ଦିଲ୍ଲୀରେ ରହିବାକୁ ଇଚ୍ଛା ନାହିଁ: ଜଷ୍ଟିସ ଅରୁଣ ମିଶ୍ର

ନୂଆଦିଲ୍ଲୀ : ରାଜଧାନୀ ଦିଲ୍ଲୀର ବାୟୁମଣ୍ଡଳ ଏତେ ବିଷାକ୍ତ ହୋଇଗଲାଣି; ଯେମିତି ଗୋଟିଏ ଗ୍ୟାସ ଚାମ୍ବର। ସକାଳେ ଓ ସନ୍ଧ୍ୟାରେ ସର୍ବାଧିକ ପ୍ରଦୂଷଣ ସାଙ୍ଗକୁ ଟ୍ରାଫିକ ସମସ୍ୟା ଏତେ ଯେ ଏଠାରେ ରହିବା କଷ୍ଟକର। ସେଥିପାଇଁ ଦିଲ୍ଲୀରେ ଅବସ୍ଥାନ କରିବାକୁ ସାମାନ୍ୟ ଇଚ୍ଛା ନାହିଁ। ଏଭଳି ମନ୍ତବ୍ୟ ରଖିଛନ୍ତି ସୁପ୍ରିମକୋର୍ଟ ବିଚାରପତି ଜଷ୍ଟିସ ଅରୁଣ କୁମାର ମିଶ୍ର। ଶୁକ୍ରବାର ସକାଳେ ସେ ଏହି କାରଣରୁ ଦୁଇ ନୂଆ ବିଚାରପତିଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେଇ ନ ପାରିବା ଭଳି ପରିସ୍ଥିତି ଉପୁଜିଥିଲା ବୋଲି ଦର୍ଶାଇଛନ୍ତି। ଏହି ପରିପ୍ରେକ୍ଷୀରେ ବାୟୁ ପ୍ରଦୂଷଣର ପ୍ରତିକାର ବ୍ୟବସ୍ଥା ଯଥାଯଥ ହେଉ ନ ଥିବାରୁ ସେ କ୍ଷୁବ୍ଧ ହୋଇଛନ୍ତି। ଜଷ୍ଟିସ ମିଶ୍ରଙ୍କୁ ସମର୍ଥନ କରି ଜଷ୍ଟିସ ଦୀପକ ଗୁପ୍ତା କହିଛନ୍ତି ଯେ ଏହି ସମସ୍ୟା ଲୋକଙ୍କ ଜୀବନ ବଞ୍ଚିବାର ଅଧିକାରକୁ କ୍ଷୁଣ୍ଣ କରୁଛି। ପ୍ରଦୂଷଣ ନିୟନ୍ତ୍ରଣ ତଦାରଖ ପାଇଁ ସୁପ୍ରିମକୋର୍ଟଙ୍କ ଦ୍ବାରା ନିଯୁକ୍ତ କୋର୍ଟ ମିତ୍ର (ଆମିକସ୍‌ କ୍ୟୁରୀ) ଅପରାଜିତା ସିଂହ ଦିଲ୍ଲୀ ଗ୍ୟାସ ଚାମ୍ବରରେ ପରିଣତ ହୋଇଥିବା ଦର୍ଶାଇବାରେ ଦୁଇ ବିଚାରପତି ଏହାକୁ ସମର୍ଥନ କରିଥିଲେ। ପ୍ରଦୂଷଣ ନିୟନ୍ତ୍ରଣ ବୋର୍ଡ ତଥା ସରକାରୀ କର୍ତ୍ତୃପକ୍ଷ ଏହାର ପ୍ରତିକାର ପାଇଁ ପଦକ୍ଷେପ ନେଉଥିବା କହୁଥିଲେ ମଧ୍ୟ ବାସ୍ତବତା ଭିନ୍ନ ବୋଲି ସେମାନେ ସ୍ବୀକାର କରିଥିଲେ। ଏଥିପାଇଁ ବାସ୍ତବରେ କିଭଳି କାର୍ଯ୍ୟାନୁଷ୍ଠାନ ଆବଶ୍ୟକ ଓ କ’ଣ ନିଆଯାଉଛି, ଏଥିପାଇଁ କିଛି ସ୍ବତନ୍ତ୍ର ଯୋଜନା ହୋଇଛି କି ନାହିଁ ତାହା ଜାଣିବାକୁ ସୁପ୍ରିମ କୋର୍ଟ ଚାହିଁଥିଲେ।