ସରକାରୀ ଟେଲିକମ୍ କମ୍ପାନୀ ବିଏସଏନଏଲ୍ ଏବେ ଗୁରୁତର ସଙ୍କଟ ଦେଇ ଗତି କରୁଛି । କର୍ମଚାରୀଙ୍କୁ ଦରମା ଦେବାକୁ ଟଙ୍କା ନାହିଁ । ଦରମା ଦେବା ନିମନ୍ତେ ମାସର ୩ୟ ସପ୍ତାହ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ୁଛି । ଏହି ସ୍ଥିତିରେ ଠିକା ବା ଚୁକ୍ତିଭିତ୍ତିରେ କାମ କରୁଥିବା ପ୍ରାୟ ୨୦ ହଜାର କର୍ମଚାରୀଙ୍କ ଉପରେ ଝୁଲୁଛି ଛଟେଇ ଖଣ୍ଡା । ପୂର୍ବରୁ କମ୍ପାନୀ ୩୦ ହଜାର ଠିକା କର୍ମଚାରୀଙ୍କୁ ବାହାର କରି ଦେଇଥିଲା, ଏବେ ଆଉ ୨୦ ହଜାର କର୍ମଚାରୀଙ୍କୁ ବାହାର କରାଯାଇ ପାରେ ବୋଲି ସୂଚନା ମିଳିଛି ।
କର୍ମଚାରୀ ହ୍ରାସକୁ ନେଇ ସଂଘ କ୍ଷୁବ୍ଧ
ଠିକା କର୍ମଚାରୀଙ୍କୁ ବାହାର କରିବା ନେଇ ଚାଲିଥିବା ଚର୍ଚାକୁ ନେଇ କ୍ଷୁବ୍ଧ ହୋଇଛି କର୍ମଚାରୀ ସଂଘ । ସଂଗଠନ ପକ୍ଷରୁ ବିଏସଏନଏଲ୍ ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ପି.କେ.ପୁରୱାରଙ୍କୁ ଚିଠି ଲେଖି ଏଥିନେଇ ଆପତ୍ତି ଜଣାଇଛି । ଏଥିରେ କୁହାଯାଇଛି ଯେ କମ୍ପାନୀର ସ୍ଥିତି ଧୀରେଧୀରେ ଖରାପ ହେବାରେ ଲାଗିଛି । ଭିଆରଏସ୍ ସ୍କିମ ଲାଗୁ ହେବା ପରେ ସ୍ଥିତି ବିଗିଡ଼ିବା ଆରମ୍ଭ ହୋଇଛି । ବିିଭିନ୍ନ ସହରରେ ମାନବସମ୍ବଳ ହ୍ରାସ ଯୋଗୁଁ ନେଟୱାର୍କକୁ ନେଇ ସମସ୍ୟା ହୋଇଛି ।
ବିଏସଏନଏଲରୁ ବହୁ ସଂଖ୍ୟକ କର୍ମଚାରୀ ବିଦାୟ ନେବା ପରେ ମଧ୍ୟ ବର୍ତମାନର କର୍ମଚାରୀଙ୍କୁ ନିର୍ଧାରିତ ଅବଧିରେ ବେତନ ମିଳୁନାହିଁ । ଗତ ୧୪ ମାସରେ ୧୩ଜଣ ଠିକା କର୍ମଚାରୀ ଦରମା ନ ମିଳିବା କାରଣରୁ ଆତ୍ମହତ୍ୟା କରିଛନ୍ତି । ତେଣୁ ଏହାପ୍ରତି ତୁରନ୍ତ ଧ୍ୟାନ ଦେବାକୁ କର୍ମଚାରୀ ସଂଗଠନ ଦାବି କରିଛି ।
ସୂଚନାଯୋଗ୍ୟ ଯେ ଗତ ୧ ତାରିଖରେ ବିଏସଏନଏଲ୍ କମ୍ପାନୀର ସବୁ ମହାପ୍ରବନ୍ଧକମାନଙ୍କୁ ଚିଠି ଲେଖି ଠିକା କର୍ମଚାରୀ ବାବଦରେ ହେଉଥିବା ବ୍ୟୟ ହ୍ରାସ ପାଇଁ ପରାମର୍ଶ ଦେଇଥିଲା । ଏଥିରେ କମ ଠିକା କର୍ମଚାରୀଙ୍କୁ କାମରେ ଲଗାଇବାକୁ କୁହାଯାଇଥିଲା, ଯାହା ଫଳରେ ବ୍ୟୟ ହାର ହ୍ରାସ ପାଇବ । ସବୁ ମହାପ୍ରବନ୍ଧକମାନେ ନିଜ ନିଜ ଜୋନର ଏକ ବିସ୍ତୃତ କାର୍ଯ୍ୟପନ୍ଥା ପ୍ରସ୍ତୁତ କରି ଖର୍ଚ ହ୍ରାସ ପାଇଁ ପଦକ୍ଷେପ ନେବାକୁ ଏଥିରେ କୁହାଯାଇଛି ।
ସୂଚନାଯୋଗ୍ୟ ଯେ ଗତବର୍ଷ ଭିଆରଏସ୍ (ସ୍ବେଚ୍ଛାକୃତ ଅବସର) ଯୋଜନାରେ ୭୯ ହଜାର କର୍ମଚାରୀ ଅବସର ନେଇଛନ୍ତି । କିଛିମାସ ତଳେ ୩୦ ହଜାର ଠିକା କର୍ମଚାରୀଙ୍କୁ ବହିଷ୍କାର କରାଯାଇଛି ଏବଂ ଆଉ ୨୦ ହଜାର କର୍ମଚାରୀଙ୍କୁ ବିଦାୟ କରାଯିବାକୁ ଯୋଜନା ପ୍ରସ୍ତୁତ ହୋଇଛି ।
