ନୂଆଦିଲ୍ଲୀ: ପ୍ରାୟ ୧୧୦୦ କୋଟି ଟଙ୍କାର ହାୱାଲା କାରବାରରେ ସମ୍ପୃକ୍ତ ଚାର୍ଲି ପେଙ୍ଗ ଓରଫ୍ ଲୁଓ ସାଂଗକୁ ଗିରଫ ପରେ ଅନେକ ଗୋପନୀୟ ତଥ୍ୟ ହାସଲ କରିବାରେ ସଫଳ ହୋଇଛି ଭାରତୀୟ ସୁରକ୍ଷା ଏଜେନ୍ସି । ଆୟକର ବିଭାଗ ସହ କିଛି ଜାତୀୟ ସୁରକ୍ଷା ସଂସ୍ଥା ଚାର୍ଲିଠାରୁ ଅନେକ ଗୁରୁତ୍ଵପୂର୍ଣ ସୁରାକ ପାଇଛନ୍ତି । ଚାର୍ଲି କେବଳ ହାୱାଲା ରାକେଟ୍ ଚଳାଉ ନ ଥିଲା, ଭାରତରେ ସେ ଚୀନ ପାଇଁ ଗୁଇନ୍ଦାଗିରି ମଧ୍ୟ କରୁଥିବା ସୂଚନା ମିିଳିଛି । ଏପରିକି ଦଲାଇଲାମାଙ୍କ ସମ୍ପର୍କରେ ସେ ତଥ୍ୟ ସଂଗ୍ରହ କରି ଚୀନକୁ ଯୋଗାଉଥିଲା । ତିବ୍ଦତରୁ ନିର୍ବାସିତ ତୀବ୍ଦତୀୟଙ୍କୁ ଟଙ୍କା ଦେଇ ସେମାନଙ୍କଠାରୁ ଦଲାଇଲାମାଙ୍କ ସମ୍ପର୍କରେ ସୂଚନା ସଂଗ୍ରହ କରୁଥିଲା । ଉତ୍ତର ଦିଲ୍ଲୀରେ ରହୁଥିବା ମଜନୁ ଟିଲାର ଲାମା ଓ ଭିକ୍ଷୁଙ୍କ ଉପରେ ମଧ୍ୟ ସେ ନଜର ରଖୁଥିଲା ।
ଚାର୍ଲି ୨୦୧୪ରେ ଭାରତ ଆସିଥିଲା ଓ ପ୍ରଥମେ ନୁଡ଼ୁଲ୍ସ କାରବାର ଆରମ୍ଭ କରିଥିଲା । ଏହାପରେ ସେ ବଢ଼ିବଢ଼ି ହାୱାଲା କାରବାର ପର୍ଯ୍ୟନ୍ତ ପହଞ୍ଚି ଯାଇଥିଲା । ଏପରିକି ସେ ହିମାଚଳ ଓ ଦିଲ୍ଲୀରେ ଦଲାଇଲାମାଙ୍କ ନିକଟତମ ଲୋକଙ୍କ ମଧ୍ୟରେ ସାମିଲ ହେବା ପାଇଁ ଚେଷ୍ଟା ମଧ୍ୟ କରିଥିଲା । ଏହି ସୂତ୍ରରୁ ମିଳିଥିବା ସୂଚନା ଅନୁସାରେ ଚାର୍ଲି କେବେ ନିଜେ ଏହି ଲୋକମାନଙ୍କୁ ଟଙ୍କା ଦେଉ ନ ଥିଲା । ନିଜ କାର୍ଯ୍ୟାଳୟର କର୍ମଚାରୀଙ୍କୁ ଏଥିପାଇଁ ବ୍ୟବହାର କରୁଥିଲା । ସୁରକ୍ଷା ସଂସ୍ଥା ଓ ଆୟକର ବିଭାଗ ସେମାନଙ୍କୁ ଚିହ୍ନଟ କରିଛି । ପ୍ୟାକେଟରେ ଟଙ୍କା ଭର୍ତି କରି ସେମାନଙ୍କୁ ପଠାଯାଉଥିଲା ।
ଚାର୍ଲି ଭାରତୀୟ ଖୁଚୁରା ବଜାରରେ ଟଙ୍କା ନିବେଶ କରିଥିଲା । ଏଥିପାଇଁ ଚୀନ ମୋବାଇଲ୍ ଆପ୍ଲିକେସନ ‘ୱି-ଚାଟ’ ବ୍ୟବହାର କରିଥିଲା ୨୦୧୮ରେ ଚାର୍ଲିକୁ ଦିଲ୍ଲୀ ପୁଲିସର ସ୍ବତନ୍ତ୍ର ଟିମ୍ ଗିରଫ କରିଥିଲା । ତା ନିକଟରୁ ଦୁଇଟି ଜାଲ ଆଧାର କାର୍ଡ଼ ଓ ଜାଲ ଭାରତୀୟ ପାସପୋର୍ଟ ଜବତ ହୋଇଥିଲା । ତା ବିରୋଧରେ ଜାଲିଆତି ଓ ପାସପୋର୍ଟ ନିୟମ ଆଧାରରେ ମାମଲା ରୁଜୁ ହୋଇଥିଲା, ମାତ୍ର ବର୍ଷକ ପରେ ତାଙ୍କୁ ଜାମିନରେ ଛାଡ଼ି ଦିଆଯାଇଥିଲା ।
