ଗୁରୁଡିଝାଟିଆ : ପ୍ରଭୁ ଧବଳେଶ୍ୱରଙ୍କୁ ଦର୍ଶନ କରିବା ପାଇଁ ନିର୍ମିତ କଂକ୍ରିଟ ସେତୁ ଉପରେ ଅସ୍ଥାୟୀ ଭାବେ ନିର୍ମିତ ହୋଇଛି ବାଉଁଶ ବ୍ୟାରିକେଟ । ଶ୍ରାବଣମାସରେ ହଜାର ହଜାର ଶ୍ରଦ୍ଧାଳୁ ଦର୍ଶନ ପାଇଁ ଆସୁଥିବାରୁ ଦେବୋତ୍ତର ପ୍ରଶାସନ ପକ୍ଷରୁ ଅସ୍ଥାୟୀ ବାଉଁଶ ବ୍ୟାରିକେଟ ନିର୍ମାଣ କରାଯାଇଛି । ଗୋଟିଏ ପାର୍ଶ୍ବରେ ଯିବା ଓ ଅନ୍ୟ ପଟରେ ଆସିବା ବ୍ୟବସ୍ଥା କରାଯାଇଛି । ଯାହା ଦ୍ବାରା କାଉଡିଆ ଓ ଶ୍ରଦ୍ଧାଳୁମାନଙ୍କ ଭିଡକୁ ନିୟନ୍ତ୍ରଣ କରାଯାଇପାରୁଛି । ହେଲେ କଂକ୍ରିଟ ସେତୁ ମଝିରେ ନିର୍ମିତ ବ୍ୟାରିକେଟ କିଛି ଅଂଶ ଭାଙ୍ଗିଯାଇ ସେତୁ ଉପରେ ପଡିଥିବାରୁ ଶ୍ରଦ୍ଧାଳୁମାନଙ୍କ ଯାତାୟାତରେ ଘୋର ଅସୁବିଧା ହେଉଛି । ବରିଷ୍ଠ ନାଗରିକ ଓ ଶିଶୁମାନେ ଘୋର ଅସୁବିଧାର ସମ୍ମୁଖିନ ହେଉଛନ୍ତି । ବିଶେଷତଃ ମହିଳାମାନେ ପଡି ଆହତ ହେବା ଦେଖାଦେଇଛି। ସେତୁର ପ୍ରବେଶ ପଥରେ ପୁଲିସ ସହାୟକ କେନ୍ଦ୍ର ରହିଛି । ତତ୍ ସହିତ ସାଇକେଲ ଷ୍ଟାଣ୍ଡ ନିଲାମ ନେଇଥିବା ଲୋକ ମଧ୍ୟ ବସୁଛନ୍ତି । ହେଲେ ସେତୁ ଉପରେ ଭାଙ୍ଗିଯାଇଥିବା ବ୍ୟାରିକେଟ ସଜଡା ହେଉ ନଥିବାରୁ ଶ୍ରଦ୍ଧାଳୁମାନେ ଘୋର ଅସନ୍ତୋଷ ବ୍ୟକ୍ତ କରୁଛନ୍ତି। ଏଥିରୁ ସ୍ପଷ୍ଟ ବାରିହୋଇ ପଡୁଛି ଉପଖଣ୍ଡ ପ୍ରଶାସନ ଓ ଦେବୋତ୍ତର ବିଭାଗ ମଧ୍ୟରେ ତତ୍ପରତା କେତେ ? ଏ ସଂପର୍କରେ ସହକାରୀ ଦେବୋତ୍ତର ଅଧିକାରୀ ଆଠଗଡ ତଥା ତହସିଲଦାର ପ୍ରିୟବ୍ରତ ଦାସଙ୍କୁ ପଚାରିବାରୁ ତୁରନ୍ତ ପଦକ୍ଷେପ ଗ୍ରହଣ କରିବା ନିମନ୍ତେ କହିଥିଲେ।
Comments are closed.