ଜୈବ ବିବିଧତା ଜୀବନର ଆଧାର : ମାଧବ ଗାଡଗିଲ

ଭୁବନେଶ୍ବର : ପ୍ରାକୃତିକ ସମ୍ପଦ ଏବେ ବି ପବିତ୍ର, ଜୈବ ବିବିଧତାକୁ ଆଧାର କଲେ ଲୋକମାନେ କେବେ ବି ବିଚ୍ଛିନ୍ନ ହୋଇପାରିବେ ନାହିଁ ବୋଲି ବୈଜ୍ଞାନିକ ପଦ୍ମଭୂଷଣ ପ୍ରଫେସର ମାଧବ ଧନଞ୍ଜୟ ଗାଡଗିଲ କହିଛନ୍ତି। ଓଡିଶା ପରିବେଶ କଂଗ୍ରେସର ୧୧ତମ ଅଧିବେଶନକୁ ଉଦଘାଟନ କରି ପ୍ରଫେସର ଗାଡଗିଲ କହିଥିଲେ ଯେ ଏଥିପାଇଁ ସାମୂହିକ ଉଦ୍ୟମର ଆବଶ୍ୟକତା ରହିଛି। କେବଳ ସରକାର ନୁହେଁ ବରଂ ଗୋଷ୍ଠୀ ମାଧ୍ୟମରେ ଏହାକୁ ଉଦ୍ଧାର କରାଯାଇ ପାରିବ।
ପ୍ରଫେସର ଗାଡଗିଲ କହିଥିଲେ ଯେ ଜଙ୍ଗଲ ମଧ୍ୟରେ ରହୁଥିବା ଲୋକ ଓ ସରକାରଙ୍କ ଦ୍ୱାରା ଜଙ୍ଗଲର ବିନାଶ ଏବଂ ଜୈବ ବିବିଧତା ନଷ୍ଟ ହେବାରେ ଲାଗିଛି। ଜଙ୍ଗଲବିଭାଗ ଅଧିକାରୀମାନେ ଲୋକଙ୍କୁ ଶୋଷଣ କରି ଶତ୍ରୁତାର ଆଚରଣ କରିବାରେ ଲାଗିଛନ୍ତି। କର୍ପୋରେଟ ସଂସ୍ଥାମାନଙ୍କ ଆଗ୍ରହକୁ ଲୋକଙ୍କ ଆବଶ୍ୟକତାଠାରୁ ଅଧିକ ଗୁରୁତ୍ୱ ଦେବା ଦ୍ୱାରା ସମଗ୍ର ଦେଶରେ ଜଙ୍ଗଲର ସନ୍ତୁଳନ ନଷ୍ଟ ହେବାରେ ଲାଗିଛି। ଜଙ୍ଗଲରେ ରହୁଥିବା ଲୋକେ ତଥା ଆଦିବାସୀମାନେ ଜଙ୍ଗଲକୁ ନିଜର ଦେବତା ଭାବରେ ପୂଜା କରୁଛନ୍ତି। ଜ୍ୟୋତିବୋଇ ଫୁଲେଙ୍କ ମତରେ ବ୍ରିଟିଶମାନଙ୍କ ଦ୍ୱାରା ସୃଷ୍ଟି ହୋଇଥିବା ବନ ବିଭାଗ, ସେମାନଙ୍କର ଜଙ୍ଗଲର କ୍ଷୟକୁ ପ୍ରତିହତ କରିବା ପାଇଁ ଲୋକଙ୍କ ଶକ୍ତି ହ୍ରାସ କରିଛି। ଜଙ୍ଗଲ ସଂରକ୍ଷଣ କରିବାରେ ବିଭାଗ ସାହାଯ୍ୟ କଲା, କିନ୍ତୁ ବାସ୍ତବରେ ସେମାନେ ଏହାକୁ ଜବରଦଖଲ କରିଥିଲେ। ଜଙ୍ଗଲ ପରିଦର୍ଶନ କରିବା ଏବଂ ଜଙ୍ଗଲବାସୀଙ୍କ ସହିତ ରହିବା ସମୟରେ ସେ ଜାଣିବାକୁ ପାଇଲେ ଯେ ଜଙ୍ଗଲଗୁଡିକ ଦ୍ରୁତ ଗତିରେ ନଷ୍ଟ ହେଉଛି। ସେ ଏକ ଉଦହାରଣ ଦେଇ କହିଥିଲେ ଯେ ପିତାଙ୍କ ଦ୍ୱାରା ହୋଇଥିବା ଆଖୁ ସମବାୟ ସମିତି ଗଠନ ପାଇଁ ଆନ୍ଦୋଳନ ତାଙ୍କୁ ଅଳ୍ପ ବୟସରେ ଲୋକଙ୍କୁ ସଂଗଠିତ କରିବାର ପ୍ରେରଣା ଯୋଗାଇଥିଲା। ତାଙ୍କର ଆଗ୍ରହ ପରେ, ତାଙ୍କ ପିତା ତାଙ୍କୁ ଡକ୍ଟର ସଲିମ ଅଲିଙ୍କ ସହ ପରିଚିତ କରାଇଥିଲେ। ଜୀବନର ଶେଷ ଭାଗରେ ତାଙ୍କୁ ଏବଂ ଜେବିଏସ୍ ହାଲଡାନେଙ୍କୁ ଭେଟିବା ପରେ ଏହି କ୍ଷେତ୍ରରେ କାର୍ୟ୍ୟ କରିବାର ସଂକଳ୍ପ ଆହୁରି ତୀକ୍ଷ୍ଣ କରିଥିଲା। ହାର୍ଭାର୍ଡ ବିଶ୍ୱବିଦ୍ୟାଳୟରେ ଉଚ୍ଚ ଶିକ୍ଷାରେ ଅଧ୍ୟୟନ ପରେ ସେ ବାଙ୍ଗାଲୋର ସ୍ଥିତ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସରେ ଜୀବ ବିଜ୍ଞାନ ଅଧ୍ୟୟନ କରିଥିଲେ। ଅନୁସନ୍ଧାନକାରୀ ଭାବରେ ତାଙ୍କର ଜୀବନ, ଜଙ୍ଗଲ ବିଭାଗ ସହିତ ଘନିଷ୍ଠ ଭାବରେ କାର୍ୟ୍ୟ କରିବାର ସୁଯୋଗ ପାଇଥିଲେ। ସେ କହିଛନ୍ତି ଯେ ସଂପ୍ରତି ୪୦ ପ୍ରତିଶତ ଜଙ୍ଗଲ କର୍ପୋରେଟଗୁଡିକୁ ଦିଆଯାଇଛି। ଯଦି ଜଙ୍ଗଲ ପରିଚାଳନାର ଉନ୍ନତ ଅଭ୍ୟାସ ଦ୍ୱାରା ଜଙ୍ଗଲକୁ ସଂରକ୍ଷିତ ରଖାଯାଏ, ତେବେ ଏହା ଉପରେ ର୍ନିଭରଶୀଳ ସମ୍ପ୍ରଦାୟର ଜୀବିକା ସ୍ଥାୟୀ ଭାବରେ ସୁରକ୍ଷିତ ହୋଇପାରିବ। କାର୍ଯ୍ୟକ୍ରମରେ ଚିଲିକା ଉନ୍ନୟନ ନିଗମର ପୂର୍ବତନ ନିର୍ଦେଶକ ଡକ୍ଟର ଅଜିତ କୁମାର ପଟ୍ଟନାୟକ ମୁଖ୍ୟ ଅତିଥିଙ୍କ ପରିଚୟ ପ୍ରଦାନ କରି ଗଣତାନ୍ତ୍ରିକ ମୂଲ୍ୟବୋଧର ଅନୁସନ୍ଧାନକାରୀ, ବୈଜ୍ଞାନିକ ତଥା ପରିବେଶ କ୍ଷେତ୍ରରେ ତାଙ୍କର ସଫଳତାକୁ ବର୍ଣ୍ଣନା କରିଥିଲେ। ପଦ୍ମଶ୍ରୀ ରାଧାମୋହନ କହିଥିଲେ ଯେ, ପ୍ରକୃତିର ତତ୍ତ୍ବ ଆମକୁ ବୁଝିବାକୁ ପଡିବ। କେରାଣ୍ଡି ମାଛରେ ଶିଉଳି ନଲାଗିବା ଏବଂ ପୋଖରୀରେ ରହୁଥିବା ପଦ୍ମ ପତ୍ରରେ ପାଣି ନରହିବା ଆଦି ଅନେକ ପ୍ରାକୃତିକ ବିଶେଷତ୍ୱ ରହିଛି। ଏହି ତତ୍ତ୍ବକୁ ବୁଝିଲେ ଅନେକ କ୍ଷେତ୍ରରେ ବ୍ୟବହାର କରିହେବ। ସମ୍ପାଦକ ସୁଦର୍ଶନ ଦାସ ସ୍ୱାଗତ ଭାଷଣ ଦେଇଥିବା ବେଳେ ଏଚଡ଼ିଏଫସିର କାର୍ୟ୍ୟନିର୍ବାହୀ ନିର୍ଦେଶକ ଡକ୍ଟର ବି ବି ସାମନ୍ତ ଧନ୍ୟବାଦ ଅର୍ପଣ କରିଥିଲେ। ଓଡିଏମ୍ ପବ୍ଲିକ ସ୍କୁଲରେ ଅନୁଷ୍ଠିତ ଉକ୍ତ କାର୍ୟ୍ୟକ୍ରମରେ ଅଧ୍ୟକ୍ଷ ଡକ୍ଟର ସତ୍ୟବ୍ରତ ମୀନକେତନ, ଓୟୁଏଟିର ପ୍ରାକ୍ତନ କୁଳପତି ଡକ୍ଟର ଡି ପି ରାୟ, ଓଡିଶା ସରକାରଙ୍କ ରାଜସ୍ୱ ପରିଷଦର ପ୍ରାକ୍ତନ ସଦସ୍ୟ ଡ. ଅରବିନ୍ଦ ବେହେରା, ଡାକ୍ତର ସେବା ମହାପାତ୍ର ପ୍ରମୁଖ ଜୈବ ବିବିଧତା ଉପରେ ବକ୍ତୃତା ପ୍ରଦାନ କରିଥିଲେ।