ଡେସ୍କ: ଲୋକସଭା ନିର୍ବାଚନର ବାକି ଷଷ୍ଠ ଓ ସପ୍ତମ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର କାର୍ଯ୍ୟ ଜୋରସୋରରେ ଚାଲିଛି।ପ୍ରଧାନମନ୍ତ୍ରୀ ତଥା ବିଜେପିର ବରିଷ୍ଠ ନେତା ନରେନ୍ଦ୍ର ମୋଦୀ ଅଭିଯୋଗ କରିଛନ୍ତି ଯେ କଂଗ୍ରେସ ଏକ ବଂଶବାଦୀ ଦଳ ଏବଂ ଏହା କେବଳ ଗୋଟିଏ ପରିବାରର ସ୍ୱାର୍ଥ ପାଇଁ କାମ କରେ। ଆଜି ବିହାରର ମୋତିହାରୀସ୍ଥିତ ଗାନ୍ଧୀ ମୈଦାନରେ ଏକ ସାଧାରଣ ସଭାକୁ ସମ୍ବୋଧିତ କରି ଶ୍ରୀ ମୋଦୀ ଦାବି କରିଛନ୍ତି ଯେ ଲୋକସଭା ନିର୍ବାଚନରେ କଂଗ୍ରେସ ନେତୃତ୍ୱାଧୀନ ଆଇଏନଡିଆଇ ମେଣ୍ଟକୁ ପରାଜୟର ସମ୍ମୁଖୀନ ହେବାକୁ ପଡ଼ିବ। ଯେଉଁମାନେ ଦୁର୍ନୀତି ମାମଲା ଓ ଭାରତ ବିରୋଧୀ ଅଭିଯାନରେ ସଂପୃକ୍ତ ଅଛନ୍ତି ସେମାନଙ୍କୁ ଜନତା ଉଚିତ ଜବାବ ଦେବେ ବୋଲି ସେ କହିଛନ୍ତି।
ସତ୍ୟାଗ୍ରହ ଓ ସ୍ୱଚ୍ଛାଗ୍ରହ ଉପରେ ମହାତ୍ମା ଗାନ୍ଧୀଙ୍କ ଶିକ୍ଷାରେ ସେ ପ୍ରକୃତରେ ପ୍ରେରିତ ହୋଇଥିଲେ ମଧ୍ୟ କଂଗ୍ରେସ ବାପୁଙ୍କ ସ୍ୱପ୍ନ ପୂରଣ କରିବାରେ ବିଫଳ ହୋଇଛି ବୋଲି ଶ୍ରୀ ମୋଦୀ କହିଛନ୍ତି। ସେ କହିଛନ୍ତି, ପ୍ରତ୍ୟେକ ଘରେ ଶୌଚାଳୟ ଯୋଗାଇଦେବାର ଚିନ୍ତାଧାରା ସ୍ୱଚ୍ଛାଗ୍ରହଙ୍କ ଦ୍ୱାରା ପ୍ରେରିତ ହୋଇଥିଲା। ଗରିବ ଲୋକଙ୍କୁ ବିଜୁଳି ଓ ଗ୍ୟାସ ସଂଯୋଗ ଦେବା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ମଧ୍ୟ ସେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, ଏକବିଂଶ ଶତାବ୍ଦୀର ଆକାଂକ୍ଷା ସହିତ ଆଇଏନଡିଆଇ ମେଣ୍ଟ ହାତ ମିଳାଇ ପାରିବ ନାହିଁ ଏବଂ କେବଳ ଏନଡିଏ ହିଁ ଏହି ସ୍ୱପ୍ନକୁ ପୂରଣ କରିପାରିବ। ଆଗାମୀ ୫ ବର୍ଷ ମଧ୍ୟରେ କେନ୍ଦ୍ରରେ ନିର୍ଣ୍ଣାୟକ ସରକାର ସହ ବିକାଶ କାର୍ଯ୍ୟ ଦ୍ରୁତ ଗତିରେ କରାଯିବ ବୋଲି ଶ୍ରୀ ମୋଦୀ ପ୍ରତିଶ୍ରୁତି ଦେଇଛନ୍ତି।
