ଅଦ୍ଭୁତ ମନ୍ଦିର.. ଜାଣନ୍ତୁ କାହିଁକି ଏଠାରେ ପ୍ରଭୁ ହନୁମାନଙ୍କୁ ଡାକ୍ତର ରୂପେ କରାଯାଏ ପୂଜାର୍ଚ୍ଚନା
ନୂଆଦିଲ୍ଲୀ : ଭାରତରେ ଅନେକ ଅଦ୍ଭୁତ ମନ୍ଦିର ରହିଛି। ଯାହା ସହ ବିଭିନ୍ନ ମାନ୍ୟତା ଓ ଆଶ୍ଚର୍ଯ୍ୟଜନକ କଥା ଜଡିତ ରହିଛି। ଅଦ୍ଭୁତ ଓ ଚମତ୍କାରୀ ମନ୍ଦିର ବିଷୟରେ ଜାଣିବାକୁ ସଭିଁଙ୍କ ଉତ୍ସାହ ରହିଥାଏ। ମଧ୍ୟପ୍ରଦେଶର ଭିଣ୍ଡ୍ ଜିଲାର ଦନ୍ଦରୌଆ ଧାମରେ ଏଭଳି ଏକ ଅଦ୍ଭୁତ ମନ୍ଦିର ରହିଛି, ଯାହା ବିଷୟରେ ଜାଣି ଆଶ୍ଚର୍ଯ୍ୟ ହୋଇଯିବେ। ଏହି ମନ୍ଦିରରେ ଭୟ ଓ ରୋଗର ନାଶକ, ସଙ୍କଟ ଦୂର କରୁଥିବା ଭଗବାନ ରାମଙ୍କ ଭକ୍ତ ପ୍ରଭୁ ହନୁମାନଙ୍କୁ ଡାକ୍ତର ରୂପରେ ପୂଜାର୍ଚ୍ଚନା କରାଯାଏ। କାହିଁକି ଏଠାରେ ପ୍ରଭୁଙ୍କୁ ଡାକ୍ତର ଭାବେ ପୂଜା କରାଯାଏ, ତାହାର ରହସ୍ୟ ଓ ମାନ୍ୟତା ବିଷୟରେ ଜାଣନ୍ତୁ..
ଡାକ୍ତର ହନୁମାନ ମନ୍ଦିର ସହ ଜଡିତ ଏକ ରୋଚକ କାହାଣୀ ରହିଛି। ମାନ୍ୟତା ଅନୁଯାୟୀ ବହୁ ବର୍ଷ ପୂର୍ବେ ଏଠାରେ ଜଣେ ସାଧୁ ରହୁଥିଲେ। ତାଙ୍କ ନାଁ ଶିବକୁମାର ଦାସ ଥିଲା। ସେ ପ୍ରଭୁ ହନୁମାନଙ୍କର ଭକ୍ତ ଥିଲେ। ସେ କର୍କଟ ରୋଗରେ ପୀଡିତ ଥିଲେ। ଶିବକୁମାର ପ୍ରତ୍ୟେକ ଦିନ ମନ୍ଦିର ଯାଇ ପ୍ରଭୁ ହନୁମାନଙ୍କୁ ଶ୍ରଦ୍ଧାର ସହ ପୂଜାର୍ଚ୍ଚନା କରୁଥିଲେ। ଦିନେ ବଇଦ ରୂପରେ ପ୍ରଭୁ ହନୁମାନ ସାଧୁ ଶିବକୁମାରଙ୍କୁ ଦର୍ଶନ ଦେଇ ତାଙ୍କ ଚିିକିତ୍ସା କରିବା ସହ ସମ୍ପୂର୍ଣ୍ଣ ସୁସ୍ଥ କରି ଦେଇଥିଲେ। ପ୍ରଭୁ ହନୁମାନଙ୍କ ମହିମା ଧିରେ ଧିରେ ସମଗ୍ର ଅଞ୍ଚଳରେ ବ୍ୟାପି ଯାଇଥିଲା। ସେହିଦିନଠାରୁ ପ୍ରଭୁ ହନୁମାନଙ୍କୁ ଡାକ୍ତର ରୂପରେ ଏଠାରେ ପୂଜାର୍ଚ୍ଚନା କରାଯାଏ।
ପ୍ରତ୍ୟେକ ମଙ୍ଗଳବାର ଓ ଶନିବାର ଲୋକେ ଏଠାରେ ପ୍ରଭୁଙ୍କୁ ପୂଜାର୍ଚ୍ଚନା କରି ଆରୋଗ୍ୟ ଓ ସୁସ୍ଥ ଜୀବନର କାମନା କରିଥାନ୍ତି। ମାନ୍ୟତା ଅନୁଯାୟୀ ପ୍ରଭୁ ହନୁମାନ ଭକ୍ତଙ୍କ ମନସ୍କାମନା ପୂରଣ କରି ଥାନ୍ତି। କେବଳ ଦେଶ ନୁହେଁ ବରଂ ବିଦେଶରୁ ମଧ୍ୟ ଲୋକେ ଏଠାକୁ ଆସି ପ୍ରଭୁଙ୍କ ଦର୍ଶନ କରି ଥାନ୍ତି। ଉତ୍ତମ ସ୍ୱାସ୍ଥ୍ୟ କାମନା କରି ଥାନ୍ତି।
Comments are closed.