ବଲାଙ୍ଗିର: ବଲାଙ୍ଗିର ଜିଲାରେ କରୋନା ପରିସ୍ଥିତିକୁ ନେଇ ବେସରକାରୀ ସ୍ୱେଚ୍ଛାସେବୀ ସଂଗଠନ(ଏନ୍ଜିଓ)ର କର୍ମକର୍ତ୍ତା ଓ ସରପଞ୍ଚଙ୍କ ସହ ଭିଡିଓ କନ୍ଫରେନ୍ସ ଜରିଆରେ ବଲାଙ୍ଗିର ଜିଲାପାଳ ଅରିନ୍ଦମ ଡାକୁଆ ଆଲୋଚନା କରିଛନ୍ତି। ସେମାନଙ୍କ ମତାମତ ନେବା ସହ ରାପିଡ ଆଣ୍ଟିଜେନ୍ ଟେଷ୍ଟକୁ ବୃଦ୍ଧି କରିବା ଓ ଲକ୍ଷଣ ବିହୀନ କରୋନା ପଜିଟିଭି ବ୍ୟକ୍ତିମାନେ କିପରି ଗୃହବଦ୍ଧରେ ରହିବେ ସେ ସଂପର୍କରେ କହିଥିଲେ। ଆଗାମୀ ଦିନରେ ବଲାଙ୍ଗିର ଜିଲାରେ ରାପିଡ ଆଣ୍ଟିଜେନ୍ ପରୀକ୍ଷା ଓ ଗୃହବଦ୍ଧ ପାଇଁ ହୋଇଥିବା ଯୋଜନାରେ ସହଯୋଗ କରିବାକୁ କହିଥିଲେ ଜିଲାପାଳ ଶ୍ରୀ ଡାକୁଆ।
ବଲାଙ୍ଗିର ଜିଲାକୁ ବିଭିନ୍ନ ରାଜ୍ୟରୁ ଟ୍ରେନ ଯୋଗେ ଆସିଥିବା ପ୍ରବାସୀ ଓଡ଼ିଆ ଶ୍ରମିକଙ୍କୁ ସଙ୍ଗରୋଧ କେନ୍ଦ୍ରରେ ରଖିବା, ସେମାନଙ୍କ ଉପଯୁକ୍ତ ଯତ୍ନ ନେବା, ସଙ୍ଗରୋଧ କେନ୍ଦ୍ରଗୁଡିକର ପରିଚାଳନା କରିଥିବାରୁ ସରପଞ୍ଚଙ୍କୁ ଜିଲାପାଳ ପ୍ରଶଂସା କରିଥିଲେ। ରାପିଡ ଆଣ୍ଟିଜେନ୍ ପରୀକ୍ଷା, ଗୃହବଦ୍ଧ ସଂପର୍କରେ ବିଡିଓ, ମେଡିକାଲ ଅଫିସରଙ୍କ ସହଯୋଗରେ ଯୋଜନା ପ୍ରସ୍ତୁତ କରିବା, କୋଭିଡ-୧୯ ନିୟମ କାର୍ଯ୍ୟକାରୀ କରିବା ଓ ଜନସାଧାରଣଙ୍କୁ ସଚେତନ କରିବାକୁ ପରାମର୍ଶ ଦେଇଥିଲେ। ଗାଁରେ ଥିବା କୋଭିଡ ପରିଚାଳନା କମିଟି ମଧ୍ୟ ଏସଂପର୍କରେ ଜନସାଧାରଣଙ୍କୁ ସଚେତନ କରିବାକୁ ପରାମର୍ଶ ଦେଇଥିଲେ ଜିଲାପାଳ ଶ୍ରୀ ଡାକୁଆ। ଜିଲାପାଳ ଗତକାଲି ଜିଲାର ବିଭିନ୍ନ ଏନ୍ଜିଓ କର୍ମକର୍ତ୍ତାଙ୍କ ସହ କଥା ହୋଇଥିବ ବେଳେ ମଙ୍ଗଳବାର ବେଲପଡ଼ା, ଖପ୍ରାଖୋଲ, ପାଟଣାଗଡ, ଟିଟିଲାଗଡ, ବଙ୍ଗୋମୁଣ୍ଡା, ମୁରିବାହାଲ ବ୍ଲକ ଅନ୍ତର୍ଗତ ବିଭିନ୍ନ ଗ୍ରାମପଞ୍ଚାୟତର ସରପଞ୍ଚ ଓ ବିଡିଓଙ୍କ ସହ ଆଲୋଚନା କରିଥିଲେ। ଅନ୍ୟ ବ୍ଲକ ଅନ୍ତର୍ଗତ ପଞ୍ଚାୟତରେ ସରପଞ୍ଚମାନଙ୍କ ସହ ଜିଲାପାଳ ଅନୁରୂପ ଆଲୋଚନା କରିବେ ବୋଲି ସୂଚନା ମିଳିଛି।
