ଇଣ୍ଟରପୋଲର ରେଡ଼ କର୍ଣ୍ଣର ନୋଟିସର ଅର୍ଥହେଉଛି ଅନ୍ତରାଷ୍ଟ୍ରୀୟ ଗିରଫ ୱାରେଣ୍ଟ । ଏହା ପ୍ରତ୍ୟର୍ପଣ ପ୍ରକ୍ରିୟାରେ ମଧ୍ୟ ଏକ ଅଂଶବିଶେଷ । ପୂର୍ବରୁ ଇଣ୍ଟରପୋଲ ନୀରବ ମୋଦୀ, ତାଙ୍କ ଭାଇ ନେହଲ ମୋଦୀ, ଭଉଣୀ ପୂର୍ବୀଙ୍କ ବିରୋଧରେ ମଧ୍ୟ ରେଡ଼କର୍ଣ୍ଣର ନୋଟିସ ଜାରି କରିଥିଲା । ନୀରବ ଓ ତାଙ୍କ କମ୍ପାନୀ ବିରୋଧରେ ବ୍ୟାଙ୍କର ୧୪ହଜାର କୋଟି ଟଙ୍କାର ଦୁର୍ନୀତି, ଠକେଇ ଅଭିଯୋଗ ହୋଇଛି ଏବଂ ଏହି ମାମଲାର ତଦନ୍ତ ଚାଲିଛି । ନୀରବ ମୋଦୀ ୨୦୧୯ରେ ଲଣ୍ଡନରେ ଗିରଫ ହୋଇଛନ୍ତି ଓ ବର୍ତମାନ ସେଠାରେ ଜେଲରେ ଅଛନ୍ତି । ତାଙ୍କ ବିରୋଧରେ ପ୍ରତ୍ୟର୍ପଣ ମାମଲାର ଶୁଣାଣି ଚାଲିଛି ।
ନୀରବଙ୍କ ସମ୍ପର୍କୀୟ ତଥା ଅନ୍ୟ ଅଭିଯୁକ୍ତ ମେହୁଲ ଚୋକସି ବର୍ତମାନ କ୍ୟାରିବୀୟ ଦ୍ବୀପପୁଞ୍ଜ ଏଣ୍ଟିଗାରେ ରହୁଛନ୍ତି । ତାଙ୍କୁ ସେଠାକାର ନାଗରିକତ୍ବ ମିଳିଛି । ନିଜ ଅସୁସ୍ଥତା ଦର୍ଶାଇ ସେ ଭାରତ ଫେରିବାକୁ ଚାହୁଁନାହାନ୍ତି । ନୀରବ ଓ ମେହୁଲ ଚୋକସି ଉଭୟ ଋଣ ଦୁର୍ନୀତିରେ ଅଭିଯୁକ୍ତ ଅଛନ୍ତି । ସିବିଆଇର ଚାର୍ଜସିଟ୍ ଅନୁସାରେ ନୀରବ ମୋଦୀ ୬୪୯୮.୨ କୋଟି ଓ ମେହୁଲ ଚୋକସି ୭୦୮୦.୮୬ କୋଟି ଟଙ୍କା ଦୁର୍ନୀତି କରିଛନ୍ତି । ଦୁଇ ଅଭିଯୁକ୍ତଙ୍କ ବିରୋଧରେ ୨୦୧୮ରେ ସିବିଆଇ ମାମଲା ରୁଜୁ କରିବା ପୂର୍ବରୁ ଉଭୟ ଭାରତ ଛାଡ଼ି ଫେରାର ହୋଇଯାଇଥିଲେ ।
