ଏବେ ଭୋଟ ହେଲେ ଏନ୍‌ଡିଏ ପାଇବ ୩୪୩ ଆସନ

ନୂଆଦିଲ୍ଲୀ : ଏବେ ଦେଶରେ ଲୋକସଭା ନିର୍ବାଚନ ହେଲେ ବିଜେପି ନେତୃତ୍ବାଧୀନ ଏନଡିଏ ୩୪୩ଟି ଆସନରେ ବିଜୟୀ ହେବ ବୋଲି ମୁଡ ଅଫ୍ ଦି ନେସନ ଜନମତ ସର୍ଭେରେ ଆକଳନ କରାଯାଇଛି। ଇଣ୍ଡିଆ ଟୁଡେ ଓ ସି-ଭୋଟର ପକ୍ଷରୁ କରାଯାଇଥିବା ଏହି ସର୍ଭେରେ ଆକଳନ କରାଯାଇଛି ଯେ, ଏବେ ଲୋକସଭା ନିର୍ବାଚନ ହେଲେ ଇଣ୍ଡି ମେଣ୍ଟର ଆସନ ସଂଖ୍ୟା ୨୩୨ରୁ ୧୮୮କୁ ହ୍ରାସ ପାଇବ। ବିଜେପି ଏକାକୀ ୨୮୧ଟି ଆସନ ପାଇବ। ସେହିପରି କଂଗ୍ରେସର ଆସନ ସଂଖ୍ୟା ୯୯ରୁ ୭୮କୁ ହ୍ରାସ ପାଇବ ବୋଲି କୁହାଯାଇଛି। ଗତ ଲୋକସଭା ନିର୍ବାଚନରେ ଏନଡିଏ ୨୯୨ଟି ଆସନ ପାଇଥିବାବେଳେ ବିଜେପି ଏକାକୀ ୨୪୦ଟି ଆସନ ପାଇଥିଲା। ଗତ ଜାନୁଆରୀ ୨ରୁ ଫେବୃଆରୀ ୯ ମଧ୍ୟରେ ହୋଇଥିବା ଏହି ସର୍ଭେରେ ଦେଶର ସମସ୍ତ ଲୋକସଭା ନିର୍ବାଚନମଣ୍ଡଳୀରୁ ମୋଟ ୧,୨୫,୧୨୩ଙ୍କ ମତାମତ ନିଆଯାଇଥିଲା। ସର୍ଭେରେ ଅନ୍ୟାନ୍ୟ ତଥ୍ୟ ସଂଗ୍ରହ କରାଯାଇଥିଲା। ଭୋଟ ସେୟାର ଦୃଷ୍ଟିକୋଣରୁ ଏନଡିଏର ଭୋଟ ସେୟାର ୩% ବୃଦ୍ଧି ପାଇ ୪୭%ରେ ପହଞ୍ଚିବ। ଇଣ୍ଡି ମେଣ୍ଟର ଭୋଟ ସେୟାର ୧% ବୃଦ୍ଧି ପାଇବ ବୋଲି କୁହାଯାଇଛି। ଅନ୍ୟପଟେ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଥିବାବେଳେ ଏଠାରେ ଏନଡିଏ କ୍ଷମତା ବଜାୟ ରଖିବାର ସମ୍ଭାବନା ରହିଛି। କାରଣ ବିହାରର ୪୦ଟି ଲୋକସଭା ଆସନରୁ ଏନଡିଏ ୩୩ରୁ ୩୫ଟି ଆସନ ପାଇବ ବୋଲି ଅନୁମାନ କରାଯାଇଛି। କଂଗ୍ରେସ, ଆରଜେଡିକୁ​‌ ନେଇ ଗଠିତ ମହାମେଣ୍ଟ ୫ରୁ ୭ଟି ଆସନ ପାଇବ ବୋଲି ଅନୁମାନ କରାଯାଇଛି। ବିହାର ପାଇଁ ହୋଇଥିବା ସର୍ଭେରେ ଏନଡିଏର ଭୋଟ ସେୟାର ୫% ବୃଦ୍ଧି ପାଇ ୪୭% ହୋଇଥିବାବେଳେ ମହାମେଣ୍ଟର ଭୋଟ ସୋୟାର ୩% ବୃଦ୍ଧି ହୋଇ ୪୨%ରେ ପହଞ୍ଚିଛି। ଦିଲ୍ଲୀ ବିଧାନସଭା ନିର୍ବାଚନ ପରେ ବିଜେପି ଏବେ ବିହାର ଉପରେ ଲକ୍ଷ୍ୟ ଧାର୍ଯ୍ୟ କରିଛି। ମୁଡ ଅଫ୍ ଦି ନେସନ ସର୍ଭେ ବିଜେପିର ଏହି ଲକ୍ଷ୍ୟ ହାସଲକୁ ଆହୁରି ଦୃଢ କରିଛି। ସର୍ଭେରେ ବିହାରରେ ଏନଡିଏର ସ୍ଥିତ ଭଲ ରହିବାକୁ ଆକଳନ କରାଯାଇଛି। ୨୪୩ ଆସନ ବିଶିଷ୍ଟ ବିହାର ବିଧାନସଭା ପାଇଁ ଚଳିତବର୍ଷ ଅକ୍ଟୋବର କିମ୍ବା ନଭେମ୍ବରରେ ଭୋଟ ଗ୍ରହଣ ହେବ।