ଚେନ୍ନଇ : ବଙ୍ଗୋପସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ଼ ‘ଗଜ’ ଗୁରୁବାର ତାମିଲନାଡୁ ଉପକୂଳ ଛୁଇଁବ ବୋଲି ଆଶା କରାଯାଉଛି। ଭାରତୀୟ ପାଣିପାଗ ବିଭାଗ (ଆଇଏମ୍ଡି) ସୂଚନା ଅନୁସାରେ ଗଜ ପ୍ରଭାବରେ ତାମିଲନାଡୁ ଏବଂ ପୁଡୁଚେରୀରେ ପ୍ରବଳରୁ ଅତିପ୍ରବଳ ବର୍ଷା ହେବାର ସମ୍ଭାବନା ରହିଛି। ଫଳରେ ତାମିଲନାଡୁ ଏବଂ ପୁଡୁଚେରୀ ସରକାର ରାଜ୍ୟରେ ସତର୍କ ସୂଚନା ଜାରି କରିବା ସହ ସମସ୍ତ ସ୍କୁଲ ଓ କଲେଜ ଛୁଟି ଘୋଷଣା କରିଛନ୍ତି। ବାତ୍ୟାର ମୁକାବିଲା ପାଇଁ ପ୍ରଶାସନିକସ୍ତରରେ ପ୍ରସ୍ତୁତି ଆରମ୍ଭ ହୋଇଛି। ରାଜ୍ୟ ସରକାର ବିଭାଗୀୟ ଅଧିକାରୀଙ୍କୁ ସଜାଗ ରହିବାକୁ ନିର୍ଦେଶ ଦେଇଛନ୍ତି।
ପାଣିପାଗ ବିଭାଗ ଅନୁସାରେ ତାମିଲନାଡୁର ଉତ୍ତର ଏବଂ ଦକ୍ଷିଣ ଉପକୂଳବର୍ତ୍ତି ଅଞ୍ଚଳରେ ବୁଧବାର ସନ୍ଧ୍ୟାରୁ ବର୍ଷା ଆରମ୍ଭ ହେବ। ତାମିଲନାଡୁର କୁଡ୍ଡାଲୋର, ନାଗାପାଟ୍ଟିନମ, ଥିରୁଭାରୁର, ଥୁଥୁକୁଡ଼ି, ଥାଞ୍ଜାଭୁର, ରାମନାଥାପୁରମ ଜିଲାରେ ମୂଷଳଧାରରେ ବର୍ଷା ହେବାର ସମ୍ଭାବନା ରହିଛି। ତେଣୁ ନଭେମ୍ବର ୧୩ରୁ ନଭେମ୍ବର ୧୫ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ର ମଧ୍ୟକୁ ନଯିବାକୁ ଚେତାବନୀ ଦିଆଯାଇଛି। ତାମିଲନାଡୁରେ ଏନ୍ଡିଆରଏଫର ୯ଟି ଏବଂ ପୁଡୁଚେରୀରେ ୨ଟି ଦଳ ସଜାଗ (ଆଲର୍ଟ)ରେ ରଖାଯାଇଛି। ତାମିଲନାଡୁ ସରକାର ରାଜ୍ୟ ଉଦ୍ଧାରକାରୀ ଦଳ (ଏସ୍ଡିଆରଏଫ)କୁ ସଜାଗ ରହବାକୁ ନିର୍ଦେଶ ଦେଇଛନ୍ତି।
ସେପଟେ ପୁଡୁଚେରୀ ମୁଖ୍ୟମନ୍ତ୍ରୀ ନରାୟଣସ୍ୱାମୀ ବୁଧବାର ସାମୁଦ୍ରିକ ଝଡ଼ ନେଇ ଏକ ଜରୁରୀ ବୈଠକ ଡାକିଥିଲେ। ମୁଖ୍ୟମନ୍ତ୍ରୀ ପ୍ରଶାସନିକ ଅଧିକାରୀଙ୍କୁ ସଜାଗ ରହିବାକୁ ନିର୍ଦେଶ ଦେଇଛନ୍ତି।
ଗୁରୁବାର ତାମିଲନାଡୁ ଛୁଇଁବ ‘ଗଜ’, ସ୍କୁଲ ଓ କଲେଜ ଛୁଟି ଘୋଷଣା
Popular Categories
Previous article
Next article