ବାପାଙ୍କୁ ଏନକାଉଣ୍ଟର; ଧୁମଧାମରେ ଝିଅକୁ ବିବାହ କରାଇଲା ପୁଲିସ

ସମାଜ ଡିଜିଟାଲ ଡେସ୍କ: ଉତ୍ତରପ୍ରଦେଶର କୁଖ୍ୟାତ ଡାକୁ ସୁଲତାନାକୁ ଧରି ବ୍ରିଟିଶ ପୁଲିସ ଫାଶୀ ଦେଇଥିଲା । ହେଲେ ଅପରାଧିଙ୍କ ଝିଅକୁ ପାଠ ପଢାଇ ବିବାହ କରାଇବା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି । ଏହା ଏଭଳି ଏକ ବିବାହ ଉତ୍ସବ ଥିଲା ଯେଉଁଥିରେ ବିବାହ ପରେ ଝିଅ ବିଦା ବେଳେ ପୁଲିସ ଅଧିକାରୀମାନେ କାନ୍ଦିଥିଲେ । ବାପା ଉପରେ ଗୁଳି ଚଳାଇଥିବା ପୁଲିସର ହାତ ଝିଅକୁ ଉପହାର ଓ ଆର୍ଶିବାଦ ଦେଉଥିବା ଦେଖିବାକୁ ମିଳିଥିଲା । ଗତବର୍ଷ ଜଣେ ପୁଲିସ କର୍ମଚାରୀକୁ ହତ୍ୟା କରିବା ଅଭିଯୋଗରେ ଅପରାଧୀକୁ ଏନକାଉଣ୍ଟର କରିଥିଲା ପୁଲିସ । ଏନକାଉଣ୍ଟରରେ ପରିବାରର ମୁଖିଆ ନିହତ ହେବା ପରେ ଅନେକ ସମସ୍ୟାର ସମ୍ମୁଖୀନ ହୋଇଥିଲେ ପରିବାର ସଦସ୍ୟ । ଝିଅ ଓ ପତ୍ନୀ ଏସମ୍ପର୍କରେ ପୁଲିସକୁ ଅବଗତ କରାଇବା ପରେ ପୁରା ପରିବାରର ଭାର ପୁଲିସ କାନ୍ଧକୁ ନେଇଥିଲା ।
ଝିଅର ବାହାଘର ଠିକ୍‌ ହେବା ପରେ ପୁରା ଖର୍ଚ୍ଚର ଦାୟିତ୍ୱ ପୁଲିସ ଅଧିକାରୀମାନେ ନେଇଥିଲେ । ଗେଷ୍ଟ ହାଉସ୍‌, ବରଯାତ୍ରୀଙ୍କ ଖାଇପା ପିଇବା, ଉପହାର ସବୁକିଛି ଆୟୋଜନ କରିଥିଲା ପୁଲିସ । ବାହାଘର ପରେ ପୁଲିସ ପକ୍ଷରୁ ଝିଅକୁ ଅନେକ ଉପହାର ମଧ୍ୟ ଦିଆଯାଇଥିଲା । ଯାହାକୁ ଦେଖିବା ପରେ ସଭିଏଁ ଚକିତ ହୋଇଯାଇଥିଲେ ।
୨୦୨୩ ମେ ୧୦ରେ ମଥୁରା ନିବାସୀ ଭେଦଜିତ ସିଂହକୁ ହତ୍ୟା କରିଥିଲେ ଅପରାଧି । ଘଟଣା ୪ଦିନ ପରେ ପୁଲିସ ମୁଖ୍ୟ ଅଭିଯୁକ୍ତ ରମେଶ ରାୟକବାର ଏବଂ କଲ୍ଲୁ ଅହିରାବାରଙ୍କୁ ଏନକାଉଣ୍ଟର କରିଥିଲା । ଏନକାଉଣ୍ଟର ପରେ ରମେଶର ପରିବାର ଅନାଥ ହୋଇଥିଲେ । ରମେଶ ପତ୍ନୀ ତାରା ଏବଂ ବଡ ଝିଅ ଶିବାଙ୍ଗୀ ପୁଲିସ ଅଧିକାରୀଙ୍କୁ ଭେଟି ପରିବାର ସମ୍ପର୍କରେ କହିଥିଲେ । ପୁଲିସ ସେତେବେଳେ ପୁରା ପରିବାରର ଖର୍ଚ୍ଚ ବହନ କରିବାକୁ ପ୍ରତିଶ୍ରୁତି ଦେବା ସହ ପାଳନ କରିଛନ୍ତି । ରମେଶର ଦୁଇଟି ଝିଅ ଓ ଗୋଟିଏ ପୁଅକୁ ପାଠ ପଢାଇ ବାହାଘର କରିବାର ଦାୟିତ୍ୱ ନେଇଥିଲା ପୁଲିସ । ପୁଲିସ ନିଜ ଝିଅ ଭଳି ଶିବାଙ୍ଗୀର ବାହାଘର କରିଥିବା ରମେଶଙ୍‌କ ପତ୍ନୀ କହିଛନ୍ତି ।