ଆଜି ନୂଆ କୃଷି ଆଇନକୁ ବିରୋଧ କରି ସାରା ଦେଶରେ ବନ୍ଦ ଡାକରା ଦିଆଯାଇଥିବା ବେଳେ କିଛି ସମୟ ପୂର୍ବରୁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ସହ କୃଷକ ନେତାଙ୍କ ବୈଠକ ଆରମ୍ଭ ହୋଇଛି। ଆଜିର ବୈଠକରେ ୧୩ ଜଣ କୃଷି ନେତା ଉପସ୍ଥିତ ଅଛନ୍ତି। ସନ୍ଧ୍ୟାରେ ବୈଠକ ହେବାର ଥିଲେ ମଧ୍ୟ ବୈଠକ ପାଇଁ ନିର୍ଦ୍ଧାରିତ ସ୍ଥାନ ବଦଳିବା ଯୋଗୁ ବୈଠକରେ ବିଳମ୍ବ ଘଟିଛି।
ବୈଠକରେ ଯୋଗ ଦେଇଥିବା ୧୩ ଜଣ କୃଷକ ନେତା ହେଉଛନ୍ତି ରାକେଶ ଟୀକାୟତ, ଗୁରୁନାମ ଚଢ଼ୁନି, ହନନ ମୁଲ୍ଲା, ଶିବ କୁମାର ହକ୍କା, ବଲବୀର ସିଂ, ଜଗଜିତ ସିଂ, ରୁଲଦୁ ସିଂ ମାନସା, ବୂଟା ସିଂ ବୁର୍ଯୁଗିଲ, ମଞ୍ଜିତ ସିଂ ରାୟ, ହରିନ୍ଦର ସିଂ ଲଖୱାଲ, ଦର୍ଶନ ପାଲ, କୁଲୱନ୍ତ ସିଂ ସାନ୍ଧୁ ଓ ଭୋଗ ସିଂ ମାନସା। ତେବେ ବୈଠକ ସ୍ଥଳୀରେ କୌଣସି ଅପ୍ରୀତିକର ପରିସ୍ଥିତି ପାଇଁ ଜଣେ କୃଷକ ନେତା ବୈଠକରେ ଭାଗ ନେଉନଥିବା ଜଣାପଡିଛି।
ପ୍ରଥମେ ନର୍ଥ ବ୍ଲକରେ ବୈଠା କରାଯିବ ପାଇଁ ସ୍ଥିର କରାଯାଇଥିବା ବେଳେ ପରେ ଅମିତ ଶାହାଙ୍କ ବାସଭବନରେ ବୈଠକ କରିବା ପାଇଁ ନିଷ୍ପତ୍ତି ହୋଇଥିଲା। ତେବେ ପୁଣି ଥରେ ଏହି ସ୍ଥାନ ମଧ୍ୟ ପରିବର୍ତ୍ତନ କରାଯାଇଥିଲା। ଏବେ ଏହି ବୈଠକ ପୁସା ସଂସ୍ଥାନରେ ହେଉଛି। ଭାରତୀୟ କିସାନ ୟୁନିଅନ ମୁଖପାତ୍ର ରାକେଶ ଟୀକାୟତ ନିଜ ସାଥି କୃଷକ ନେତାଙ୍କ ସହ ପ୍ରଥମେ ଅମିତ ଶାହାଙ୍କ ବାସଭବନରେ ପହଂଚି ଯାଇଥିଲେ କିନ୍ତୁ ପରେ ସେମାନଙ୍କୁ ପୁସା ସଂସ୍ଥାନକୁ ଯିବାକୁ ପଡିଥିଲା।
ମିଳିଥିବା ସୂଚନା ଅନୁଯାୟୀ ଆଜିର ବୈଠକରେ କୃଷକ ନେତାମାନେ ମନ୍ତ୍ରୀ ଅମିତ ସାହାଙ୍କ ଠାରୁ କେବଳ ହଁ ଓ ନାଁରେ ଜବାବ ମାଗିବେ। ସିନ୍ଧୁ ସୀମାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୃଷକ ନେତା ଆର.ଏସ. ମନସା କହିଛନ୍ତି ଯେ ବୈଠକରେ କୌଣସି ମଧ୍ୟବର୍ତ୍ତିକାଳୀନ ସମାଧାନ ନେଇ ଆଲୋଚନାକୁ ଗୁରୁତ୍ୱ ଦିଆଯିବ ନାହିଁ, ସେମାନେ କେବଳ ମନ୍ତ୍ରୀଙ୍କ ଠାରୁ ଗୋଟିଏ ଉତ୍ତର ଚାହିଁବେ ଓ ତାହା ହେଉଛି ହଁ କି ନାଁ।
