ଧର୍ମଗଡ଼: ଆମପାଣି ପୁଲିସ ଦ୍ବାରା ଏକ ସାର ବୋଝେଇ ଟ୍ରକ ଜବତ ହୋଇଛି । ଓଡି ୨୪-ଜି ୮୭୯୨ ନମ୍ବର ବିଶିଷ୍ଟ ଟ୍ରକଟି ସାର ନେଇ ନବରଙ୍ଗପୁର ଜିଲ୍ଲା ଯାଉଥିବା ବେଳେ ରାତ୍ରୀକାଳୀନ ପାଟ୍ରୋଲିଂ ଦାୟିତ୍ଵରେ ଥିବା ପୁଲିସ ଟ୍ରକ୍ଟିକୁ ଅଟକାଇଥିଲା । ଗାଡ଼ିରେ ଥିବା ନସିରୁଦ୍ଦିନ ନାମକ ଜନୈକ ଡ୍ରାଇଭର କୌଣସି କାଗଜପତ୍ର ଦେଖେଇ ନପାରିବାରୁ ପୁଲିସ ଗାଡିଟିକୁ ଅଟକ ରଖି ସକାଳେ କୃଷି ବିଭାଗକୁ ସୂଚନା ଦେଇଥିଲା । କୃଷି ଅଧିକାରୀମାନେ ଆମପାଣି ଯାଇ ଯାଞ୍ଚ କରିଥିଲେ ।
ଯାଞ୍ଚ ସମୟରେ ଗାଡିରୁ ୩୧୪ ବସ୍ତା ଇଫକୋ ୟୁରିଆ,୩୦ବସ୍ତା ଆଇପିଏଲ ୟୁରିଆ ଏବଂ ୬ବସ୍ତା ମାଟ୍ରିକ ଡକ୍ଟର ସଫଳ ୟୁରିଆ ଥିବା ଜଣାପଡିଛି। ତେବେ ରାତି ୯ଟାରୁ ଅପରାହ୍ନ ୩ଟା ବିତିଯାଇଥିଲେ ବି କେବଳ ଡ୍ରାଇଭରର ନାଁ ଓ ବସ୍ତା ସଂଖ୍ୟା ବ୍ୟତୀତ ସାର କେଉଁ ଠାରୁ ଆସୁଥିଲା ? କାହା ଗୋଦାମରୁ ଆସୁଥିଲା ? କାହା ନାଁରେ କେଉଁଠାକୁ ଯାଉଥିଲା ? ସଂପୃକ୍ତ ସାର ବ୍ୟବସାୟୀଙ୍କ ଜିଲ୍ଲା ବାହାରକୁ ସାର ପରିବହନ ଅନୁମତି ଅଛି କି ନାହିଁ ଏନେଇ କୌଣସି ତଦନ୍ତ ହୋଇନାହିଁ । ଘଟଣାସ୍ଥଳରେ ଉପସ୍ଥିତ କୃଷି ଅଧିକାରୀମାନଙ୍କୁ ପଚାରିଲେ କିଛି କହୁନଥିବାବେଳେ କୃଷି ବିଭାଗ ଏତଲା ଦେବା ପରେ ତଦନ୍ତ ଆରମ୍ଭ ହେବ ବୋଲି ଆମପାଣି ପୁଲିସ କହିଛି।
Comments are closed.