ନୂଆଦିଲ୍ଲୀ: ଆମେରିକୀୟ ଡଲାର ତୁଳନାରେ ପାକିସ୍ତାନର ମୁଦ୍ରା ରେକର୍ଡ ସ୍ତରକୁ ଖସି ଆସିଛି। ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନକୁଁ ଦୁର୍ବଳ ମୁଦ୍ରା ଆହୁରି ସଙ୍କଟ ମଧ୍ୟକୁ ଠେଲି ଦେଇଛି। ଦେଶର ଏହି ଆର୍ଥିକ ସ୍ଥିତି ପାଇଁ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ଦାୟୀ କରି ତାଙ୍କ ଇସ୍ତଫା ଦାବି କରିଛି ବିରୋଧୀ ଦଳ।
ପାକିସ୍ତାନର ବିରୋଧୀ ଦଳ ପାକିସ୍ତାନ ମୁସଲିମ ଲିଗ୍ ମୁଖ୍ୟ ନୱାଜ୍ ସରିଫଙ୍କ ଅଭିଯୋଗ ଅନୁଯାୟୀ, ଆନ୍ତର୍ଜାତିକ ମୁଦ୍ରାପାଣ୍ଠିରୁ ଋଣ ନେବା ପାଇଁ ଇମ୍ରାନ୍ ଗୋପନୀୟ ଭାବେ ଆଇଏମଏଫର ସର୍ତ୍ତକୁ ମାନି ନେଇଛନ୍ତି। ତେଣୁ ପାକିସ୍ତାନ ଅର୍ଥବ୍ୟବସ୍ଥାରେ ଏହି ସ୍ଫଳନ ଦେଖାଦେଇଛି। ଏ ସମ୍ପର୍କରେ ଇମ୍ରାନ୍ ଦେଶବାସୀଙ୍କୁ ଅନ୍ଧାରରେ ରଖିଥିବାରୁ ସେ ଇସ୍ତଫା ଦେବା ଉଚିତ।
ପାକିସ୍ତାନ ମୁଦ୍ରା ଶୁକ୍ରବାର ଦିନ ପ୍ରତି ଆମେରିକୀୟ ଡଲାର ତୁଳନାରେ ୧୪୪ ଅତିକ୍ରମ କରିଥିଲା। ଅଦ୍ୟାବଧି ଆମେରିକୀୟ ଡଲାର ତୁଳନାରେ ପାକ୍ ମୁଦ୍ରା ଏତେ ନିମ୍ନ ସ୍ତରକୁ ଖସି ନଥିଲା। ଇମ୍ରାନ୍ ସରକାରଙ୍କ ୧୦୦ଦିନର ଉପଲବ୍ଧି ପାଳନର ମାତ୍ର ଗୋଟିଏ ଦିନ ପରେ ପାକ୍ ମୁଦ୍ରା ରେକର୍ଡ଼ ପରିମାଣରେ ହ୍ରାସ ପାଇଥିଲା।
