ଲକ୍ସେମ୍ବର୍ଗ . – ବିଶ୍ୱର ପ୍ରଥମ ଦେଶ ଭାବେ ଲକ୍ସେମ୍ବର୍ଗରେ ୨୦୨୦ରୁ ସାଧାରଣ ପରିବହନ ବ୍ୟବସ୍ଥାରେ ଦେୟମୁକ୍ତ ହୋଇଯିବ । ଏହାର ନାଗରିକମାନେ ମାଗଣାରେ ସରକାରୀ ବସ୍ ଓ ଟ୍ରେନରେ ଯାତ୍ରା କରି ପାରିବେ । ପରିବେଶ ସୁରକ୍ଷା ପାଇଁ ଲକ୍ସେମ୍ବର୍ଗ ସରକାରଙ୍କ ପକ୍ଷରୁ ଏହି ପଦକ୍ଷେପ ଗ୍ରହଣ କରାଯାଇଛି । ୨୦ ବର୍ଷରୁ କମ୍ ସମସ୍ତ ବ୍ୟକ୍ତି ଏହି ସୁବିଧା ପାଇ ପାରିବେ ।
ଲକ୍ସେମ୍ବର୍ଗର ସମସ୍ତ ସରକାରୀ ଟ୍ରେନ, ଟ୍ରାମ ଓ ବସ୍ରେ ୨୦ ବର୍ଷରୁ କମ୍ ବୟସ୍କ ଯାତ୍ରୀ ମାଗଣାରେ ଯାତ୍ରା କରିପାରିବେ । ଲକ୍ସେମ୍ବର୍ଗ ପ୍ରଧାନମନ୍ତ୍ରୀ ଜାଭିୟର ବିଟିଲ୍ ଏ ବିଷୟରେ ଘୋଷଣା କରିଛନ୍ତି । ଲକ୍ସେମ୍ବର୍ଗର ରାଜଧାନୀରେ ଏକଲକ୍ଷ ୧୦ ହଜାର ଲୋକ ବସବାସ କରୁଛନ୍ତି । ୪ ଲକ୍ଷରୁ ଅଧିକ ଲୋକ ପ୍ରତିଦିନ ଏଠାକୁ କାମ କରିବାପାଇଁ ଆସି ଥାଆନ୍ତି ।
ଚଳିତ ବର୍ଷ ଲକ୍ସେମ୍ବର୍ଗରେ ସମସ୍ତ ଶିଶୁ ଓ ୧୦ ବର୍ଷରୁ କମ୍ ବାଳକ ବାଳିକାଙ୍କ ପାଇଁ ସାଧାରଣ ପରିବହନରେ ଯାତ୍ରା କରିବା ଦେୟମୁକ୍ତ କରାଯାଇଥିଲା । ବିଦ୍ୟାଳୟ ଯାଉଥିବା ସମସ୍ତ ଛାତ୍ରାଛାତ୍ରୀମାନଙ୍କ ପାଇଁ ସ୍ୱତନ୍ତ୍ର ମାଗଣା ପରିବହନ ବ୍ୟବସ୍ଥା ଆରମ୍ଭ କରାଯାଇଥିଲା ।
