ନୂଆଦିଲ୍ଲୀ : ଭାରତରେ କରୋନା ଭୂତାଣୁ(ଭାଇରସ୍) ସଂକ୍ରମିତଙ୍କ ସଂଖ୍ୟା ୧୩୭କୁ ବୃଦ୍ଧି ପାଇଛି ଏବଂ ୫୭୦୦ ରୁ ଅଧିକ ଲୋକଙ୍କ ଉପରେ ନଜର ରଖାଯାଉଛି। ଏଥି ସହିତ ମୁମ୍ବଇର କସ୍ତୁରବା ହସ୍ପିଟାଲରେ ମଙ୍ଗଳବାର ଜଣେ ୬୪ ବର୍ଷ ବୟସ୍କ ବ୍ୟକ୍ତିଙ୍କ ମୃତ୍ୟୁ ଘଟିଛି, ଯାହା ଦେଶରେ ଏପର୍ଯ୍ୟନ୍ତ ତୃତୀୟ ମୃତ୍ୟୁ ଅଟେ। ପୂର୍ବରୁ କର୍ଣ୍ଣାଟକ ଓ ଦିଲ୍ଲୀରେ ଜଣେ ଲେଖାଏ କରୋନା ଆକ୍ରାନ୍ତଙ୍କ ମୃତ୍ୟୁ ଘଟିଥିଲା। ଗତକାଲି କରୋନା ରୋଗୀଙ୍କ ସଂଖ୍ୟା ୧୧୪ ଥିବା ବେଳେ ଆଜି ଏହା ୧୩୭ରେ ପହଞ୍ଚିଛି। ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ସର୍ବାଧିକ ମହାରାଷ୍ଟ୍ରରେ ୩୯ ଜଣ ରହିଛନ୍ତି। ଏମାନଙ୍କ ମଧ୍ୟରେ ୩ ଜଣ ବିଦେଶୀ ନାଗରିକ। କରୋନା ଆକ୍ରାନ୍ତଙ୍କ ମଧ୍ୟରୁ ୧୪ ଜଣ ସୁସ୍ଥ ହୋଇ ଘରକୁ ଫେରିଥିବା ଜଣାପଡ଼ିଛି।
ଏହିଭଳି ସମୟରେ “ଗୋ ଏୟାର” ବିମାନ କମ୍ପାନି ତାର କର୍ମଚାରୀଙ୍କୁ ଛୁଟିରେ ପଠାଇବାକୁ ନିଷ୍ପତ୍ତି ନେଇଛି। ଏହାସହିତ ରେଳବାଇ ପକ୍ଷରୁ ୩୧ଟି ଟ୍ରେନକୁ ବାତିଲ କରିଦିଆଯାଇଛି।
