ହରଭଙ୍ଗା: ଶିଳ୍ପ ବିହୀନ ବୌଦ୍ଧଜିଲ୍ଲାର ହରଭଙ୍ଗା ତହସିଲ ଅଂଚଳରେ ଗଢି ଉଠିଥିବା ବେଆଈନ କ୍ରସର ସାଙ୍ଗକୁ ପଥର ଉତୋଳନ ବିରୋଧରେ ଆନ୍ଦୋଳନ ତେଜିବାରେ ଲାଗିଛି।ବେଆଈନ ପଥର ଉତୋଳନ ଏବଂ କ୍ରସର ବନ୍ଦ ବିରୁଦ୍ଧରେ ଖରଭୁଇଁ ଗ୍ରାମର ସ୍ୱୟଂ ସହାୟକ ମହିଳା ଗୋଷ୍ଠି ଏବଂ ଗାଁ ଲୋକେ ବଜ୍ର ଶପଥ ନେଇଥିବା ସୂଚନା ମିଳିଛି। ପ୍ରକାଶ ଯେ ଏହି ତହସିଲ ଅର୍ନ୍ତଗତ ଛତ୍ରଙ୍ଗ ପଂଚାୟତର ଖରଭୂଇଁ ଅଂଚଳରେ ଚାରି ଚରୋଟି ପଥର କୁଆଁରୀ ସହିତ କ୍ରସର ଶିଳ୍ପ ଚାଲୁ ରହିଛି। ବେଆଈନ ପଥର ଉତୋଳନ ଏବଂ କ୍ରସର ଶୀଳ୍ପ ଯୋଗୁଁ ଜଙ୍ଗଲ ଭଳି ପ୍ରାକୃତିକ ସମ୍ପଦ ଧ୍ୱଂସ ହେବାକୁ ବସିଛି। ମାଇନର ମିନେରାଲ ନାଁରେ ବଡ ବଡ ବିସ୍ଫୋରଣରେ ବେଆଈନ ଭାବେ ପଥର ଉତୋଳନ କରାଯାଉଥିବାରୁ ସ୍ଥାନୀୟ ଲୋକେ ପ୍ରତିଦିନ ମୃଦୁ ଭୂକମ୍ପ ଅନୁଭବ କରୁଛନ୍ତି।
ବିସ୍ଫୋରଣରେ ଘରଦ୍ୱାର ଫାଟି ଯାଉଥିବା ବେଳେ ପ୍ରଶାସନ ପକ୍ଷରୁ ଗୋଟିଏ ପରେ ଗୋଟିଏ ପଥର କୁଆଁରୀ ଲିଜ ଦେଇ ଗାଁ ଲୋକଙ୍କ ଜୀବନ ସହ ଖେଳୁଥିବା ଅଭିଯୋଗ ହେଉଛି। କ୍ରସର ପ୍ରଦୂଷଣ ଯୋଗୁଁ କିଡନୀ ଭଳି ମହାମାରୀ ରୋଗ ମଧ୍ୟ ବୃଦ୍ଧି ପାଉଛି।କ୍ରସର ଶୀଳ୍ପ ନାଁରେ ଗଢିଉଠିଥିବା ବିନାଶକାରୀ ଶିଳ୍ପକୁ ବନ୍ଦ କରିବା ଜିଦ୍ରେ ଗାଁ ଲୋକେ ସାମୁହିକ ଭାବେ ବଜ୍ର ଶପଥ କରିବା ସହିତ କୌଣସି ପରିସ୍ଥିତିରେ ଏଭଳି ଶିଳ୍ପକୁ ଆଉ ଚାଲିବାକୁ ଦିଆଯିବନି ବୋଲି ଚେତାବନୀ ଦେଇଛନ୍ତି। ଆସନ୍ତାକାଲି ଏ ସର୍ମ୍ପକରେ ବୌଦ୍ଧ ଜିଲ୍ଲାପାଳ, ଅତରିକ୍ତ ଜିଲ୍ଲାପାଳ, ହରଭଙ୍ଗା ତହସିଲଦାରଙ୍କ ନିକଟରେ ଲିଖିତ ଅଭିଯୋଗ ପାଇଁ ଗ୍ରାମବାସୀ ପ୍ରସ୍ତୁତ ହେଉଥିବା ସୂଚନା ମିଳିଛି।
