ଲୁଧିଆନା/ହୋଶିଆରପୁର(ପଞ୍ଜାବ): ପଞ୍ଜାବର ପଠାନକୋଟ ନିକଟରେ ଏକ ଅଦ୍ଭୁତ ଘଟଣା ସାମ୍ନାକୁ ଆସିଛି। ବିନା ଚାଳକରେ ଦୌଡ଼ିଲା ମାଲ୍ଗାଡ଼ି। ସେ ବି ପୁଣି ଘଣ୍ଟା ପ୍ରତି ୭୦ କିମି ବେଗରେ। ଯେଉଁଥିପାଇଁ ରେଳ ବିଭାଗ କର୍ମଚାରୀଙ୍କୁ ନାକେଦମ୍ ହେବାକୁ ପଡ଼ିଛି। ଜମ୍ମୁର କାଠୁଆ ଷ୍ଟେସନରେ ଠିଆ ହୋଇଥିବା ଏକ ମାଲ୍ଗାଡ଼ି ହଠାତ୍ ପଠାନ୍କୋଟ୍ ଆଡ଼କୁ ଗଡ଼ିବାକୁ ଲାଗିଲା। ଆଶ୍ଚର୍ଯ୍ୟକର କଥା ହେଉଛି, ଗାଡ଼ିରେ କେହି ଚାଳକ ନଥିଲେ। ଦୀର୍ଘ ସମୟର ଉଦ୍ୟମ ପରେ ଟ୍ରେନକୁ ହୋଶିଆରପୁରର ଉଁଚି ବସ୍ସି ନିକଟରେ ଅଟକା ଯାଇଥିଲା। ଚାଳକ ବିନା ଚାଲୁଥିବା ମାଲ୍ବାହୀ ଟ୍ରେନ୍ ବିଷୟରେ ଲୋକଙ୍କୁ ସଚେତନ କରିବା ପାଇଁ ଷ୍ଟେସନରେ ଘୋଷଣା କରି ରେଳଧାରଣା ଖାଲି କରିବାକୁ ଏକ ନିବେଦନ କରାଯାଇଥିଲା। ମିଳିଥିବା ସୂଚନା ମୁତାବକ, ଉଁଚି ବସ୍ସିରେ ବିଦ୍ୟୁତ୍ ଯୋଗାଣ ବନ୍ଦ କରି ଟ୍ରେନକୁ ଅଟକାଯାଇଥିଲା, ଯାଦ୍ବାରା ଏକ ବଡ଼ ଅଘଟଣ ଟଳିଯାଇଛି। ରେଳ ବିଭାଗ ଘଟଣାର ତଦନ୍ତ ଚଳାଇଛି।
A Freight Train was standing at Kathua Station in Jammu.
Suddenly, it started running WITHOUT the PILOT 😵
Train drove for 80+ kms WITHOUT any DRIVER.
Train was stopped near Ucchi Bassi in Mukerian, Punjab.
Now,@RailMinIndia has initiated an inquiry.pic.twitter.com/AkE13dDnVj
— Shashank Shekhar Jha (@shashank_ssj) February 25, 2024
ସୂଚନା ଅନୁସାରେ, ରବିବାର ସକାଳ ପ୍ରାୟ ସାଢେ ୭ଟା ସମୟରେ ମାଲ୍ବାହୀ ଟ୍ରେନଟି କାଠୁଆରୁ ହୋଶିଆରପୁରର ଉଁଚି ବସ୍ସି ପର୍ଯ୍ୟନ୍ତ ଘଣ୍ଟା ପ୍ରତି ୭୦ କିମି ବେଗରେ ଦୌଡ଼ିଥିଲା। ଏ ବିଷୟରେ ସୂଚନା ପାଇ ରେଳ ଅଧିକାରୀମାନେ ଆଶ୍ଚର୍ଯ୍ୟ ହେବା ସହ ତୁରନ୍ତ ଏହାକୁ ଅଟକାଇବାକୁ କଠୋର ଉଦ୍ୟମ କରିଥିଲେ। ତେବେ ବହୁ ସଂଘର୍ଷ ପରେ ଅଧିକାରୀମାନେ ଟ୍ରେନ୍କୁ ଅଟକାଇବାରେ ସଫଳ ହୋଇଥିଲେ।
ଅଧିକାରୀମାନେ ପ୍ରଥମେ ଏହାକୁ ପଠାନ୍କୋଟ୍ରେ ଅଟକାଇବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ। ସତର୍କତାମୂଳକ ପଦକ୍ଷେପ ଭାବରେ ପଠାନକୋଟ ରେଳ ଷ୍ଟେସନରେ ଲାଇନ୍ ଖାଲି କରାଯାଇଥିଲା। ଏହା ବ୍ୟତୀତ ପଠାନକୋଟକୁ ଯାଉଥିବା ସମସ୍ତ ଟ୍ରେନ୍ ଅଟକାଯାଇଥିଲା। ଏହାପରେ ମାଲଗାଡ଼ିକୁ ମୁକେରିୟାଁ ନିକଟରେ ମଧ୍ୟ ଅଟକାଇବାକୁ ଚେଷ୍ଟା କରାଯାଇଥିଲା, ହେଲେ କୌଣସି ସୁଫଳ ମିଳି ନଥିଲା। ଶେଷରେ ବହୁ ଉଦ୍ୟମ ପରେ ଉଁଚି ବସ୍ସି ନିକଟରେ ଟ୍ରେନ୍ ଅଟକିବା ପରେ ଅଧିକାରୀମାନେ ଦୀର୍ଘ ନିଃଶ୍ୱାସ ମାରିଥିଲେ।
