ଆସନ୍ତାବର୍ଷ ୪ଟି ରାଜ୍ୟ ଆସାମ, କେରଳ, ତାମିଲନାଡୁ, ପଶ୍ଚିମବଙ୍ଗ ଓ ପୁଡୁଚେରୀରେ ହେବାକୁ ଥିବା ବିଧାନସଭା ନିର୍ବାଚନ ପରିପ୍ରେକ୍ଷୀରେ ସେଠାରେ ସରକାରୀ ଅଧିକାରୀଙ୍କ ବଦଳି ସମ୍ବନ୍ଧୀୟ ପରାମର୍ଶବଳୀ ନିର୍ବାଚନ କମିଶନ ପକ୍ଷରୁ ଜାରି କରାଯାଇଛି। ନିର୍ବାଚନ ପରିଚାଳନା କାର୍ଯ୍ୟରେ ସମ୍ପୃକ୍ତ ଥିବା ଅଧିକାରୀମାନଙ୍କୁ ସେମାନଙ୍କ ନିଜ ସହରରେ ଅବସ୍ଥାପିତ ନ କରିବାକୁ ନିର୍ବାଚନ କମିଶନ ଏହିସବୁ ରାଜ୍ୟଗୁଡିକୁ ପରାମର୍ଶ ଦେଇଛନ୍ତି। କମିଶନ କହିଛନ୍ତି, ଯେଉଁ ଅଧିକାରୀମାନଙ୍କ ବିରୁଦ୍ଧରେ ପୂର୍ବରୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା ବା ଯେଉଁମାନଙ୍କ ବିରୁଦ୍ଧରେ ନିର୍ବାଚନ ପରିଚାଳନା ଜନିତ ଅନିୟମିତତା ନେଇ ବିଚାରଧୀନ ଅଛି, ସେମାନଙ୍କୁ ନିର୍ବାଚନ ପରିଚାଳନା କାର୍ଯ୍ୟରେ ନିୟୋଜିତ ନ କରିବାକୁ କୁହାଯାଇଛି।
ଆସନ୍ତା ୬ମାସ ମଧ୍ୟରେ ଯେଉଁ ଅଧିକାରୀମାନେ ଅବସର ଗ୍ରହଣ କରିବେ ସେମାନଙ୍କୁ ମଧ୍ୟ ଦାୟିତ୍ୱ ନ ଦେବାକୁ କୁହାଯାଇଛି। ସେହିଭଳି ନିର୍ବାଚନ କମିଶନଙ୍କ ସୁପାରିଶ ଆଧାରରେ ୨୦୧୯ ଲୋକସଭା ନିର୍ବାଚନ ସମୟରେ ଅବସ୍ଥାପିତ ଅଧିକାରୀମାନଙ୍କୁ ବଦଳି ନ କରିବାକୁ ମଧ୍ୟ କୁହାଯାଇଛି।
