ଭୁବନେଶ୍ୱର : ଦୁଇ ଦୁଇଥର ମନ୍ତ୍ରିସ୍ତରୀୟ ବୈଠକ ବସି ମିଳିତମଞ୍ଚ ସହିତ ଆଲୋଚନା କଲେ, କିନ୍ତୁ ସରକାର ତାଙ୍କ ଜିଦ୍ରେ ଅଟଳ ଥିବାରୁ ସମସ୍ୟା ସମାଧାନର ରାସ୍ତା ଫିଟୁ ନାହିଁ। ଶିକ୍ଷକ ଓ ଅଧ୍ୟାପକଙ୍କ ଦାବି ପ୍ରତି ସରକାର କର୍ଣ୍ଣପାତ କରୁନଥିବାରୁ ୩୦ ଲକ୍ଷ ଛାତ୍ରଛାତ୍ରୀଙ୍କ ପାଠପଢ଼ା ସଂପୂର୍ଣ୍ଣ ବନ୍ଦ । ଆସନ୍ତା ୨୪ ତାରିଖ ଠାରୁ ପ୍ରିବୋର୍ଡ-୧ ପରୀକ୍ଷା ଆରମ୍ଭ ହେବ। କିନ୍ତୁ ସରକାର ଆଦୌ ବିଚଳିତ ନୁହନ୍ତି। ତା’ ସତ୍ତ୍ବେ ଅଭିଭାବକଙ୍କ ପରାମର୍ଶ ଓ ଛାତ୍ର ଛାତ୍ରୀଙ୍କ ସ୍ୱାର୍ଥକୁ ସମ୍ମାନ ଜଣାଇ ଶିକ୍ଷକମାନେ କଳାବ୍ୟାଜ ପରିଧାନ କରି ପରୀକ୍ଷାରେ ସହଯୋଗ କରିବେ ଏବଂ ପାଠପଢ଼ା ହେବ ବୋଲି ମିଳିତ ମଞ୍ଚ ଘୋଷଣା କରିଛି। ଦାବିପୂରଣ ନ ହେବା ଯାଏ ଆନ୍ଦୋଳନ ଅବ୍ୟାହତ ରହିବ ବୋଲି ମିଳିତ ମଞ୍ଚର ତିନି ଆବାହକ ପ୍ରକାଶ ଚନ୍ଦ୍ର ମହାନ୍ତି, ଗୋଲକ ନାୟକ ଓ ପବିତ୍ର ମହାଲା ସାମ୍ବାଦିକ ସମ୍ମିଳନୀ ଜଣାଇଛନ୍ତି। ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତମଞ୍ଚର ଆହ୍ୱାନରେ ଷାଠିଏ ହଜାର ଶିକ୍ଷକ ଅଧ୍ୟାପକ ଓ ଶିକ୍ଷାକର୍ମଚାରୀ ଆଜକୁ ୩୮ ଦିନ ହେଲା ନିଜର ହକ୍ ହାସଲ ପାଇଁ ରାଜରାସ୍ତାରେ ଖୋଲା ଆକାଶ ତଳେ ବସି ରହିଛନ୍ତି। ବିଭାଗୀୟ ମନ୍ତ୍ରୀମାନେ ଅସହାୟ ଓ କେବଳ ଆତ୍ମରକ୍ଷା ପାଇଁ ମିଛ କହୁଛନ୍ତି। ଜନସାଧାରଣଙ୍କୁ ଭୁଆଁ ବୁଲେଇବା ପାଇଁ ପୁରୁଣା କଥାକୁ ବାରମ୍ବାର ଗଣମାଧ୍ୟମରେ ପ୍ରକାଶ କରୁଛନ୍ତି। ଅପରପକ୍ଷେ ମିଳିତମଞ୍ଚ ତରଫରୁ କୁହାଯାଇଛି ପିଲା ହେଉଛନ୍ତି ଆମର ସମ୍ପଦ। ୩୦ ବର୍ଷ ଧରି ଛାତଙ୍କ ପ୍ରତି ଶିକ୍ଷକମାନେ ଅବହେଳା କରି ନାହାନ୍ତି ,ଏପରିକି ଛୁଟିରେ ମଧ୍ୟ ପାଠ ପଢ଼ାଇଛନ୍ତି। କିନ୍ତୁ ଦାବି ପୂରଣ ନ ହେବାଯାଏ କୌଣସି ପରିପ୍ରେକ୍ଷୀରେ ଆନ୍ଦୋଳନରୁ ଓହରିବୁ ନାହିଁ ବୋଲି ମିଳିତ ମଞ୍ଚ ପକ୍ଷରୁ କୁହାଯାଇଛିି।
ଆନ୍ଦୋଳନକୁ ତୀବ୍ରତର କରାଯାଇ ପ୍ରତି ଗାଁରେ ଜନଦରବାର କରାଯିବ। ଜନସାଧାରଣ ଗଢ଼ିଥିବା ସ୍କୁଲ କଲେଜକୁ ସରକାର କେମିତି ବନ୍ଦ କରିଦେବା ପାଇଁ ଚକ୍ରାନ୍ତ କରୁଛନ୍ତି ତାହା ଜଣାଇବୁ ବୋଲି ଶିକ୍ଷକ ନେତାମାନେ କହିଛନ୍ତି।
