ବୌଦ୍ଧରୁ ପୁଣି ୫ କରୋନା ରୋଗୀ ଚିହ୍ନଟ ; ପୁରୁଣାକଟକରୁ ଜଣେ

ହରଭଙ୍ଗା : ବୌଦ୍ଧ ଜିଲାରେ ରବିବାର ଆଉ ନୂଆ ୫ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେଥିମଧ୍ୟରୁ ଜଣେ ହରଭଙ୍ଗା ବ୍ଲକ ପୁରୁଣାକଟକ ନିଉ କୋଲୋନୀ ସାହିର ଜଣେ ଏସ.ବି.ଆଇ କର୍ମଚାରୀ ବୋଲି ଜଣାପଡିଛି। ତାଙ୍କୁ ମିଶାଇ ବ୍ଲକରେ ସ୍ଥାନୀୟ ସଂକ୍ରମିତ ସଂଖ୍ୟା-୧୫ରେ ପହଞ୍ଚିଛି। ସଂକ୍ରମିତ ଏସ.ବି.ଆଇ କର୍ମଚାରୀଙ୍କୁ ଆଜି ସକାଳେ ବୌଦ୍ଧ କୋଭିଡ କେୟାର ସେଣ୍ଟରକୁ ଚିକିତ୍ସା ପାଇଁ ପଠାଯାଇଛି। ସେହି ଅଂଚଳକୁ ଆଜିଠାରୁ ଆସନ୍ତା ୭୨ ଘଂଟା ପର୍ଯ୍ୟନ୍ତ କଂଟେନମେଟ ଜୋନ ଭାବେ ଘୋଷଣା କରାଯାଇଛି। ସଂକ୍ରମିତ କର୍ମଚାରୀ ଜଣଙ୍କ ଫୁଲବାଣୀ ଏସ.ବି.ଆଇ ଶାଖାରେ କାର୍ଯ୍ୟ କରନ୍ତି। ସେ ଦୀର୍ଘ ଦିନ ହେଲା ଘରେ ଛୁଟିରେ ଥିଲେ। ଦେହ ଭଲ ନ ଲାଗିବାରୁ ସେ ତିନିଦିନ ତଳେ ନିଜ ପଟୁ ବୌଦ୍ଧ ଯାଇ ନିଜର କୋଭିଡ ପରୀକ୍ଷା କରାଇଥିଲେ। ତାଙ୍କ ରିପୋର୍ଟ ପଜିଟିଭ ଆସିବା ପରେ ସେ ସଂକ୍ରମିତ ଥିବା ଜଣାପଡିଥିଲା। ସ୍ୱାସ୍ଥ୍ୟ ବିଭାଗ ଟିମ ତାଙ୍କ କଂଟାକ୍ଟ ଟ୍ରେସିଂ ଆଧାରରେ ରିପୋର୍ଟ ସଂଗ୍ରହ କରିଥିବା ଜଣାପଡିଛି। ଆଜି ସକାଳେ ହରଭଙ୍ଗା ବି.ଡି.ଓ ନୀଳକଣ୍ଠ ବେହେରା, ବ୍ଲକ ନୋଡାଲ ଅଧିକାରୀ ଅର୍ଜ୍ଜୁନ ଗଡନାୟକ ପ୍ରମୁଖ ସଂକ୍ରମିତ ଅଂଚଳ ପରିଦର୍ଶନ କରିଥିଲେ।