ହରଭଙ୍ଗା: ବୌଦ୍ଧଜିଲ୍ଲା ହରଭଙ୍ଗା ବ୍ଲକ ସଦରମହକୁମା ଚାରିଛକଠାରେ ନୂତନଭାବେ ନିର୍ମାଣ ହୋଇଥିବା ହରଭଙ୍ଗା ଅବକାରୀ ଥାନା କାର୍ଯ୍ୟାଳୟ କାର୍ଯ୍ୟକ୍ଷମ ବିଳମ୍ବ ହେଉଛି। ନୂତନ କୋଠାଘର ନିର୍ମାଣର ବର୍ଷେ ପରେ ବି ଘର ମୁକୁଳା ପଡିଥିବାରୁ ନୂଆ ଘର ଏବେ ଅସାମାଜିକ ଲୋକଙ୍କ ଆଡ୍ଡାସ୍ଥଳୀ ପାଲଟିଥିବା ଦେଖିବାକୁ ମିଳିଛି। ସୂଚନା ମତେ ହରଭଙ୍ଗା ଅବକାରୀ ଥାନାର ନିଜସ୍ୱ କାର୍ଯ୍ୟାଳୟ ନଥିବାରୁ ଏହା ଦୀର୍ଘବର୍ଷ ହେଲା ଅସ୍ଥାୟୀ ଭାବେ ଏକ ଭଡାଘରେ ଅଫିସ ଚାଲିଆସୁଛି। ଏହାକୁ ଦୃଷ୍ଟିରେ ରଖି ଜିଲ୍ଲା ଗ୍ରାମ୍ୟ ଉନ୍ନୟନ ବିଭାଗ ଜରିଆରେ ଲକ୍ଷ ଲକ୍ଷ ଟଙ୍କା ବ୍ୟୟବରାଦରେ ହରଭଙ୍ଗା ଅବକାରୀ କାର୍ଯ୍ୟାଳୟ ନୂତନ କୋଠାଘର ନିର୍ମାଣ କରାଗଲା। ମାତ୍ର ନିର୍ମାଣ ଶେଷ ପରେ ବିଭାଗକୁ କୋଠାଘର ହସ୍ତାନ୍ତର କରାନଯାଇ ତରବରିଆ ଭାବେ ଗତ ବର୍ଷେ ତଳେ ବୌଦ୍ଧ ଜିଲ୍ଲାପାଳଙ୍କ ଦ୍ୱାରା ଏହାର ଶୁଭ ଉଦଘାଟନ କରାଯାଇଥିଲା।
ଉଦ୍ଘାଟନ କାର୍ଯ୍ୟକ୍ରମ ଶେଷ ପରେ ବି ଏହାର ବିଦ୍ୟୁତ୍ ସଂଯୋଗ କାର୍ଯ୍ୟ ବାକିଥିବାରୁ ନୂତନ କାର୍ଯ୍ୟାଳୟ ହସ୍ତାନ୍ତରରେ ଅହେତୁକ ବିଳମ୍ବ ଦେଖାଦେଇଛି। ଯାହା ଫଳରେ ହରଭଙ୍ଗା ଅବକାରୀ କାର୍ଯ୍ୟାଳୟ କେବେ ଖୋଲିବ ତାକୁ ନେଇ ଆଶଙ୍କା ଦେଖାଦେଇଛି। ସରକାରୀ ଘର ନିର୍ମାଣ ପରେ ବି ସ୍ଥାୟୀଭାବେ ହରଭଙ୍ଗା ଅବକାରୀ କାର୍ଯ୍ୟାଳୟ କାର୍ଯ୍ୟକ୍ଷମ ନ ହେବା ପରୋକ୍ଷରେ ନିଶାଦ୍ରବ୍ୟ କାରବାରକୁ ବୃଦ୍ଧି କରିବାରେ ସହାୟକ ହେଉଛି। ଏଥିପ୍ରତି ବିଭାଗୀୟ ଉଚ୍ଚ କତୃପକ୍ଷ ଦୃଷ୍ଟି ଦେବା ସହ ତୁରନ୍ତ ଏହାକୁ କାର୍ଯ୍ୟକ୍ଷମ କରିବା ପାଇଁ ଦାବୀ ଜୋରଧରିଛି।
Comments are closed.