କଲମପୁର : କଳାହାଣ୍ଡି ଜିଲା ଥୁଆମୁଳ ରାମପୁର ଥାନା ଅଧିନସ୍ଥ କେରପାଇ ପଞ୍ଚାୟତ ନିକଟସ୍ଥ ପିଣ୍ଡାପଦର ନାଳରେ ଏକ ଅଜଣା ବ୍ୟକ୍ତିର ମୃତ ଦେହ ଉଦ୍ଧାର କରାଯାଇଛି। ମୃତଦେହ ପଡିଥିବା କେରପାଇ ସରପଞ୍ଚ ଜାଇସିଂ ମାଝୀ ଥୁଆମୁଳ ରାମପୁର ଥାନାରେ ଲିଖିତ ଅଭିଯୋଗ କରିଛନ୍ତି।
ପ୍ରାପ୍ତ ସୂଚନା ଅନୁସାରେ, କେରପାଇ ପଞ୍ଚାୟତ ଅଧିନସ୍ଥ ପିଣ୍ଡାପଦର ଗ୍ରାମ ନିକଟସ୍ଥ ଏକ ନାଳରେ ଗତ ୪ ଦିନରୁ ଅଧିକ ହେବ ଏକ ଅଜଣା ବ୍ୟକ୍ତିର ମୃତଦେହ ପଡିଥିବା ନେଇ ଗତ ସୋମବାର ଦିନ ସନ୍ଧ୍ୟା ୫ଟା ବେଳେ ପିଣ୍ଡାପଦର ଗ୍ରାମର ରୁପସିଂ ମାଝୀ ଓ କାମ ମାଝୀ କେରପାଇ ସରପଞ୍ଚ ଜାଇସିଂ ମାଝୀଙ୍କୁ ସୂଚନା ଦେଇଥିଲେ। ଏହି ସୂଚନା ପାଇବା ପରେ ସରପଞ୍ଚ ଶ୍ରୀ ମାଝୀ ଘଟଣାସ୍ଥଳକୁ ଯାଇ ଦେଖିବା ପରେ ମଙ୍ଗଳବାର ଦିନ ଥୁଆମୁଳ ରାମପୁର ଭାରପ୍ରାପ୍ତ ଥାନା ଅଧିକାରୀଙ୍କ ନିକଟରେ ସୂଚନା ଦେଇଥିଲେ। ସରପଞ୍ଚଙ୍କ ଠାରୁ ସୂଚନା ପାଇବା ପରେ ମଙ୍ଗଳବାର ଅପରାହ୍ନରେ ଥାନା ଅଧିକାରୀଙ୍କ ନେତୃତ୍ୱରେ ଏକ ପୁଲିସ ଦଳ ଘଟଣାସ୍ଥଳକୁ ଯାଇଛନ୍ତି। ଶବଟି କାହାର ଏପର୍ଯ୍ୟନ୍ତ କୌଣସି ସୂଚନା ମିଳିନଥିବା ବେଳେ ତାର ମୃତ୍ୟୁ ନେଇ ମଧ୍ୟ ସନ୍ଦେହ କରାଯାଉଛି। ବହୁ ଲୋକ ଉକ୍ତ ବ୍ୟକ୍ତି ଜଣକ ରାୟଗଡା ଜିଲା ଅଧିନସ୍ଥ ମୁନିଗୁଡା ଅଞ୍ଚଳର ବୋଲି ଆଲୋଚନା କରୁଥିବା ବେଳେ କୌଣସି କାରଣକୁ ନେଇ ବ୍ୟକ୍ତି ଜଣକଙ୍କୁ ହତ୍ୟା କରାଯାଇଥିବା ସନ୍ଦେହ କରୁଛନ୍ତି।
ଅଞ୍ଚଳଟି ମାଓ ପ୍ରବଣ ଇଲାକା ହୋଇଥିବା କାରଣରୁ ସୁରକ୍ଷା ବଳ ହଠାତ ଘଟଣାସ୍ଥଳରେ ପହଞ୍ଚିବା ସମ୍ଭବ ହୋଇପାରି ନାହିଁ। ଯୋଗାଯୋଗର କୌଣସି ବ୍ୟବସ୍ଥା ନଥିବାରୁ ଘଟଣାର ଦୀର୍ଘ ୪ ଦିନ ପରେ ପୁଲିସକୁ ସୂଚନା ମିଳିଛି। ଅନ୍ୟପଟେ ଘଟଣାକୁ ଚପାଇ ଦେବାର ମଧ୍ୟ ଉଦ୍ୟମ କରାଯାଇଥିବା ସନ୍ଦେହ କରାଯାଉଛି। ତେଣୁ ପୁଲିସ ପ୍ରଶାସନ ଏଥିପ୍ରତି ଗୁରୁତ୍ୱ ଦେଇ ତଦନ୍ତ କରିବା ପାଇଁ ସାଧାରଣରେ ଦାବି ହେଉଛି। ଶବର ୮୦ ପ୍ରତିଶତ ଅଂଶ ପଚିଯାଇଥିବାରୁ ଚିହ୍ନଟ କରିବା ସମ୍ଭବ ହୋଇ ନାହିଁ। ପୁଲିସ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହିତ ଘଟଣା ସମ୍ବନ୍ଧରେ ତଦନ୍ତ ଜାରି ରଖିଛନ୍ତି।
