ସମାଜ ଡିଜିଟାଲ ଡେସ୍କ: ବିହାରରେ ଉପମୁଖ୍ୟମନ୍ତ୍ରୀଙ୍କ ସରକାରୀ ବଙ୍ଗଳାକୁ ରାଜନୀତି ସରଗରମ ହୋଇପଡ଼ିଛି। ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ଵୀ ଯାଦବ ସରକାରୀ ବଙ୍ଗଳା ଖାଲି କରିବା ସହିତ ସେଠାରେ ଲାଗିଥିବା ଶୀତତାପ ନିୟନ୍ତ୍ରିତ ଯନ୍ତ୍ର(ଏସି), ବେସିନ ଖୋଲି ନେଇଛନ୍ତି। ଏପରି କି ବଙ୍ଗଳାରେ ଲାଗିଥିବା ବିଦ୍ୟୁତ ବୋର୍ଡକୁ ବି ଛାଡ଼ିନାହାନ୍ତି। ବିଦ୍ୟୁତ ବୋର୍ଡ ଉପାଡ଼ି ନେଇଛନ୍ତି ତେଜସ୍ଵୀ। ଏଭଳି ଅଭିଯୋଗ ଆଣିଛି ବିଜେପି।
ବିହାରର ବିଜେପି ମିଡିଆ ସେଲ୍ ପ୍ରଭାରୀ ଦାନିଶ ଇକବାଲ ଅଭିଯୋଗ କରି କହିଛନ୍ତି ଯେ, ତେଜସ୍ଵୀ ବଙ୍ଗଳା ଖାଲି କରିବା ସହିତ ସରକାରୀ ବେଡ୍, ଏସି ଏବଂ ବେସିନକୁ ବି ଖାଲି କରିନେଲେ। ଏପରି କି ବାସଭବନରେ ଖେଳକୁଦ ପାଇଁ ରହିଥିବା ଜିମ୍ ଓ କ୍ରୀଡ଼ା ଉପକରଣଗୁଡ଼ିକୁ ବି ନେଇଗଲେ। ବ୍ୟାଡମିଣ୍ଟନ କୋର୍ଟର ଚଟାଣରେ ପଡୁଥିବା ମ୍ୟାଟ୍ ଖୋଲି ନେଇଛନ୍ତି। ଏହବ୍ୟତୀତ ଗାଧୁଆ ଘରେ ଲାଗିଥିବା ଟ୍ୟାପ ବି ଖୋଲି ନେଇଥିବା ଅଭିଯୋଗ କରିଛନ୍ତି। ସୂଚନାଯୋଗ୍ୟ, ତେଜସ୍ଵୀ ଖାଲି କରିଥିବା ସରକାରୀ ବଙ୍ଗଳାକୁ ବର୍ତ୍ତମାନର ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କୁ ଆବଣ୍ଟିତ ହୋଇଛି।
