ଭୁବନେଶ୍ୱର: ଆସନ୍ତା ଏପ୍ରିଲ ୨୦ ରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କର ପାଠପଢା ଆରମ୍ଭ କରାଯିବ। ରାଜ୍ୟ ସମେତ ସାରା ଦେଶ ଲକ ଡାଉନ ଥିବାରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ହିତକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି। ଘରେ ରହି ଟିଭି ଦେଖି ଛାତ୍ରଛାତ୍ରୀ ପାଠପଢିପାରିବେ। ଏହି ସମସ୍ୟାର ସମାଧାନ ନିମନ୍ତେ ଦୂରଦର୍ଶନର ସହାୟତା ନିଆଯିବ। ଲକ୍ଡାଉନ ସମୟରେ ଟିଭିରେ ଦୂରଦର୍ଶନ ଚ୍ୟାନେଲ (ଡିଡି ଓଡ଼ିଆ) ଜରିଆରେ ଦଶମ ପାଠ ପଢାଯିବ ବୋଲି ନିଷ୍ପତ୍ତି ନିଆଯାଇଛି। ଏ ସମ୍ବନ୍ଧରେ ଓଡ଼ିଶା ବିଦ୍ୟାଳୟ ଶିକ୍ଷା ପ୍ରାଧିକରଣ(ଓସୋପା) ପକ୍ଷରୁ ସମସ୍ତ ଜିଲା ଶିକ୍ଷା ଅଧିକାରୀ, ସମଗ୍ର ଶିକ୍ଷା ଜିଲା ପ୍ରକଳ୍ପ ସଂଯୋଜକ ଓ ସମସ୍ତ ବ୍ଲକ୍ ଶିକ୍ଷା ଅଧିକାରୀଙ୍କୁ ସୂଚିତ କରାଯାଇଛି। ଓସେପା ଯୁଗ୍ମ ସଚିବ ଡ.ସନାତନ ପଣ୍ଡା ଏନେଇ ଶନିବାର ଚିଠି ଲେଖି ଅବଗତ କରିଛନ୍ତି।
ଚିଠିରେ ଉଲ୍ଲେଖ କରାଯାଇଛି ଯେ, ବିଦ୍ୟାଳୟ ବନ୍ଦ ଥିବାରୁ ଛାତ୍ରଛାତ୍ରୀଙ୍କ ପାଠପଢା ପ୍ରଭାବିତ ହେଉଛି। ଏହାକୁ ଦୃଷ୍ଟିରେ ରଖି ଆସନ୍ତା ୨୦ରୁ ଏଡୁସାଟ୍ ଦ୍ୱାରା ପ୍ରସ୍ତୁତ ବିଭିନ୍ନ ବିଷୟରେ ପାଠ୍ୟକ୍ରମର ଭିଡିଓ ଦୂରଦର୍ଶନ ଓଡ଼ିଆ ଚ୍ୟାନେଲରେ ରେ ପ୍ରସାରଣ କରାଯିବ। ୨୦ ଏପ୍ରିଲରୁ ଏହା ଆରମ୍ଭ ହୋଇ ମେ ୧୨ରେ ଶେଷ ହେବ। ମୋଟ ୩୪ଟି ଭିଡିଓ ପ୍ରସାରଣ କରାଯିବ।
ପ୍ରତ୍ୟେକ ସୋମବାର ଠାରୁ ଶୁକ୍ରବାର ପର୍ୟ୍ୟନ୍ତ ପ୍ରସାରଣ କରାଯିବ। ପ୍ରତିଦିନ ଦୁଇଥର ପ୍ରସାରଣ ହେବ। ପ୍ରତି ପ୍ରସାରଣ ସମୟ ଏକଘଣ୍ଟା ଧାର୍ୟ୍ୟ କରାଯାଇଛି। ପୂର୍ବାହ୍ଣ ୧୧ରୁ ମଧ୍ୟାହ୍ନ୧୨ଟା ଏବଂ ଅପରାହ୍ଣ ୩.୩୦ ରୁ ୪.୩୦ ପର୍ୟ୍ୟନ୍ତ ପ୍ରସାରଣ କରାଯିବ। ଇଂରାଜୀ, ଗଣିତ,ଭୂଗୋଳ,ଏସ ସି ପି, ଏବଂ ଏସ ସି ଏଲ ବିଷୟର ଭିଡିଓ ପ୍ରସାରଣ କରାଯିବ। ଏହା ବ୍ୟତୀତ ଦୀକ୍ଷା ଓ ମଧୁ ଆପ୍ରେ ଛାତ୍ରଛାତ୍ରୀଙ୍କ ପାଇଁ ବିଭିନ୍ନ ବିଷୟର ନିୟମିତ ଭାବେ ଭିଡିଓ ଅପ୍ଲୋଡ୍ କରାଯାଇଛି। ଛାତ୍ରଛାତ୍ରୀ ଏହି ଆପ୍କୁ ଫୋନ୍ରେ ଇନ୍ଷ୍ଟାଲ୍ କରି ସୁଫଳ ପାଇପାରିବେ।
ସବୁ ବିଦ୍ୟାଳୟର ପ୍ରଧାନଶିକ୍ଷକ ଓ ପ୍ରଧାନଶିକ୍ଷୟିତ୍ରୀ ଦୂରଦର୍ଶନରେ ପ୍ରସାରଣ ଓ ଆପ୍ ସର୍ମ୍ପକରେ ଛାତ୍ରଛାତ୍ରୀଙ୍କୁ ଅଧିକ ମାତ୍ରାରେ ଅବଗତ କରିବା ସହ କାର୍ୟ୍ୟକ୍ରମ ଦେଖିବାକୁ କହିବେ ବୋଲି ଚିଠିରେ ଉଲ୍ଲେଖ କରାଯାଇଛି।
