ଚେନ୍ନଇ : ତାମିଲନାଡୁର ନିର୍ବାଚନ ପ୍ରସ୍ତୁତିକୁ ସମୀକ୍ଷା କରିବା ପାଇଁ ନିର୍ବାଚନ କମିଶନ୍ ଟିମ୍ ଚେନ୍ନଇ ଗସ୍ତ କରିଛନ୍ତି। ମୁଖ୍ୟ ନିର୍ବାଚନ କମିଶନର ସୁନୀଲ ଅରୋରା, ନିର୍ବାଚନ କମିଶନର ସୁଶୀଲ ଚନ୍ଦ୍ରା,ରାଜୀବ କୁମାର ଏବଂ ସେକ୍ରେଟେରୀ ଜେନେରାଲ୍ ଉମେଶ ସିହ୍ନା ବୁଧବାରଠାରୁ ତାମିଲନାଡୁକୁ ଦୁଇଦିନ ଗସ୍ତରେ ଯାଇଛନ୍ତି। ଆସନ୍ତାକାଲି ଏକ ୮ ଜଣିଆ ନିର୍ବାଚନ କମିଶନ୍ ଟିମ୍ ପୁଦୁଚେରୀ ଗସ୍ତ କରିବ।
ନିର୍ବାଚନ କମିଶନ ଟିମ୍, ରାଜନୈତିକ ଦଳଗୁଡ଼ିକର ପ୍ରତିନିଧି, ପୁଲିସ୍ ଅଫିସର, ଜିଲ୍ଲା ନିର୍ବାଚନ ଅଧିକାରୀ ଓ ଜିଲ୍ଲା ଏସପି ମାନଙ୍କୁ ସାକ୍ଷାତ କରି ନିର୍ବାଚନ ପ୍ରସ୍ତୁତିର ସମୀକ୍ଷା କରିବେ। ମୁଖ୍ୟ ନିର୍ବାଚନ ଅଧିକାରୀ ସତ୍ୟବ୍ରତ ସାହୁଙ୍କ କହିବା ଅନୁସାରେ କୋବିଡ୍-୧୯ ଯୋଗୁଁ ଭୋଟ୍ ଗ୍ରହଣ କେନ୍ଦ୍ର ଗୁଡ଼ିକର ସଂଖ୍ୟା ବୃଦ୍ଧି କରାଯିବ। ନିର୍ବାଚନ ସମ୍ବନ୍ଧୀୟ ଅନ୍ୟାନ୍ୟ ବିଷୟ ଉପରେ ଆଲୋଚନା କରାଯିବାର କାର୍ଯ୍ୟସୂଚୀ ରହିଛି ବୋଲି ସେ ଜଣାଇଛନ୍ତି।
