ବେଙ୍ଗାଲୁରୁ: ବେଙ୍ଗାଲୁରୁ ସିଟି ସିଭିଲ କୋର୍ଟ କନ୍ନଡ଼ ଅଭିନେତ୍ରୀ ତଥା କଂଗ୍ରେସର ପୂର୍ବତନ ସାଂସଦ ଦିବ୍ୟା ସ୍ପନ୍ଦନାଙ୍କ ଦ୍ୱାରା ଏସିଆନେଟ ଓ ତାର ସହାୟକ ଚ୍ୟାନେଲ ସୁବର୍ଣ୍ଣା ନିଉଜ ବିରୁଦ୍ଧରେ ଆଗତ ମାନହାନି ମାମଲାର ବିଚାର କରି ୫୦ଲକ୍ଷ ତାଙ୍କ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଅଭିଯୋଗ ମୁତାବକ, ଇଣ୍ଡିଆନ ପ୍ରିମିୟର ଲିଗରେ ଅନୈତିକ ଉପାୟରେ ଅର୍ଥ ଉପାର୍ଜନ କରିବା ଭଳି ଜୁଆ ଖେଳରେ ସ୍ପନ୍ଦନା ସାମିଲ ଥିବା ନେଇ ଏସିଆନେଟ ଓ ତାର ସହାୟକ ଚ୍ୟାନେଲ ସୁବର୍ଣ୍ଣା ନିଉଜ ସମ୍ବାଦ ପରିବେଷଣ କରିଥିଲା ଏବଂ ସ୍ପନ୍ଦନା ୨୦୧୩ରେ ଏ ନେଇ ମାନହାନି ମୋକଦ୍ଦମା ଦାୟର କରିଥିଲେ। ମେ ୩୧, ୨୦୧୩ରେ ପ୍ରସାରିତ ଏକ କାର୍ଯ୍ୟକ୍ରମରେ ସ୍ପଟ ଫିକସିଂ ଭଳି ଘଟଣାରେ ସ୍ପନ୍ଦନା ସାମିଲ ଥିବା ନେଇ ସମ୍ବାଦ ପରିବେଷଣ କରାଯାଇଥିଲା ଓ ସେଥିରେ ତାଙ୍କ ନାମ ବଦଳରେ ସ୍ପନ୍ଦନାଙ୍କ ଫଟୋ ପ୍ରଦର୍ଶନ କରାଯାଇଥିଲା।
ଏସିଆନେଟ ଓ ତାର ସହାୟକ ଚ୍ୟାନେଲ ସୁବର୍ଣ୍ଣା ନିଉଜ କୋର୍ଟଙ୍କୁ ଦର୍ଶାଇଥିଲେ ଯେ ପ୍ରସାରିତ କାର୍ଯ୍ୟକ୍ରମରେ ସ୍ପନ୍ଦନାଙ୍କ ନାମ ନିଆଯାଇ ନ ଥିବାରୁ ତାଙ୍କର କୌଣସି କ୍ଷତି ହେଉନାହିଁ, କିନ୍ତୁ କୋର୍ଟ ସେହି ଯୁକ୍ତିକୁ ଅଗ୍ରାହ୍ୟ କରି କହିଥିଲେ ଯେ ସ୍ପନ୍ଦନା ଆଇପିଏଲ ଟିମ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ବ୍ରାଣ୍ଡ ଆମ୍ବାସାଡ଼ର ଥିଲେ ଓ ବିଧାନସଭା ନିର୍ବାଚନରେ ପ୍ରଚାର ପାଇଁ ସେ ୨୦୧୩ ସିଜିନରେ ଭାଗ ନେଇ ନ ଥିଲେ। ଏଭଳି ଘଟଣାକୁ ସାମ୍ବାଦିକତାର ନୈତିକତା ଉଲ୍ଲଙ୍ଘନ ବୋଲି ଅଭିହିତ କରି ଏସିଆନେଟ ଓ ତାର ସହାୟକ ଚ୍ୟାନେଲ ସୁବର୍ଣ୍ଣା ନିଉଜକୁ ୫୦ଲକ୍ଷ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ସହ ସ୍ପନ୍ଦନାଙ୍କ ସନ୍ଦର୍ଭରେ ଆଇପିଏଲ ଫିକସିଂ ସମ୍ପର୍କିତ କୌଣସି ସମ୍ବାଦ ପ୍ରସାରଣ ଉପରେ ଆଜୀବନ ରୋକ ଲଗାଇଛନ୍ତି କୋର୍ଟ।
