ଭୁବନେଶ୍ବର : ଆସାମ ପୁଲିସ ସହାୟତାରେ କ୍ରାଇମବ୍ରାଞ୍ଚ ସ୍ପେଶାଲ ଟାସ୍କଫୋର୍ସ (ଏସଟିଏଫ) ଗୌହାଟୀରୁ ଜଣେ ଆନ୍ତଃରାଜ୍ୟ ନିଶା ଚାଲାଣକାରୀକୁ ଗିରଫ କରିବାରେ ସକ୍ଷମ ହୋଇଛି। ଗିରଫ ଅଭିଯୁକ୍ତ ହେଲା ଗୌହାଟୀ ମଣିପୁର ଅଞ୍ଚଳର ସଲିମ ଅହମ୍ମଦ। ଗତ ଡିସେମ୍ବର ୩ ତାରିଖରେ ଏସଟିଏଫ ଗୋଟିଏ କାର ସହ ୧ କେଜି ୩୩୫ ଗ୍ରାମ ଓଜନର ଧଳାଜହର ଜବତ କରିବା ସହ ୨ ଜଣଙ୍କୁ ଗିରଫ କରିଥିଲା। ଏହି କାରବାରର ମାଷ୍ଟରମାଇଣ୍ଡ ସଲିମ ବୋଲି ଜଣାପଡିଥିଲା। ହେଲେ ସେହିଦିନ ଠାରୁ ସଲିମ ଫେରାର ରହିଥିଲା।ରାଜ୍ୟରେ ନିଶା କାରବାର ରୋକିବା ପାଇଁ ଏସଟିଏଫ ଗତ ୨ ବର୍ଷ ହେବ ସ୍ବତନ୍ତ୍ର ଅଭିଯାନ ଚଳାଇଛି। ଧଳାଜହର କାରବାରର ହବ୍ ବାଲେଶ୍ବର ଓ ଜଳେଶ୍ବରରେ ଚଢ଼ଉ କରୁଛି। କେଜି େକଜି ଓଜନର ଧଳାଜହର ସହ ବ୍ୟବସାୟୀଙ୍କୁ ଗିରଫ କରୁଛି। ଯେତେ ଧରିଲେ ମଧ୍ୟ ଧଳାଜହର କାରବାର ରୋକିବା ଏସଟିଏଫ ପାଇଁ କଷ୍ଟକର ବ୍ୟପାର ହୋଇଛି। ଓଡ଼ିଶା ସୀମାନ୍ତରେ ଚାଲାଣକାରୀଙ୍କ ଉପରେ ଅଙ୍କୁଶ ନ ରହିବା ଏହାର ମୁଖ୍ୟ କାରଣ ପାଲଟିଛି। ଏପରିସ୍ଥଳେ ଧଳାଜହର ଚାଲାଣକାରୀଙ୍କୁ ଧରିବା ପାଇଁ ଏସଟିଏଫ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି। ଗିରଫ ସଲିମ ନାମରେ ଏସଟିଏଫରେ ମାମଲା ରହିଥିଲା। ତାକୁ ଧରିବା ପାଇଁ ଏସଟିଏଫର ଗୋଟିଏ ଦଳ ଆସାମରେ ଗତ ୨ ମାସ ହେବ ଡେରା ପକାଇଥିଲା। ଶେଷରେ ସ୍ଥାନୀୟ ପୁଲିସ ସହାୟତାରେ ସଲିମକୁ ଧରିବାରେ ଏସଟିଏଫ ସଫଳ ହୋଇଥିଲା। ସ୍ଥାନୀୟ ଅଦାଲତରେ ଅଭିଯୁକ୍ତକୁ ହାଜର କରିବା ପରେ ଗମନାଗମନ ଜିମାରେ ଏସଟିଏଫ ତାକୁ ଓଡ଼ିଶା ଆଣିଛି।
Popular Categories
Previous article
Next article