ଗଞ୍ଜାମ : ଗଞ୍ଜାମ ରେଳ ଷ୍ଟେସନରେ ଗତ କୋଭିଡ ସମୟରୁ ରହଣି ବନ୍ଦ ରହିଥିବା ଦୁଇଟି ଦ୍ରୁତଗାମୀ ଟ୍ରେନ ପୁନଃ ରହଣି ଦାବୀ ନେଇ ଆସନ୍ତା ୨ ତାରିଖରୁ ଗଞ୍ଜାମ ରେଳ ଷ୍ଟେସନରେ ଧାରଣା ପାଇଁ ନିଷ୍ପତ୍ତି ହୋଇଥିବା ଜଣାପଡିଛି। ସୋମବାର ଏନେଇ ଗଞ୍ଜାମ ପୌରାଞ୍ଚଳ ବରିଷ୍ଠ ନାଗରିକ ପରିଷଦ କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦିଆଯାଇଛି।
ସୂଚନା ଯୋଗ୍ୟ ଯେ, କୋଭିଡ ସମୟରେ ପୁରୀ-ତିରୁପତି ଓ ଭୁବନେଶ୍ୱର-ଜଗଦଳପୁର ଦୁଇ ଦ୍ରୁତଗାମୀ ଟ୍ରେନ ରହଣିକୁ ଗଞ୍ଜାମ ଷ୍ଟେସନରେ ବାତିଲ କରିଦିଆଯାଇଛି। ଫଳରେ ଅଂଚଳବାସୀ ରେଳରେ ଯାତାୟତ ପାଇଁ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଏହି ସମସ୍ୟା ଯୋଗୁଁ ବିଭିନ୍ନ ମହଲରେ ଘୋର ଅସନ୍ତୋଷ ପ୍ରକାଶ ପାଇଛି। ଏନେଇ ଅନେକ ଥର ରେଳ କର୍ତ୍ତୃପକ୍ଷଙ୍କୁ ଅବଗତ କରାଯାଉଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ। ଫଳରେ ବାଧ୍ୟ ହୋଇ ଗଞ୍ଜାମ ପୌରାଞ୍ଚଳ ବରିଷ୍ଠ ନାଗରିକ ପରିଷଦ ପକ୍ଷରୁ ଏକ ସମ୍ବାଦିକ ସମିଳନୀରେ ଆସନ୍ତା ଅକ୍ଟୋବର ୨ ତାରିଖରେ ଗଞ୍ଜାମ ରେଳ ଷ୍ଟେସନରେ ପୂର୍ବାହ୍ନ ୧୦ ଘଣ୍ଟାଠାରୁ ପ୍ରତୀକ ଧାରଣା ଦିଆଯିବା ନେଇ ଅବଗତ କରାଯାଇଛି। ଏହି ସମ୍ବାଦିକ ସମ୍ବିଳନୀରେ ଅନୁଷ୍ଠାନର ସଭାପତି ଲିଙ୍ଗରାଜ ପଟନାୟକ, ସମ୍ପାଦକ ଗୌରୀ ଶଙ୍କର ପାଢ଼ୀ, ବିନୋଦ ଚନ୍ଦ୍ର ମହାପାତ୍ର, କିଶୋର ମହାପାତ୍ର, ତ୍ରିନାଥ ପାଣିଗ୍ରାହୀ, ଉଦୟ ନାଥ ରାଉଳ, ଗୋପାଳ ପଣ୍ଡା, ପତିତ ପାବନ ମହାପାତ୍ର, ରବିନ୍ଦ୍ର କୁମାର ପଣ୍ଡା, ଅରୁଣ କୁମାର ପଣ୍ଡା, ପଦ୍ମ ଚରଣ ପାଢ଼ୀ ପ୍ରମୁଖ ବରିଷ୍ଟ ନାଗରିକଙ୍କ ସହ ଅନ୍ୟମାନେ ଉପସ୍ଥିତ ରହିଥିଲେ। ଏହି ଧାରଣା ରେ ସହର ଅନ୍ୟ ବିଭିନ୍ନ ସଂଗଠନ ଯୋଗ ଦେବା ପାଇଁ ପରିଷଦ ପକ୍ଷରୁ କୁହାଯାଇଛି।
