଖେଇ ଆସୁଥିବା ବେଳେ ଗାଁ ରେ ବଡ ବଡ ନେତାଙ୍କୁ ଦେଖିବାକୁ ମିଳୁଛି । କିନ୍ତୁ ଗାଁରେ ଦୀର୍ଘ ଦିନର ମୌଳିକ ସମସ୍ୟା ସମାଧାନ କରିନଥିବା ନେତାକୁ ଉଚିତ ଜବାବ ଦେବାକୁ ଏଥର ମନସ୍ଥ କରିଛନ୍ତି ଗାଁ ଲୋକେ। ଏଭଳି କିଛି ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ପଞ୍ଚାୟତ ର କେଶବନାୟକଗୁଡା ଗାଁ ରେ । ରାତି ପାହିଲେ ହାତରେ ଘରା ମାଠିଆ ଧରି ପାଣି ପାଇଁ ଗାଁ ଦାଣ୍ଡରେ ଲାଗୁଛି ଗହଳି । ତାହା ବି ଅସ୍ୱାସ୍ଥ୍ୟ କର ଗୋଳିଆ ପାଣି ପାଇଁ । ଗାଁ ଦାଣ୍ଡରେ ଘରେ ଘରେ ଷ୍ଟାଣ୍ଡ ପୋଷ୍ଟ ଲାଗିଛି କିନ୍ତୁ ଟାଙ୍କି ଏ ଯାଏଁ ନିର୍ମାଣ ହୋଇପାରୁନାହିଁ ।
ସଦର ବ୍ଳକ ଠାରୁ ମାତ୍ର ୩ କିଲୋମିଟର ଦୂରରେ ଏହି ଗାଁ ଅବସ୍ଥିତ । ଗାଁ ରେ ପ୍ରାୟ ୨୫ ପରିବାର ବସବାସ କରନ୍ତି । ଏମାନଙ୍କ ପାଇଁ ପାନୀୟ ଜଳ ଯୋଗାଣ ନିମନ୍ତେ ଅଛି ଗୋଟିଏ ମାତ୍ର ନଳକୂପ । ସେହି ନଳକୂପରେ ହିଁ ପିଇବା ପାଣି ସଂଗ୍ରହ ସେହି ପାଣିରେ ହିଁ ଗାଧୁଆ ଓ ବାସନ ଧୁଆ ଭଳି ସମସ୍ତ କାର୍ଯ୍ୟ କରାଯାଉଛି। କାରଣ ଗ୍ରାମବାସୀଙ୍କ ପାଖରେ ଅନ୍ୟ କୌଣସି ବିକଳ୍ପ ନାହିଁ । ଏହି ଗୋଟିଏ ନଳକୂପ ଉପରେ ନିର୍ଭର କରନ୍ତି ଗାଁର ସମସ୍ତ ଲୋକେ । ଏହି ଅସ୍ୱାସ୍ଥ୍ୟ କର ଗୋଳିଆ ପାଣି ପିଇ ଲୋକେ ଅନେକ ରୋଗରେ ଆକ୍ରାନ୍ତ ହେଉଥିବା ମଧ୍ୟ ଅଭିଯୋଗ କରିଛନ୍ତି ।
ପାନୀୟ ଜଳ ଭଳି ମୌଳିକ ସମସ୍ୟା ଅଭିଯୋଗ ନେଇ ଗାଁ ଲୋକେ ଅନେକ ଥର ପ୍ରଶାସନ ଠାରୁ ଆରମ୍ଭ କରି ସ୍ଥାନୀୟ ନେତାଙ୍କୁ ଗୁହାରି କରିଥିଲେ ମଧ୍ୟ ସମସ୍ୟା ସମାଧାନ ହୋଇପାରିନାହିିଁ । ସେମାନଙ୍କ କଥାକୁ କେହି କର୍ଣ୍ଣପାତ କରୁନଥିବାରୁ ଚଳିତ ନିର୍ବାଚନରେ ଭାଗ ନ ନେବାକୁ ମନସ୍ଥ କରିଛନ୍ତି ଗ୍ରାମବାସୀ। ଯିଏ ତାଙ୍କ ମୌଳିକ ସମସ୍ୟାର ସମାଧାନ କରିବେ ତାଙ୍କୁ ହିଁ ଭୋଟ୍ ଦେବେ ବୋଲି କହିଛନ୍ତି ।
