ବେଗୁନିଆ: ସମ୍ଭାବ୍ୟ ଲଘୁଚାପ ପ୍ରଭାବରେ ରାଜ୍ୟ ତଥା ଖୋର୍ଦ୍ଧା ଜିଲ୍ଲାରେ ଆସନ୍ତା ୨ ତାରିଖଠାରୁ ଲଗାଣ ବର୍ଷାର ସମ୍ଭାବନା ଥିବାରୁ ଫସଲର ସୁପରିଚାଳନା ପାଇଁ କୃଷି ଜିଲ୍ଲା ଅଧିକାରୀଙ୍କ ସୌଜନ୍ୟରେ ବେଗୁନିଆ କୃଷି ବିଭାଗ ତରଫରୁ ବ୍ଲକର ସମସ୍ତ ପଞ୍ଚାୟତରେ ମାଇକ ଯୋଗେ ପ୍ରଚାର କରାଯାଇ ଲୋକମାନଙ୍କୁ ସଚେତନ କରାଯାଉଛି। ବ୍ଲକ କୃଷି ଅଧିକାରୀ ଗଣେଶ୍ୱର ରଥ କହିଛନ୍ତି ଯେ ବର୍ଷା ଆରମ୍ଭ ପୂର୍ବରୁ ୮୫% ପାଚିଯାଇଥିବା ଧାନ ତୁରନ୍ତ କାଟିନେଇ ଅମଳହେବା ପୂର୍ବରୁ ଏବଂ ପରେ ସୁରକ୍ଷିତ ରଖନ୍ତୁ । ଧାନ କାଟି ବିଲରେ ଶୁଖାଇ ରଖନ୍ତୁ ନାହିଁ । କଟା ହୋଇଥିବା ଧାନକୁ ବେଙ୍ଗଳା ପକାଇ ରଖନ୍ତୁ । ସମସ୍ତ କଟାଧାନ ଅମଳ ସମ୍ଭବ ନହେଲେ ପଲିଥିନ ଘୋଡାଇ ସୁରକ୍ଷିତ ରଖନ୍ତୁ । ପନିପରିବା ଅମଳ ପାଇଁ ଉପଯୁକ୍ତ ହୋଇଥିଲେ ତୁରନ୍ତ ଅମଳ ଓ ବିକ୍ରୟ କରନ୍ତୁ । ପନିପରିବା ତଥା ରବି ଫସଲରେ ଜଳ ନିଷ୍କାସନ କରିବା ପାଇଁ ତୁରନ୍ତ ଆବଶ୍ୟକୀୟ ପଦକ୍ଷେପ ନିଅନ୍ତୁ । ସମସ୍ତ ରବି ଫସଲ ଲଗାଇବା କିମ୍ବା ବୁଣିବା ସାମୟିକ ଭାବେ ବନ୍ଦ ରଖନ୍ତୁ ।କୀଟନାଶକ ଔଷଧ ସିଞ୍ଚନ ଓ ଜଳସେଚନ ସାମୟିକ ଭାବେ ବନ୍ଦ ରଖିବା ପାଇଁ ଚାଷୀମାନଙ୍କୁ ପରାମର୍ଶ ଦିଆଯାଇଛି । ଏହି କ୍ରମରେ ଆଜି ଆତ୍ମାର ଅଧ୍ୟକ୍ଷ ଶ୍ରୀନିବାସ ପାଇକରାୟ ସଚେତନତା ରଥକୁ ଉଦଘାଟନ କରିଥିଲେ । ବ୍ଲକ କୃଷି ଅଧିକାରୀ ଗଣେଶ୍ୱର ରଥ, ଓଭରସିୟର ଶ୍ୟାମସୁନ୍ଦର ବେହେରା ଏବଂ ଅତିରିକ୍ତ କୃଷି ଅଧିକାରୀ ସୀତାରତ୍ନମାଳା ଦାସ ଉପସ୍ଥିତ ଥିଲେ ।
Popular Categories
Previous article
Next article