ଭୁବନେଶ୍ୱର .- ଅତି ଭୀଷଣ ସାମୁଦ୍ରିକ ଝଡ ଫନିର ପ୍ରଭାବରେ ରାଜଧାନୀ ଭୁବନେଶ୍ୱର ସହ ପୁରୀ ଓ କଟକର ବିଦ୍ୟୁତ ସରୋବରାହ ବ୍ୟବସ୍ଥା ପ୍ରଭାବିତ ହୋଇଛି । ପୁରୀ ଜିଲ୍ଲାରେ ବିଦ୍ୟୁତ ସରୋବରାହ ବ୍ୟବସ୍ଥା ସ୍ୱାଭାବିକ କରିବା ପାଇଁ ଏକ ମାସ ସମୟ ଲାଗିବ ବୋଲି ବିଦ୍ୟୁତ ବିଭାଗ ପକ୍ଷରୁ ସୂଚନା ଦିଆଯାଇଛି । କଟକ ଓ ଭୁବନେଶ୍ୱରର କେତକ ଅଞ୍ଚଳରେ ବିଦ୍ୟୁତ ସଂଯୋଗ ଦିଆଯାଇଥିବା ବେଳେ ବୁଧବାରରେ ଆହୁରି ଅନେକ ସ୍ଥାନକୁ ବିଦ୍ୟୁତ ସଂଯୋଗ ଦିଆଯିବ ବୋଲି ଓପିଟିସିଏଲ୍ ପକ୍ଷରୁ ସୂଚନା ଦିଆଯାଇଛି । ଭୁବନେଶ୍ୱରରେ ୪୮ରୁ ୭୨ ଘଣ୍ଟା ମଧ୍ୟରେ ବିଦ୍ୟୁତ ସରୋବରାହ ସ୍ୱାଭାବିକ ହେବ ।
ଫନି ପ୍ରଭାବରେ ପାଓ୍ୱାର ଗ୍ରୀଡ କର୍ପୋରେସନ୍ର ଏକ ୪୦୦ କେଭି ଟାଓ୍ୱାର ଭାଙ୍ଗିଯାଇଛି । ଏହା ଓପିଟିସିଏଲ୍ର ୪୦୦ କେଭି ଟାଓ୍ୱାର ଉପରେ ପଡିଛି । ଓପିଟିସିଏଲ୍ର ଅନ୍ୟ ଏକ ୨୦୦ କେଭି ଟାଓ୍ୱାର ଫନି ଯୋଗୁଁ କ୍ଷତିଗ୍ରସ୍ତ ହୋଇଛି ବୋଲି ଓପିଟିସିଏଲ୍ର ନିର୍ଦେଶକ ଉତ୍ତମ କୁମାର ସାମଲ କହିଛନ୍ତି ।
ନୂଆ ଟାଓ୍ୱାର ତିଆରି କରିବା ପାଇଁ ସମୟ ଲାଗିବ ଏଥିପାଇଁ ମରାମତି ଓ ବିଦ୍ୟୁତ ଯୋଗାଣ କାର୍ଯ୍ୟ ବାଧାପ୍ରାପ୍ତ ହେବ । ଏଥିପାଇଁ ବିକଳ୍ପ ବ୍ୟବସ୍ଥା କରାଯିବା ସହ ଚନ୍ଦକା ଗ୍ରୀଡରୁ ଭୁବନେଶ୍ୱରକୁ ବିଦ୍ୟୁତ ଯୋଗାଇ ଦେବା ପାଇଁ ଚେଷ୍ଟା ଚାଲିଛି ବୋଲି ଉତ୍ତମ କୁମାର ସୂଚନା ଦେଇଛନ୍ତି ।
