ଭାରତ-ରୁଷ ୧୦ ବର୍ଷିଆ ସାମରିକ ସହଯୋଗ ଚୁକ୍ତି ସ୍ୱାକ୍ଷରିତ; ଭାରତରେ ତିଆରି ହେବ ୬ ଲକ୍ଷ କଲସନିକୋଭ ଆସଲ୍ଟ ରାଇଫଲ

ନୂଆଦିଲ୍ଲୀ: ସୋମବାର ସଂଧ୍ୟାରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରୁଷ ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ମଧ୍ୟରେ ଶିଖର ବୈଠକ ଆୟୋଜନ ପୂର୍ବରୁ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ବୈଦେଶିକ ମନ୍ତ୍ରୀ ଏସ ଜୟଶଙ୍କର ସେମାନଙ୍କ ରୁଷ ପ୍ରତିପକ୍ଷଙ୍କ ସହିତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଛନ୍ତି । ସୂଚନାଯୋଗ୍ୟ ଯେ ଆଜି ମୋଦି ଓ ପୁତିନଙ୍କ ମଧ୍ୟରେ ଏକବିଂଶତମ ଭାରତ-ରୁଷ ବାର୍ଷିକ ଶିଖର ବୈଠକ ଅନୁଷ୍ଠିତ ହେବ । ୨୦୧୯ ବ୍ରିକ ସମ୍ମିଳନୀ ପରବର୍ତ୍ତୀ ସମୟରେ ଦୁଇ ନେତାଙ୍କ ମଧ୍ୟରେ ଏହା ଶାରୀରିକ ଉପସ୍ଥିତିରେ ପ୍ରଥମ ସମ୍ମୁଖ ବୈଠକ ହେବ । ତାହା ପୂର୍ବରୁ ରାଜନାଥ ସିଂ ଏବଂ ଏସ ଜୟଶଙ୍କର ରୁଷର ପ୍ରତିରକ୍ଷା ମନ୍ତ୍ର ଜେନେରାଲ ସର୍ଗି ଶୋୟିଗୁ ଏବଂ ବୈଦେଶିକ ମନ୍ତ୍ରୀ ସର୍ଗି ଲାଭରୋଭଙ୍କ ସହିତ ବୈଠକରେ ମିଳିତ ହୋଇଥିଲେ । ଏହି ଅବସରରେ ଆଫଗାନିସ୍ତାନ, ଚୀନ ଏବଂ ଆତଙ୍କବାଦଜନିତ ବର୍ଦ୍ଧିତ ବିପଦ ଏବଂ ସାମଗ୍ରିକ ଭାବରେ ବିଶ୍ୱ ପରିସ୍ଥିତି ଭଳି ବିଭିନ୍ନ ପ୍ରସଙ୍ଗ ଆଲୋଚନାରେ ସ୍ଥାନ ପାଇଥିବା କୁହାଯାଉଛି । ଏହି ଅବସରରେ ଭାରତ ଏବଂ ରୁଷ ମଧ୍ୟରେ କଲସନିକୋଭ ରାଇଫଲ ଚୁକ୍ତି ସ୍ୱାକ୍ଷରିତ ହୋଇଥିଲା । ଏଥିସହିତ ଦୁଇଦେଶ ମଧ୍ୟରେ ୧୦ ବର୍ଷିଆ ପ୍ରତିରକ୍ଷା ସହଯୋଗ ରାଜିନାମା ମଧ୍ୟ ସ୍ୱାକ୍ଷରିତ ହୋଇଥିବା ଜଣାଯାଇଛି । ରୁଷ ସହିତ ଚୁକ୍ତି ସ୍ୱାକ୍ଷରିତ ହେବା ପରେ ସଂପ୍ରତି ଭାରତରେ ୬ ଲକ୍ଷ କଲସନିକୋଭ ଆସଲଟ ରାଇଫଲ ଭାରତରେ ତିଆରି କରାଯିବ ।
ଏହି ଅବସରରେ ପ୍ରକାଶ କରି ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଥିଲେ ଯେ ପ୍ରତିରକ୍ଷା ସହଯୋଗ ଦୁଇଦେଶ ମଧ୍ୟରେ ସହଭାଗିତାର ସବୁଠାରୁ ଗୁରୁତ୍ୱପୂର୍ଣ୍ଣ ସ୍ତମ୍ଭ ଭାବରେ ବିବେଚିତ ହେଉଛି । ଭାରତ-ରୁଷ ସହଭାଗିତା ଏହି ଅଞ୍ଚଳରେ ଶାନ୍ତି ପ୍ରତିଷ୍ଠା ସହିତ ସ୍ଥିରତା ଆଣିଦେବ ବୋଲି ଶ୍ରୀ ସିଂ ଆଶା ପ୍ରକାଶ କରିଥିଲେ ।