ଭୋପାଳ: ପାକିସ୍ତାନ ବିରୋଧରେ ଭାରତର ସାମରିକ କାର୍ଯ୍ୟାନୁଷ୍ଠାନ ‘ଅପରେସନ ସିନ୍ଦୂର’ ସମୟରେ ଚର୍ଚ୍ଚିତ ଚେହେରା କର୍ଣ୍ଣେଲ ସୋଫିୟା କୁରେଶୀଙ୍କ ଉପରେ ଅପମାନଜନକ, ସାମ୍ପ୍ରଦାୟିକ ଓ ଲିଙ୍ଗଗତ ମନ୍ତବ୍ୟ ଦେଇଥିବା ମଧ୍ୟପ୍ରଦେଶ ମନ୍ତ୍ରୀ ବିଜୟ ଶାହାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ହୋଇଛି । ମନ୍ତ୍ରୀଙ୍କ ନାଁରେ ମାମଲା ରୁଜୁ କରିବାକୁ ରାଜ୍ୟ ହାଇକୋର୍ଟ ପୁଲିସକୁ ନିର୍ଦେଶ ଦେଇଛନ୍ତି । ପୁଲିସ ତାଙ୍କ ବିରୋଧରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । କର୍ଣ୍ଣେଲ ସୋଫିୟାଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇ ଅଡୁଆରେ ପଡିଛନ୍ତି ମନ୍ତ୍ରୀ ବିଜୟ ଶାହା । ବିଦେଶ ସଚିବ ବିକ୍ରମ ମିସ୍ରୀ ଏବଂ ବାୟୁସେନା ଅଧିକାରୀ ୱିଙ୍ଗ୍ କମାଣ୍ଡର ବ୍ୟୋମିକା ସିଂହଙ୍କ ସହିତ କର୍ଣ୍ଣେଲ ସୋଫିୟା ଅପରେସନ ସିନ୍ଦୂର ସମ୍ପର୍କରେ ଦେଶବାସୀଙ୍କୁ ସୂଚନା ଦେଇଛନ୍ତି । ସୋଫିୟାଙ୍କ ଭଳି ଜଣେ ସଚ୍ଚୋଟ ଅଫିସର ଏବଂ ଦେଶମାତୃ ପାଇଁ ଜୀବନ ବାଜିରେ ଲଗାଇଥିବା ସେନା ଅଧିକାରୀଙ୍କ ବିରୋଧରେ ଏଭଳି ଆପତ୍ତିଜନକ ମନ୍ତବ୍ୟ ଦେବା ଉଚିତ ନୁହେଁ ବୋଲି କୁହାଯାଇଛି ।
ସୂଚନା ଅନୁସାରେ ମୌଠାରେ ଆୟୋଜିତ ଏକ ଉତ୍ସବରେ ଆଦିବାସୀ ବ୍ୟାପାର ମନ୍ତ୍ରୀ ବିଜୟ ଶାହା କହିଥିଲେ ପହଲଗାଓଁରେ ଯେଉଁ ଆତଙ୍କବାଦୀମାନେ ଆମ ଭଉଣୀ ଓ ଝିଅଙ୍କ ସିନ୍ଦୂର ପୋଛି ଦେଇଛନ୍ତ ଆମେ ସେହି ସଂପ୍ରଦାୟର ଜଣେ ମହିଳାଙ୍କୁ ପାକିସ୍ତାନ ବିପକ୍ଷରେ ଚାଲିଥିବା କାର୍ଯ୍ୟାନୁଷ୍ଠା ସମ୍ପର୍କରେ ବିବରଣୀ ଦେବାକୁ ନିଯୁକ୍ତ କରିଛୁ । ବିଜୟ ଏହି ପରିପ୍ରେକ୍ଷୀରେ ସୋଫିୟାଙ୍କୁ ଆତଙ୍କବାଦୀଙ୍କ ଭଉଣୀ ବୋଲି କହିଛନ୍ତି । ବିଜୟଙ୍କ ଏଭଳି ମନ୍ତବ୍ୟକୁ ସେନାର ବରିଷ୍ଠ ଅଧିକାରୀ ଓ କଂଗ୍ରେସ ସମେତ ଏକାଧିକ ବିରୋଧୀ ଦଳ ତୀବ୍ର ନିନ୍ଦା କରି ସମାଲୋଚନା କରିଛନ୍ତି । ବିଜୟ ତୁରନ୍ତ ମନ୍ତ୍ରୀ ପଦରୁ ଇସ୍ତଫା ଦିଅନ୍ତୁ ବୋଲି ଦାବି ହୋଇଛି ।
