ଭୁବନେଶ୍ବର: ବିନା ପରୀକ୍ଷାରେ ପ୍ରବାସୀ ନିଜ ରାଜ୍ୟକୁ ଫେରି ପାରିବେ ନାହିଁ ବୋଲି ହାଇକୋର୍ଟଙ୍କ ନିର୍ଦେଶ ପରେ ତତ୍ପର ହୋଇଛନ୍ତି ରାଜ୍ୟ ପ୍ରଶାସନ । ସୁରତରୁ ଆସୁଥିବା ୩ଟି ଟ୍ରେନକୁ ସେହିଠାରେ ଅଟକାଇ ଦିଆଯିବାକୁ ବ୍ୟବସ୍ଥା ହୋଇଛି । ଅନ୍ୟପକ୍ଷରେ ଅନ୍ୟ ରାଜ୍ୟରୁ ଖୋର୍ଧା ଜିଲାର ବିଭିନ୍ନ ସ୍ଥାନକୁ ଆସୁଥିବା ୩ଟି ବସ (ଟ୍ରାଭଲର ମିନି ବସ) ଭୁବନେଶ୍ବର ସୀମାନ୍ତରେ ଅଟକାଇ ଲୋକମାନଙ୍କର କରୋନା ପରୀକ୍ଷା କରାଯାଇଛି ।
ସୂଚନା ଅନୁସାରେ ଆଜି ବିଳମ୍ବିତ ସନ୍ଧ୍ୟାରେ ୩ଟି ଗାଡ଼ିରେ କିଛି ପ୍ରବାସୀ ଖୋର୍ଧା ଓ ନୟାଗଡ଼ ଆସୁଥିବା ସୂଚନା ପ୍ରଶାସନ ନିକଟରେ ପହଞ୍ଚିଥିଲା । ପୁଲିସ ଓ ପ୍ରଶାସନିକ ଅଧିକାରୀମାନେ ଭୁବନେଶ୍ବର ପ୍ରବେଶ ପଥ ପଳାଶୁଣିଠାରେ ଅପେକ୍ଷା କରି ରହିଥିଲେ । ଗାଡ଼ି ୩ଟି ପହଞ୍ଚିବାକ୍ଷଣି ସେଠାରେ ସମସ୍ତଙ୍କର ଯାଞ୍ଚ କରାଯାଇଥିବା ସୂଚନା ମିଳିଛି । ଏହି ୩ଟି ଗାଡ଼ିରେ ପ୍ରାୟ ୬୦ ଜଣ ଓଡ଼ିଶା ଆସୁଥିଲେ ।
