ବୌଦ୍ଧ: ବୌଦ୍ଧ ଜିଲା ଦୌରାଜଜ ବିକ୍ରମ କୁମାର ପ୍ରଧାନ ଏକ ବଧୂ ହତ୍ୟା ମାମଲାର ବିଚାର କରି ଅଭିଯୁକ୍ତା ଶାଶୂକୁ ୭ ବର୍ଷ କାରାଦଣ୍ଡାଦେଶ ଆଦେଶ ପ୍ରଦାନ କରିଛନ୍ତି । ମାମଲାରୁ ପ୍ରକାଶ ଯେ ବାଉଁଶୁଣୀ ଥାନାର ତାଳପଦର ଗ୍ରାମର ରଶ୍ମିତା ବାରିକଙ୍କୁ କଂଟାମାଳ ଥାନା ବଡଛପାପାଲି ଗ୍ରାମର ପରେଶ ସାହୁ ବୈଦିକ ଅନୁଯାୟୀ ଦୁଇ ବର୍ଷ ପୂର୍ବରୁ ବିବାହ କରିଥିଲେ । କିନ୍ତୁ ବିବାହର ୩/୪ ମାସ ପରେ ସ୍ୱାମୀ ପରେଶ ଓ ଶାଶୂ ସୌଦା ସାହୁ ୫୦ ହଜାର ଟଙ୍କା ଓ ଗୋଟିଏ ବାଇକ୍ ଯୌତୁକ ଆଣିବାକୁ ଦାବି କରିଆସୁଥିଲେ । ଯୌତୁକ ଆଣିବାକୁ ନେଇ ଶାରୀରିକ ଓ ମାନସିକ ଯନ୍ତ୍ରଣା ମଧ୍ୟ ଦେଇଆସୁଥିଲେ । ଏନେଇ ରଶ୍ମିତା ବାପଘର ଲୋକଙ୍କୁ କହିଥିଲେ ।
ରଶ୍ମିତାର ପରିବାର ଲୋକ ଆର୍ଥକ ସ୍ୱଚ୍ଛଳ ନଥିବାରୁ ଯୌତୁକ ଦେଇପାରୁନଥିଲେ । ଏହା ଭିତରେ ରଶ୍ମିତାର ଏକ ପୁତ୍ର ସନ୍ତାନ ଜନ୍ମ ହୋଇଥିଲା । ଗତ ୯.୫.୨୦୧୫ ରିଖରେ ରଶ୍ମିତାଙ୍କ ଦେହ ଖରାପ ଅଛି ତାକୁ ସୋନପୁର ମେଡିକାଲକୁ ନିଆଯାଇଛି ବୋଲି ପରିବାର ଲୋକ ଖବର ପାଇ ସୋନପୁର ମେଡିକାଲକୁ ଯାଇଥିଲେ । ସେଠାରେ ରଶ୍ମିତାଙ୍କ ମୃତ୍ୟୁ ହୋଇଯାଇଥିଲା ଏବଂ ତାଙ୍କ ବେକରେ ଏକ କଳା ଦାଗ ରହିଥିବାରୁ ଯୌତୁକ ପାଇଁ ତାକୁ ହତ୍ୟା କରାଯାଇଥିବା ନେଇ ରଶ୍ମିତାର ଭେଣୋଇ ତରଣୀ ଖଟୁଆ କଣ୍ଟାମାଳ ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ କଣ୍ଟାମାଳ ଥାନା ପକ୍ଷରୁ ଥାନା କେସ ନଂ ୪୧/୧୫ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ।
ପୁଲିସ ଅଭିଯୁକ୍ତ ସ୍ୱାମୀ ଓ ଶାଶୂକୁ ଗିରଫ କରି କୋର୍ଟ ଚାଲାଣ କରିଥିଲା । ପରେ ଏହି ମାମଲାଟି ବୌଦ୍ଧ ଜିଲା ଦୌରାଜଜଙ୍କ ଅଦାଲତରେ ବିଚାର ହୋଇଥିଲା । ଅଭିଯୁକ୍ତ ସ୍ୱାମୀ ପରେଶ ଜାମିନ ପାଇବା ପରେ ଫେରାର ହୋଇଯାଇଥିଲା । କିନ୍ତୁ ମାମଲାଟି ଶାଶୂ ସୌଦାଙ୍କ ପାଇଁ ବିଚାର ହୋଇଥିଲା । ମାମଲାରେ ସରକାରଙ୍କ ପକ୍ଷରୁ ୧୫ ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ଜିଲା ଦୌରାଜଜ ବିକ୍ରମ କୁମାର ପ୍ରଧାନ ପ୍ରମାଣ ଥିବା ନେଇ ଅଭିଯୁକ୍ତ ଶାଶୁ ସୌଦା ସାହୁଙ୍କୁ ୭ ବର୍ଷ କାରାଦଣ୍ଡାଦେଶ ପ୍ରଦାନ କରିଛନ୍ତି । ସରକାରଙ୍କ ପକ୍ଷରୁ ମାମଲାକୁ ପିପି ସବିତା କୁମାରୀ ପଣ୍ଡା ପରିଚାଳନା କରୁଥିଲେ ।
Comments are closed.