ଗୋଲାପ ଫୁଲ ଦେଖିବାକୁ ସୁନ୍ଦର ହୋଇଥିବା ବେଳେ ଏହାର ବାସ୍ନା ମଧ୍ୟ ମନମୁଗ୍ଧକର। ତେବେ ଉତ୍ତରାଖଣ୍ଡରେ ଚାଷ ହେଉଥିବା ‘ଦାମସ୍କ’ ନାମକ ଏକ ଗୋଲାପରୁ ବାହାରୁ ଥିବା ତେଲର ଦାମ୍ ଶୁଣିଲେ ଯେ କେହି ଆଶ୍ଚର୍ଯ୍ୟ ହୋଇଯିବ। ଦାମସ୍କ ଗୋଲାପ ତେଲର ଦାମ୍ ଲିଟର ପିଛା ଅନ୍ତର୍ଜାତୀୟ ବଜାରରେ ୧୨ରୁ ୧୩ ଲକ୍ଷ ଟଙ୍କା ରହିଛି। ଉତ୍ତରାଖଣ୍ଡର ପାର୍ବତ୍ୟାଞ୍ଚଳରେ ଏହି ଗୋଲାପ ଫୁଲ ଚାଷ କରାଯାଉଛି। ଉତ୍ତରାଖଣ୍ଡ କୃଷି ବିଭାଗର ବରିଷ୍ଠ ଅଧିକାରୀଙ୍କ କହିବାନୁଯାୟୀ ଏହି ଗୋଲାପ ପ୍ରଜାତିର ଚାଷ ପ୍ରାୟ ୧୨ ବର୍ଷ ତଳେ ଆରମ୍ଭ ହୋଇଥିଲା। ଏହି ଗୋଲାପର ଉତ୍ପତ୍ତି ସିରିୟାର ରାଜଧାନୀ ଦାମାସକସ୍ରେ ହୋଇଥିଲା। ତାହାର ନାମ ଅନୁଯାୟୀ ଏହି ଗୋଲାପର ନାମକରଣ ହୋଇଛି। ମୋଗଲ ଶାସନ ସମୟରେ ଏହି ଗୋଲାପ ଭାରତକୁ ଆସିଥିଲା। ପ୍ରଥମେ ଉତ୍ତରପ୍ରଦେଶର ହାଥରସ ଜିଲାରେ ଏହି ଗୋଲାପ ଫୁଲ ଚାଷ କରାଯାଉଥିଲା।ତେବେ ଜଳବାୟୁ ପରିବର୍ତ୍ତନଜନିତ ପରିସ୍ଥିତି ଯୋଗୁଁ ସେଠାରେ ଉତ୍ପାଦନ କମି ଯାଇଥିଲା।
ଅନ୍ୟପକ୍ଷରେ ଉତ୍ତରାଖଣ୍ଡ ଜଳବାୟୁ ଏହି ଗୋଲାପ ଫୁଲ ଚାଷ ପାଇଁ ଅନୁକୂଳ ହୋଇଥିବାରୁ ଜୋଷୀମଠ ଓ ଅଲ୍ମୋଡ଼ା ଆଦି ଅଞ୍ଚଳର ଏହାର ଚାଷ ହେଉଛି। ଏହି ଗୋଲାପର ତେଲ ବ୍ୟବହାର କରାଯାଇ ନାନା ପ୍ରକାର ସୁଗନ୍ଧିତ ଦ୍ରବ୍ୟ, ପ୍ରସାଧନ ସାମଗ୍ରୀ ଆଦି ପ୍ରସ୍ତୁତ କରାଯାଇଥାଏ। ଏଥିରେ ଔଷଧୀୟ ଗୁଣ ରହିଥିବାରୁ ଏହାର ଦାମ୍ ବହୁତ ଅଧିକ। ଏହି ଅଞ୍ଚଳର ବହୁଚାଷୀ ହେକ୍ଟର ହେକ୍ଟର ଜମିରେ ଏହି ଗୋଲାପ ଚାଷ କରି ଆର୍ଥିକ ଦୃଷ୍ଟିରୁ ସ୍ବଚ୍ଛଳ ହୋଇ ପାରିଛନ୍ତି।
