ନିଖୋଜ ଥିଲେ ୨ ଶିଶୁ ; ସକାଳୁ କୂଅରୁ ମିଳିଲା ମୃତଦେହ

ଢେଙ୍କାନାଳ : କୂଅରେ ପଡି ଚାଲିଗଲା ୨ ଶିଶୁଙ୍କ ଜୀବନ। ଏଭଳି ଦୁଃଖଦ ଘଟଣା ଢେଙ୍କାନାଳ ଜିଲା ହିନ୍ଦୋଳ ବ୍ଲକ ମଧୁସାହୁ ପାଟଣା ବିମ୍ବୋଳି ଗାଁରେ ଘଟିଥିବା ରବିବାର ଜଣାପଡିଛି। ମୃତ ୨ ଶିଶୁ ନଟକଟା ଗାଁର ହୋଇଥିବା ବେଳେ ସେମାନଙ୍କ ବୟସ ୫ ଓ ୪ ବର୍ଷ ହେବ।
ସୂଚନା ଯୋଗ୍ୟ, ପରିବାର ଲୋକେ ପିଲାଙ୍କୁ ଘରେ ଛାଡି ବିଲକୁ ଧାନ କାଟିବାକୁ ଯାଇଥିଲେ। ଶନିବାର ସନ୍ଧ୍ୟାରୁ ଉଭୟ ଶିଶୁ ନିଖୋଜ ଥିଲେ। ଏହାପରେ ସେମାନଙ୍କୁ ଅନେକ ଖୋଜାଖୋଜି କରିବା ପରେ ମଧ୍ୟ କୌଣସି ସୂଚନା ମିଳିନଥିଲା। ଏହାପରେ ପରିବାର ଲୋକେ ପୁଲିସକୁ ଖବର ଦେଇଥିଲେ। ସକାଳେ କୂଅରେ ୨ ଶିଶୁଙ୍କ ମୃତଦେହ ଦେଖି ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ। ରବିବାର କୂଅରୁ ସେମାନଙ୍କ ମୃତଦେହ ଉଦ୍ଧାର କରାଯାଇଛି। ଏହି ଘଟଣାରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ପୁଲିସ ଘଟଣାର ତଦନ୍ତ ଜାରି ରଖିଛି।