ପ୍ରଧାନମନ୍ତ୍ରୀଙ୍କ ଲଦାଖ ଗସ୍ତ ପରେ ଏପରି ପ୍ରତିକ୍ରିୟା ଦେଲା ଚୀନ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଅଚାନକ ଲେହ ଓ ଲଦାଖ ଗସ୍ତ କରିଥିଲେ। ଏହି ଅବସରରେ ସେ ଲଦାଖ ସୀମାରେ ଭାରତ ଓ ଚୀନ ମଧ୍ୟରେ ଲାଗିରହିଥିବା ସୀମା ବିବାଦର ସମୀକ୍ଷା କରିଥିଲେ। ଏହା ସହିତ ୧୧୦୦୦ ଫୁଟ ଉଚ୍ଚରେ ଥିବା ନିମୁସ୍ଥିତ ସେନା ଶିବିରରେ ପ୍ରଧାନମନ୍ତ୍ରୀ ସ୍ଥଳ ସେନା, ବାୟୁ ସେନା ଏବଂ ଆଇଟିବିପି ଯବାନମାନଙ୍କ ସହିତ ଆଲୋଚନା କରିଥିଲେ। ପ୍ରଧାନମନ୍ତ୍ରୀଙ୍କ ଏହି ଗସ୍ତ ଯବାନଙ୍କ ମନୋବଳ ବୃଦ୍ଧି କରିବା ସହିତ ପାକିସ୍ତାନ ଏବଂ ଚୀନକୁ କଡ଼ା ବାର୍ତ୍ତା ଦେବ ବୋଲି କୁହାଯାଉଛି।

ତେବେ ପ୍ରଧାନମନ୍ତ୍ରୀଙ୍କ ଏହି ଗସ୍ତ ପରେ ଚୀନ ପ୍ରତିକ୍ରିୟା ରଖିଛି। ଚୀନ ବିଦେଶ ମନ୍ତ୍ରଣାଳୟର ମୁଖପାତ୍ର ଝାଓ ଲିଜିୟନ କହିଛନ୍ତି, ଭାରତ ଏବଂ ଚୀନ ସୀମାରେ ଉତ୍ତେଜନା ହ୍ରାସ କରିବା ଲାଗି ସୈନ୍ୟ ଏବଂ କୁଟନୈତିକ ସ୍ତରରେ ଆଲୋଚନା ଜାରି ରହିଛି। କୌଣସି ପକ୍ଷ ଏଭଳି କିଛି କରିବା ଉଚିତ ନୁହେଁ, ଯେଉଁଥିପାଇଁ ସୀମାରେ ପରିସ୍ଥିତି ଆହୁରି ବିଗିଡ଼ିଯାଉ। ତେବେ ଚୀନର ଏପରି ପ୍ରତିକ୍ରିୟା ମୋଦୀଙ୍କ ଗସ୍ତର ବଡ଼ ପ୍ରଭାବ ବୋଲି କୁହାଯାଉଛି।

ମୋଦୀଙ୍କ ଗସ୍ତକୁ ନେଇ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଟ୍ବିଟ୍‌ କରି କହିଛନ୍ତି, ପ୍ରଧାନମନ୍ତ୍ରୀ ଲଦାଖ ଯାଇ ସେନାର ଯବାନମାନଙ୍କୁ ଭେଟିବା ପରେ ସେମାନଙ୍କ ଆତ୍ମବଳ ନିଶ୍ଚିତ ବୃଦ୍ଧି କରିଛି। ପ୍ରଧାନମନ୍ତ୍ରୀଙ୍କ ଏହି ପଦକ୍ଷେପକୁ ମୁଁ ପ୍ରଶଂସା କରିବା ସହିତ ଧନ୍ୟବାଦ ଦେଉଛି।