ନୂଆଦିଲ୍ଲୀ : ନୂଆଦିଲ୍ଲୀଠାରେ କଂଗ୍ରେସ କାର୍ଯ୍ୟକାରିଣୀ କମିଟିର ବୈଠକ ଆରମ୍ଭ ହୋଇଛି । ରବିବାର ଆରମ୍ଭ ହୋଇଥିବା ଏହି ବୈଠକରେ ଦଳର ଅଧ୍ୟକ୍ଷ ରାହୁଲ ଗାନ୍ଧୀ ଅଧ୍ୟକ୍ଷତା କରିଛନ୍ତି ।
ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ଏବଂ ଗୁଲାମ ନବୀ ଆଜାଦଙ୍କ ଭଳି ଅନେକ ବରିଷ୍ଠ ନେତା ଏହି ବୈଠକରେ ଯୋଗ ଦେଇଛନ୍ତି । ଦଳର ସମସ୍ତ ରାଜ୍ୟ ସଭାପତି ଏବଂ ବିଧାୟକ ଦଳ ନେତା ପ୍ରମୁଖ ମଧ୍ୟ ବୈଠକରେ ଅଂଶଗ୍ରହଣ କରୁଛନ୍ତି ।
ନବଗଠିତ ସିଡବ୍ଲୁସିରେ ଏବେ ମୋଟ୍ ୨୩ ଜଣ ସ୍ଥାୟୀ ସଦସ୍ୟ ଥିବାବେଳେ ୧୮ ଜଣ ସ୍ଥାୟୀ ଆମନ୍ତ୍ରିତ ସଦସ୍ୟ ଏବଂ ୧୦ ଜଣ ଆମନ୍ତ୍ରିତ ସଦସ୍ୟ ଅଛନ୍ତି । ଦଳର ଅଧ୍ୟକ୍ଷ ଦାୟିତ୍ୱ ଗ୍ରହଣ ପରେ ଶ୍ରୀ ଗାନ୍ଧୀଙ୍କ ଦ୍ୱାରା ଏହା ହେଉଛି ନବ ଗଠିତ କଂଗ୍ରେସ କାର୍ଯ୍ୟକାରୀ କମିଟିର ପ୍ରଥମ ବୈଠକ।
ତେବେ ଏହି ନବଗଠିତ ସିଡବ୍ଲୁସିରୁ ଦିଗ୍ବିଜୟ ସିଂ, ଜନାର୍ଦ୍ଦନ ଦ୍ୱିବେଦୀ, କମଲନାଥ, ସୁଶୀଲ କୁମାର ସିନ୍ଧେ, ମୋହନ ପ୍ରକାଶ ଏବଂ ସି.ପି. ଯୋଶୀଙ୍କ ଭଳି ବରିଷ୍ଠ ନେତାଙ୍କୁ ବାଦ ଦିଆଯାଇଛି । ଦଳର ଭବିଷ୍ୟତ କାର୍ଯ୍ୟ ପନ୍ଥା ଉପରେ ବିଚାର ବିମର୍ଶ ପାଇଁ ସିଡବ୍ଲୁସି ହେଉଛି କଂଗ୍ରେସର ସର୍ବୋଚ୍ଚ ନୀତି ନିର୍ଦ୍ଧାରଣକାରୀ କମିଟି।
