ଗୁଣପୁର: ଦରିଦ୍ରତା କଷାଘାତରେ ଆଉଟୁପାଉଟୁ ହେଉଥିବା ଜଣେ ବ୍ୟକ୍ତିଙ୍କୁ ଦାଉ ସାଧିଛି ଦଇବ। ଏଭଳି ଏକ ଘଟଣା ଦେଖିବାକୁ ମିଳିଛି ଗୁଣପୁର ସହରର ପାଲିଆ ଢେପସାହିର ଗଣେଶ ମାଳି (୪୫)ଙ୍କ କ୍ଷେତ୍ରରେ।
ଗଣେଶ ଗତ ଏକବର୍ଷ ତଳେ ପକ୍ଷାଘାତର ଶିକାର ହୋଇଥିଲେ । ପରିବାର ଲୋକ ଆର୍ଥିକ ଅନଟନ ଯୋଗୁ ଠିକ ଚିକିତ୍ସା ଯୋଗାଇ ପାରି ନ ଥିଲେ । ସେ ନିଜେ ଜଣେ ମାତ୍ର ରୋଜଗାରିଆ ପୁଅ ଥିଲେ । ବିବାହର ୫ ବର୍ଷ ପରେ ଏଭଳି ପକ୍ଷାଘାତ ହେବାପରେ ନିଜ ସ୍ତ୍ରୀ ଛୁଆକୁ ରୋଗୀଣା ବାପାଙ୍କ ପାଖରେ ଛାଡି ଚାଲିଯାଇଛି । ଗଣେଶଙ୍କ ମା’ ବୟସାଧିକ କାରଣରୁ ରୋଗରେ ପଡି ଶଯ୍ୟାଶାୟୀ ଥିବାବେଳେ ଘରେ ଥିବା ଦୁଇଜଣ ଅବିବାହିତ ଭଉଣୀ ଘରୋଇ ଟିଉସନ କରି ବହୁ କଷ୍ଟରେ ଦିନ କାଟୁଛନ୍ତି । ବାପା ପୁଲିସ ସିପାହୀ ଭାବେ କାର୍ଯ୍ୟ କରି ଅବସର ନେବାପରେ ମୃତ୍ୟୁବରଣ କରିଥିବାରୁ ପେନସନଭୋଗୀ ଦର୍ଶାଇ ଆୟୁଷ୍ମାନ କାର୍ଡ ଖଣ୍ଡିକ ମଧ୍ୟ ପରିବାର ପାଖରେ ନାହିଁ ।
ପାଖରେ ଯାହା କିଛି ଟଙ୍କା, ସୁନା ଥିଲା ସବୁତକ ଚିକିତ୍ସାରେ ଖର୍ଚ୍ଚ ହୋଇସାରିଛି। ଏଭଳି ସ୍ଥଳେ ସହାୟତାର ହାତ ବଢ଼ାଇଛନ୍ତି ଗଣେଶଙ୍କ ପୁରାତନ ବନ୍ଧୁ। ୧୯୯୬ ବ୍ୟାଚର ନିଜ ପୁରାତନ ବନ୍ଧୁମାନେ ୩୦ହଜାର ଟଙ୍କା ଆଦାୟ କରି ଚିକିତ୍ସା ନିମନ୍ତେ ଗଣେଶଙ୍କୁ ପ୍ରଦାନ କରିଛନ୍ତି। ଉକ୍ତ ଟଙ୍କା ପୁରାତନ ଛାତ୍ର ଗୋଷ୍ଠୀର ସଭାପତି ବଳରାମ ପଣ୍ଡା, କୋଷାଧ୍ୟକ୍ଷ ରାଧାମୋହନ ମହାନ୍ତି ଗଣେଶଙ୍କୁ ଭେଟି ପ୍ରଦାନ କରିଛନ୍ତି। ସରକାର ଓ ପ୍ରଶାସନ ତୁରନ୍ତ ଏହି ପରିବାରକୁ ମାଗଣା ଚିକିତ୍ସା ସେବା ଯୋଗାଇଦେବାକୁ ବିଭିନ୍ନ ମହଲରେ ଦାବି ହେଉଛି।
