ଧଳାଜହର କବଳରେ ଯୁବପିଢି, ବୃଦ୍ଧି ପାଉଛି ଅସାମାଜିକ କାର୍ଯ୍ୟ

ବେଗୁନିଆ : ବେକାରୀ ସମସ୍ୟା ଏବଂ ରାତାରାତି କୋଟିପତି ହେବାର ନିଶା ଲାଗି ବର୍ତ୍ତମାନ ଗାଁ ଗହଳି, ବଜାରଘାଟ ଓ ଛକ ଜାଗା ମାନଙ୍କରେ ବ୍ରାଉନ ସୁଗାର କାରବାର ଅହେତୁକ ବୃଦ୍ଧି ପାଇବାରେ ଲାଗିଛି । ଧଳାଜହର ସେବନ କରିବା ଫଳରେ ପକ୍ଷରିବାରିକ ହିଂସା, ଅଶାନ୍ତି, ଗଣ୍ଡଗୋଳ ଏବଂ ଲୁଟ ତରାଜ ବଢ଼ୁଥିବାବେଳେ ଧଳା ଜହର ଖାଉଥିବା ବ୍ୟକ୍ତିଟି ସର୍ବସ୍ୱାନ୍ତ ହେଉଛନ୍ତି। ଏମିତି ବି ଶୁଣିବାକୁ ମିଳୁଛି ଘରେ ଘରେ କିଛି ମହିଳା ମଧ୍ୟ ପୁରୁଷମାନଙ୍କ ସହିତ ଏହି ବେପାର କରିବାକୁ ଲାଗିଲେଣି । ତେଣୁ ଗାଁ ଗହଳିରେ ଏବେ ପାଉର ଚାହିଦା ବଢ଼ିବାରେ ଲାଗିଛି । ଏହାକୁ ସେବନ କରି ପଥଭ୍ରଷ୍ଟ ହେଉଥିବା ଯୁବପିଢି ବିଭିନ୍ନ ସମୟରେ ବହୁ ଅନୈତିକ କାର୍ଯ୍ୟ କରିବାକୁ ପଛାଉ ନାହାନ୍ତି । ଏହି ବେପାର ଏଅଂଚଳରେ ଏତେ ମାତ୍ରାରେ ବଢିଯାଇଛି ଯେ ଅବକାରୀ ବିଭାଗ ଏବଂ ପୁଲିସ ବିଭାଗକର୍ମଚାରୀମାନେ ତାର ଟେର ପାଉନାହାନ୍ତି । କିଛି ଦୋକାନ ଏବଂ ଜନଗହଳି ପୂର୍ଣ ସ୍ଥାନରେ ସିଗାରେଟ ଏବଂ ଦିଆସିଲ ଖୋଳରେ ପୁଡ଼ିଆ କରାଯାଇ ଗ୍ରାହକଙ୍କୁ ବିକ୍ରି କରାଯାଉଛି । ଗାଁ ଗହଳିରେ ଯେଉଁ ଯୁବକ ମାନେ ଦିନେ ବ୍ୟବସାୟ କରି ଭଲ ଦୁଇ ପଇସା ରୋଜଗାର କରୁଥିଲେ ସେମାନେ ଧଳା ଜହର କବଳରେ ପଡି କାଙ୍ଗାଳ ହୋଇ ଘରେ ବସି ବାପା ,ମାଙ୍କ ଉପରେ ବୋଝ ପଲଟିଥିବାର ଦେଖିବାକୁ ମିଳୁଛି । ତେଣୁ ଲୋକମାନେ ସଚେତନ ହୋଇ ମିଳିତ ଭାବେ ଏହାର ପ୍ରତିବାଦ କଲେ ଏହି ବେପାର ଗାଁ ଗହଳିରୁ ଦୂର ହେବା ସହ ଏକ ସୁସ୍ଥ ପରିବେଶ ସୃଷ୍ଟି ହୋଇପାରିବ ବୋଲି ବୁଦ୍ଧିଜୀବୀମାନେ ଆଶା ପ୍ରକଟ କରିଛନ୍ତି।