ନୂଆଦିଲ୍ଲୀ: ପିଲା ଚୋରି ଗୁଜବକୁ ନେଇ ଦିଲ୍ଲୀ ନୋଏଡାରେ ଏକ ଅଭାବନୀୟ ଘଟଣା ଘଟିଯାଇଛି । ଖୋଦ୍ ପିଲାର ବାପାକୁ ସ୍ଥାନୀୟଲୋକ ନିସ୍ତୁକ ମାଡ ମାରି ଆହତ କରିଛନ୍ତି । ପୁଲିସ ଘଟଣାସ୍ଥଳରୁ ଆହତ ବାପାକୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛି । ଏହି ଘଟଣାରେ ପୁଲିସ ୩ ଜଣଙ୍କୁ ଗିରଫ କରିଛି ।
ସୂଚନାଯୋଗ୍ୟ, ଗ୍ରେଟର ନୋଏଡାର କୁଲସେରା ଗାଁରେ ରାଜମିସ୍ତ୍ରୀ ଭାବେ କାମ କରୁଥିବା କିଶନ ନିଜର ୨ଟି ପିଲା ଏବଂ ତାଙ୍କ ଶାଳକଙ୍କ ୨ଟି ପିଲାଙ୍କୁ ଏକ କାରରେ ନେଇ ଯାଉଥିଲେ । ଏହି ସମୟରେ ପିଲାମାନେ ସିଙ୍ଗଡା ଖାଇବାକୁ ଜିଦ୍ କରିବାରୁ କିଶନ ସେମାନଙ୍କୁ ଗାଡିରେ ଛାଡି ଦୋକାନକୁ ଆଣିବାକୁ ଯାଇଥିଲେ । କିନ୍ତୁ କେହି ଦୁବୃର୍ତ୍ତ ପିଲା ଚୋରି ଗୁଜବ ପ୍ରଚାର କରି ଦେଇଥିଲା । ସିଙ୍ଗଡା ଧରି କିଶନ ଫେରିବା ବେଳକୁ ଗାଡି ନିକଟରେ ଭିଡ ଜମିଥିଲା। ପିଲା ଚୋରି ସନ୍ଦେହରେ ସ୍ଥାନୀୟଲୋକେ କିଶନଙ୍କୁ ନିସ୍ତୁକ ମାଡ ମାରିଥିଲେ । ସୂଚନା ପାଇ ଘଟଣାସ୍ଥଳରେ ପୁଲିସ ପହଞ୍ଚି ଉତ୍ତ୍ୟକ୍ତଙ୍କ କବଳରୁ କିଶନଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ । ଏହି ମାମଲାରେ ପୁଲିସ ମାମଲା ରୁଜୁ କରି ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହା ସହ ଅନ୍ୟମାନଙ୍କୁ ଧରିବା ପାଇଁ ମଧ୍ୟ ପୁଲିସ ଚେଷ୍ଟା ଜାରି ରଖିଛି ।
କିଛି ଦିନ ପୂର୍ବରୁ ଗାଜିୟାବାଦରେ ଏଭଳି ଏକ ଘଟଣା ସାମ୍ନାକୁ ଆସିଥିଲା। ପିଲା ଚୋରି ସନ୍ଦେହରେ ଜଣେ ବୃଦ୍ଧା ଭିଡ ହିଂସାର ଶିକାର ହୋଇଥିଲେ । କିନ୍ତୁ ବୃଦ୍ଧା ଜଣଙ୍କ ପିଲାଟିର ଜେଜେମା’ ଥିଲେ ବୋଲି ପରେ ଜଣାପଡିଥିଲା ।
