ମୁମ୍ବାଇ: କେନ୍ଦ୍ର ସରକାର ବୁଧବାର ସୁପ୍ରିମକୋର୍ଟରେ ସୁଶାନ୍ତ ସିଂହ ରାଜପୁତ ମାମଲାର ସିବିଆଇ ତଦନ୍ତ ସ୍ବୀକାର କରିଥିବା ସୂଚନା ଦେବା ପରେ ବିଳମ୍ବିତ ସନ୍ଧ୍ୟାରେ ସିବିଆଇ ଏଥି ନିମନ୍ତେ ବିଜ୍ଞପ୍ତି ପ୍ରକାଶ କରିଛି । ବିହାର ସରକାରଙ୍କ ସୁପାରିସ ଆଧାରରେ କେନ୍ଦ୍ର ସରକାର ଏହି ମାମଲାର ତଦନ୍ତ ସିବିଆଇ କରିବ ବୋଲି ବୁଧବାର ସକାଳେ ସଲିସିଟର ଜେନେରାଲ ତୁଷାର ମେହେଟ୍ଟା ସୁପ୍ରିମକୋର୍ଟକୁ ଜଣାଇଥିଲେ ।
Department of Personnel and Training issues notification paving way for CBI probe in Bollywood actor Sushant Singh Rajput’s death
— Press Trust of India (@PTI_News) August 5, 2020
ସୁଶାନ୍ତ ସିଂହ ରାଜପୁତ ମାମଲାରେ ୬ଜଣଙ୍କ ବିରୋଧରେ ମାମଲା
ସୁଶାନ୍ତ ସିଂହଙ୍କ ପିତା କେ.କେ. ସିଂହ ଗତ ୨୮ ତାରିଖରେ ପାଟନାରେ ରିୟା ଚକ୍ରବର୍ତୀ, ତାଙ୍କ ପରିବାରର ସଦସ୍ୟ ସହ ୬ ଜଣଙ୍କ ବିରୋଧରେ ମାମଲା ରୁଜୁ କରିଥିଲେ । ସୁଶାନ୍ତଙ୍କୁ ଏହି ବ୍ୟକ୍ତିମାନେ ଆତ୍ମହତ୍ୟା ନିମନ୍ତେ ପ୍ରୋତ୍ସାହିତ କରିଥିଲେ ବୋଲି କେ.କେ.ସିଂହ ଅଭିଯୋଗ କରିଥିଲେ । ଏହି ମାମଲାରେ ପାଟନା ପୁଲିସ ଧାରା ୩୪୧ ଓ ୩୪୨ (ଅପରାଧିକ ମନୋବୃତ୍ତି ନେଇ ବନ୍ଧକ ରଖିବା), ୩୮୦ (ରହୁଥିବା ଘରୁ ଚୋରି କରିବା), ୪୦୬ (ବିଶ୍ଵାସଘାତକତା କରିବା), ୪୨୦ (ଜାଲିଆତି) ଓ ୩୦୬ (ଆତ୍ମହତ୍ୟା ନିମନ୍ତେ ଉସୁକାଇବା) ରେ ମାମଲା ରୁଜୁ କରିଥିଲା । ନିଜ କ୍ୟାରିଅର ସମ୍ଭାଳିବା ପାଇଁ ରିୟା ଚକ୍ରବର୍ତୀ ୨୦୧୯ରେ ସୁଶାନ୍ତ ସିଂହ ରାଜପୁତ ସହ ମିଛ ସମ୍ପର୍କ ସ୍ଥାପନ କରିଥିଲେ ବୋଲି ସୁଶାନ୍ତଙ୍କ ପିତା ଏଥିରେ ଅଭିଯୋଗ କରିଥିଲେ ।
ଗତ ୧୪ ଜୁନରେ ସୁଶାନ୍ତ ଆତ୍ମହତ୍ୟା କରିଥିଲେ
ଏଠାରେ ଉଲ୍ଲେଖଯୋଗ୍ୟ ଯେ ଗତ ଜୁନ୍ ୧୪ ତାରିଖରେ ସୁଶାନ୍ତ ନିଜ ବାନ୍ଦ୍ରାସ୍ଥିତ ଘରେ ମୃତ ଅବସ୍ଥାରେ ମିଳିଥିଲେ । ନିଜ ଶୟନ କକ୍ଷରେ ସେ ଫାଶୀ ଲଗାଇ ଆତ୍ମହତ୍ୟା କରିଥିଲେ । ପୁଲିସକୁ ଯଦିଓ କୌଣସି ସୁଇସାଇଡ଼ ନୋଟ୍ ମିଳି ନ ଥିଲା, ତଥାପି ଏ ସମ୍ପର୍କରେ ତଦନ୍ତ ମୁମ୍ବାଇ ପୁଲିସ ଆରମ୍ଭ କରିଥିଲା । ଏହି ଘଟଣାରେ ସୁଶାନ୍ତଙ୍କ ପରିବାର ସଦସ୍ୟ, ରୋଷେଇଆ, ସହିତ ସଞ୍ଜୟ ଲୀଳା ଭଂସାଲୀ, ଫିଲ୍ମ ସମୀକ୍ଷକ ରାଜୀବ ମସନ୍ଦ, ଅଭିନେତ୍ରୀ ସଞ୍ଜନା ସାଂଘୀ, ରିୟା ଚକ୍ରବର୍ତୀ, କାଷ୍ଟିଂ ନିର୍ଦେଶକ ଶାନୁ ଶର୍ମା, ପ୍ରଯୋଜକ ମୁକେଶ ଛାବ୍ରା, ଯଶରାଜ ଫିଲ୍ମର ଆଦିତ୍ୟ ଚୋପ୍ରାଙ୍କ ସମେତ ୪୦ ଲୋକଙ୍କୁ ପଚରା ଉଚରା ମୁମ୍ବାଇ ପୁଲିସ କରି ସାରିଛି ।