ମହାରାଜଗଞ୍ଜ ସଂସଦୀୟ ନିର୍ବାଚନ ମଣ୍ଡଳୀ ଅନ୍ତର୍ଗତ ଗୋରେୟାକୋଠିର ଆଗେୟା ପଡ଼ିଆରେ ଆୟୋଜିତ ଅନ୍ୟ ଏକ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଅଭିଯୋଗ କରିଛନ୍ତି ଯେ, ଆଇଏନଡିଆଇ ମେଣ୍ଟ ହେଉଛି ସାମ୍ପ୍ରଦାୟିକ, ସବୁଠାରୁ ଖରାପ ଏବଂ ବଂଶବାଦୀ ମେଣ୍ଟ। ଏହି ମେଣ୍ଟ ଲୋକଙ୍କ କଲ୍ୟାଣ ପାଇଁ କାମ କରିପାରିବ ନାହିଁ କାରଣ ସେମାନଙ୍କର ଏକମାତ୍ର ଉଦ୍ଦେଶ୍ୟ ହେଉଛି ସେମାନଙ୍କ ପରିବାରକୁ ପ୍ରୋତ୍ସାହିତ କରିବା ।
ଏହାବ୍ୟତୀତ ପ୍ରଧାନମନ୍ତ୍ରୀ ତଥା ବିଜେପିର ବରିଷ୍ଠ ନେତା ନରେନ୍ଦ୍ର ମୋଦୀ ଆଜି ଅପରାହ୍ନରେ ପ୍ରୟାଗରାଜରେ ଏକ ରାଜନୈତିକ ରାଲିକୁ ସମ୍ବୋଧିତ କରିଛନ୍ତି। ଏହାପରେ ମୋଦି ନିଜ ସଂସଦୀୟ କ୍ଷେତ୍ର ବାରାଣସୀରେ ୨୫ ହଜାରରୁ ଅଧିକ ମହିଳାଙ୍କ ସହ ଆଲୋଚନା କରିବେ। ସେ ସମ୍ପୂର୍ଣ୍ଣାନନ୍ଦ ସଂସ୍କୃତ ବିଶ୍ୱବିଦ୍ୟାଳୟର ମାତୃ ଶକ୍ତି ସମ୍ମିଳନୀରେ ଯୋଗଦେବେ। ଏହି କାର୍ଯ୍ୟକ୍ରମରେ ସେ ମହିଳା, ଗୃହିଣୀ, ଡାକ୍ତର, ଶିକ୍ଷକ, ବ୍ୟବସାୟୀ, ଓକିଲ ଓ କ୍ରୀଡ଼ାବିତଙ୍କ ସହ ଆଲୋଚନା କରିବେ। ପ୍ରଧାନମନ୍ତ୍ରୀ ଆଜି ରାତିରେ ବାରାଣାସୀରେ ରହିବେ ଏବଂ ଆସନ୍ତାକାଲି ଉତ୍ତରପ୍ରଦେଶରେ ଆଉ ଦୁଇଟି ରାଲିକୁ ସମ୍ବୋଧିତ କରିବେ।
ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ବଳରାମପୁର, ସିଦ୍ଧାର୍ଥ ନଗର, ସନ୍ତ କବୀର ନଗର ବସ୍ତି ବାରଣାସୀ ଓ ଆଜମଗଡ଼ରେ ରାଲିକୁ ସମ୍ବୋଧିତ କରିବେ। ଅନ୍ୟପକ୍ଷରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଆଜମଗଡ଼ ଓ ଭଦୋହି ଜିଲ୍ଲାରେ ରାଜନୈତିକ ରାଲିକୁ ସମ୍ବୋଧିତ କରିବେ। ବହୁଜନ ସମାଜ ପାର୍ଟି ସୁପ୍ରିମୋ ମାୟାବତୀ ଜୌନପୁର ଜିଲ୍ଲାରେ ଏକ ରାଲିକୁ ସମ୍ବୋଧିତ କରିବେ।
